កោះកុងៈ កម្លាំងសមត្ថកិច្ចរបស់រដ្ឋាភិបាលបានប្រើវិធីសាស្ត្រផ្សេងៗដើម្បី រារាំងប្រជាពលរដ្ឋជាច្រើន ក្នុងចំណោមពលរដ្ឋជាង ៦០០ នាក់ មកពីខេត្តចំនួន ៩ ដែលធ្វើដំណើរទៅចូលរួមដើរល្បាតព្រៃ និងធ្វើពិធីបួងសួងគោរពដល់វិញ្ញាណក្ខន្ធសពសកម្មជនការពារ ព្រៃឈើ ដ៏ល្បីល្បាញម្នាក់ នៅកន្លែងដែលត្រូវបានខ្មាន់កាំភ្លើងបាញ់សម្លាប់ កាលពីថ្ងៃទី ២៦ ខែមេសា។ នេះបើតាមមន្ត្រីអង្គការសង្គមស៊ីវិល។
លោក ឈឹម សាវុធ អ្នកសម្របសម្រួល សម្រាប់វេទិកាសាធារណៈ នៅមជ្ឈមណ្ឌលសិទិ្ធមនុស្សកម្ពុជា បានថ្លែងថា ពលរដ្ឋចំនួន៣ ខេត្ត ក្នុងចំណោមពលរដ្ឋចំនួន ៩ ខេត្ត ត្រូវបានអាជ្ញាធរ ធ្វើការរារាំង មិនឲ្យពួកគេ ធ្វើដំណើរមកចូលរួម ធ្វើពិធីបួងសួង និងល្បាតព្រៃ នៅក្នុងស្រុកមណ្ឌលសីមា ខេត្តកោះកុង កន្លែងដែលលោកឈុត វុទ្ធីត្រូវបានគេបាញ់សម្លាប់។ ពលរដ្ឋទាំងនោះ មានដូចជាខេត្តកំពង់ធំ កំពង់ស្ពឺ និងខេត្តស្ទឹងត្រែង។
លោក ថ្លែងថា៖«នេះគឺជាទង្វើមួយ ដែលខុសនឹងច្បាប់ ហើយក៏ជាទង្វើររំលោភសិទ្ធិមនុស្សមួយយ៉ាងធ្ងន់ធ្ងរផងដែរ ដែលសង្គមស៊ីវិល មិនអាចទទួលយកបាន»។ លោកឲ្យដឹងទៀតថា ពលរដ្ឋនៅខេត្តកំពង់ធំ រដ្ឋបាលព្រៃឈើ បានចុះទៅស្រង់ស្ថិតិ និងស្នាមមេដៃ ហើយបានទាញពលរដ្ឋចុះចេញពីរថយន្ត រីឯនៅខេត្តកំពង់ស្ពឺ មេព្រៃ បានចុះទៅកាក់ឡាន មិនឲ្យពលរដ្ឋចេញ។ មានពលរដ្ឋ ៥០ នាក់ ដែលសមត្ថកិច្ចបានកាក់ឡាន ទូរស័ព្ទមិនអាចទំនាក់ទំនងបាន ហើយនៅឯខេត្តស្ទឹងត្រែង មានអង្គការមួយឈ្មោះថា ព្រហ្មវិហារធម៌ បានចុះស្រង់ស្ថិតិពលរដ្ឋ ដែលមានគម្រោងមកចូលរួម ហើយថានឹងយកទៅរាយការណ៍ឲ្យថ្នាក់លើ ប៉ុន្តែទោះបីជាមានការទប់ស្កាត់យ៉ាងណាក៏ដោយ ក៏ពលរដ្ឋទាំងនោះ បានមកដល់គោលដៅ ដែលពួកគេបានកំណត់។
លោក ឈឹម សាវុធ និយាយថា៖«អាជ្ញាធរ គួរតែគាំទ្រទង្វើរបស់ប្រជាពលរដ្ឋ ពីព្រោះពួកគាត់ បានដើរល្បាតព្រៃប្រឆាំងនិងបទល្មើសព្រៃឈើ»។
បើតាមលោក ឈឹម សាវុធ តាមគម្រោង ប្រជាពលរដ្ឋទាំងអស់ ដែលភាគច្រើនជាសកម្មជន នៅក្នុងសហគមន៍ការពារព្រៃឈើ ត្រូវទៅជួបជុំគ្នា នៅក្នុងឃុំជីខលើ ស្រុកស្រែអំបិល ដើម្បីបន្តដំណើរដោយរថយន្តចំនួន ២៧ គ្រឿង ឆ្ពោះទៅខេត្តកោះកុង ហើយនឹងស្នាក់នៅក្នុងវត្តមួយ ដើម្បីបន្តដំណើរទៅចំណុចមុំបី ឃុំបាក់ខ្លង ស្រុកមណ្ឌលសីមា ដើម្បីធ្វើពិធីគោរពវិញ្ញាណក្ខន្ធដល់សពលោក ឈុត វុទ្ធី រួចហើយពលរដ្ឋទាំងអស់ នឹងដើរល្បាតព្រៃ ដើម្បីពិនិត្យមើលបទល្មើសព្រៃឈើ នៅក្នុងតំបន់នោះ ហើយនៅថ្ងៃបន្ទាប់ពលរដ្ឋ នឹងធ្វើដំណើរឆ្ពោះទៅស្រុកវាលវែង ខេត្តពោធិ៍សាត់ ជាទីកន្លែងកាប់បំផ្លាញឈើដ៏ធំរបស់លោកឧកញ៉ា ទី្រ ភាព។
ម៉ិញ នី តំណាងពលរដ្ឋមកពីខេត្តកំពង់ធំ បានឲ្យដឹងថា ពលរដ្ឋពីរឃុំ នៅស្រុកសណ្តាន់ ត្រូវបានមេឃុំ និងរដ្ឋបាលព្រៃឈើស្រុកសណ្តាន់ មកស្រង់ស្ថិតិ និងធ្វើការរារាំង មិនឲ្យចូលរួមធ្វើពីធី នៅក្នុងខេត្តកោះកុងឡើយ តែពលរដ្ឋរបស់លោកនៅតែប្តេជ្ញាថា ត្រូវតែចូលរួមឲ្យខាងតែបាន ពីព្រោះពួកគាត់ គ្រាន់តែទៅគោរពវិញ្ញាណក្ខន្ធសព លោក ឈុត វុទ្ធី តែប៉ុណ្ណោះ។ លោកបន្ថែមថា៖ «ខ្ញុំបានប្រាប់ទៅមេព្រៃថា ពួកខ្ញុំមិនបានធ្វើអី្វខុសនោះទេ ដូច្នេះពួកខ្ញុំ ត្រូវតែទៅចូលរួមកម្មវិធីនោះ»។
ឆឺយ ឧត្តមរស្មី កូនប្រុសច្បងរបស់សពលោក ឈុត វុទ្ធី ដែលចូលរួមជាមួយប្រជាពលរដ្ឋបានឲ្យដឹងថា៖«ខ្ញុំចង់ដឹងអំពី ទីតាំង ដែលគេបាញ់សម្លាប់ឪពុករបស់ខ្ញុំ ហើយនិងដុតធូបគោរពដល់ព្រលឹងឪពុករបស់ខ្ញុំ»។ រស្មីបានឲ្យដឹងទៀតថា៖ «ខ្ញុំចង់ឃើញទីតាំងនោះ ថាតើវាយ៉ាងម៉េច បានជាគេសម្លាប់ឪពុករបស់ខ្ញុំ?»។
លោក ស្វាយ ភឿន តំណាងពលរដ្ឋមកពីខេត្តព្រះវិហារ បានឲ្យដឹងថា លោកបានមកដល់គោលដៅ តាមការកំណត់ ហើយលោកនឹងគ្រោងទៅធ្វើពិធីបួងសួង គោរពដល់វិញ្ញាណក្ខន្ធលោក វុទ្ធី បន្ទាប់មក នឹងនាំគ្នាដើរល្បាតព្រៃថា តើបទល្មើសនៅកន្លែងនោះ វាមានទំហំធំធេងប៉ុនណា បានជាពួកគេបាញ់សម្លាប់លោកឈុត វុទ្ធី? លោកឲ្យដឹងថា៖ «ពួកយើងមិនធ្វើបាតុកម្មនោះទេ ពួកយើងគ្រាន់តែចុះល្បាតក្នុងព្រៃ ដើម្បីប្រមូលភស្តុតាងបទល្មើសព្រៃឈើប្រគល់ឲ្យរដ្ឋាភិបាលតែ ប៉ុណ្ណោះ»។
លោកអ៊ុត សំអន អភិបាលរងខេត្តកោះកុង បានថ្លែងថា លោកពុំមានគោលការណ៍ ណាមួយដើម្បីធ្វើការរារាំងពលរដ្ឋ ដែលធ្វើដំណើរមកចូលរួមកម្មវិធីនៅក្នុងខេត្តកោះកុងនោះទេ។
លោក ប៊ុន លើត អភិបាលខេត្តកោះកុង បានបដិសេធមិនធ្វើការអត្ថាធិប្បាយទេ កាលពីម្សិលមិញ។ ចំណែកលោកសួន ណារ៉ា អភិបាលរងខេត្តមួយរូបទៀត ថ្លែងថា លោកពុំបានជ្រាប អំពីបញ្ហានោះទេ ដោយសារតែលោកពុំបានធ្វើការទាក់ទងទៅនឹងបញ្ហានោះ។
លោក ឈុត វុទ្ធី ប្រធានអង្គការការពារធនធានធម្មជាតិ ដែលត្រូវបានមន្ត្រីអង្គការសង្គមស៊ីវិលជាច្រើន ហៅថា ជាវរជនការពារព្រៃឈើ ត្រូវបានគេបាញ់សម្លាប់យ៉ាងព្រៃផ្សៃ ខណៈលោក នាំអ្នកកាសែតពីរនាក់ ទៅថតរូប នៅកន្លែងដែលមានការកាប់បំផ្លាញព្រៃឈើ ក្នុងឃុំបាក់ខ្លង ស្រុកមណ្ឌលសីមាកាលពីថ្ងៃ ២៦ ខែមេសា។
បើទោះបីជាការស៊ើបអង្កេតរបស់រដ្ឋាភិបាល បានបង្ហាញថា លោក ឈុត វុទ្ធី ត្រូវបានលោក អ៊ិន រតនា ជាមន្ត្រីប៉េអឹម ខេត្តកោះកុង ដែលត្រូវគ្រាប់ស្លាប់ដែរនោះ បានបាញ់សម្លាប់ លោក ឈុត វុទ្ធី ដោយសារតែទំនាស់ពាក្យសម្តីគ្នាក្តី ប៉ុន្តែក្រុមអង្គការសង្គមស៊ីវិល អ្នកវិភាគ និងប្រជាពលរដ្ឋ មិនជឿលើរបាយការណ៍នេះឡើយ ដោយគេគិតថា ការសម្លាប់លោក ឈុត វុទ្ធី មានការរៀបចំទុកជាមុន ដោយសារតែលោកឈុត វុទ្ធី បានធ្វើឲ្យប៉ះពាល់ដល់ផលប្រយោជន៍របស់ឈ្មួញមានអំណាចរកស៊ីកាប់ ឈើខុសច្បាប់។ ចំណែកលោក អ៊ិន រតនា ត្រូវគេគិតថា ត្រូវបានគេសម្លាប់បំបិទមាត់ ដើម្បីទម្លាក់កំហុសលើគាត់ «ស្វាស៊ីបាយលាបមាត់ពពែ»៕
សមត្ថកិច្ចខំទប់ពលរដ្ឋមិនឲ្យទៅកន្លែងគេសម្លាប់ឈុត វុទ្ធី | ភ្នំពេញ ប៉ុស្តិ៍ | The Phnom Penh Post
No comments:
Post a Comment