Tuesday, May 15, 2012

កូន​អ្នក​ភូមិ​បុរី​កីឡា​ម្នាក់​ស្លាប់​និង​ច្រើន​នាក់​ឈឺ​ដោយ​សារ​គ្មាន​ជម្រក

2012-05-15
កូន​អ្នក​ភូមិ​បុរី​កីឡា​ម្នាក់​ស្លាប់ និង​ជា​ច្រើន​នាក់​ទៀត​ឈឺ​គ្រុនក្ដៅ ផ្ដាសាយ និង​រាករូស ដោយសារ​គ្មាន​ទីកន្លែង​រស់​នៅ​សមរម្យ។
RFA/Sochivy
អ្នក​ភូមិ​បុរី​កីឡា កាន់​រូប​ថត​អ្នក​ភូមិ​ដែល​កំពុង​ជាប់​ឃុំ​នៅ​ពន្ធនាគារ​ព្រៃស និង​បដា​ទាមទារ​រក​យុត្តិធម៌​ ក្នុង​ថ្ងៃ​អ្នក​ភូមិ​ធ្វើ​សន្និសីទ​កាសែត នៅ​ប្លុក​បុរី​កីឡា ខណ្ឌ​៧​មករា កាល​ពី​ថ្ងៃ​ទី​១៦ ខែ​កុម្ភៈ ឆ្នាំ​២០១២។
កូន​អ្នកភូមិ​បុរី​កីឡា​ម្នាក់​នោះ បាន​ស្លាប់​នៅ​ក្នុង​មន្ទីរពេទ្យ​គន្ធបុប្ផា កាល​ពី​ល្ងាច​ថ្ងៃ​ទី​១៤ ខែ​ឧសភា នៅ​ក្នុង​រាជធានី​ភ្នំពេញ ដោយសារ​ជំងឺ​គ្រុនក្ដៅ និង​រាករូស និង​គ្មាន​អាហារូបត្ថម្ភ​គ្រប់គ្រាន់។
ស្ត្រី​ឈ្មោះ ខួន តឿន ជា​ម្ដាយ​របស់​ទារក​ដែល​ស្លាប់​នោះ បាន​ឲ្យ​ដឹង​ថា កូនប្រុស​របស់​គាត់​មាន​អាយុ ៩​ខែ បាន​ចាប់ផ្ដើម​ឈឺ​នៅ​ខណៈ​ដែល​គាត់​បាន​ចេញ​តវ៉ា​ទាមទារ​រក​សំណង​ពី​ ក្រុមហ៊ុន​ជា​បន្តបន្ទាប់ នៅ​ក្នុង​រាជធានី​ភ្នំពេញ ដើម្បី​ឲ្យ​រដ្ឋាភិបាល​ជួយ​អន្តរាគមន៍ ពីព្រោះ​ថា គាត់​ត្រូវ​យក​កូន​ទៅ​ជាមួយ​គ្រប់​ពេល ហើយ​កូន​នោះ​ត្រូវ​ថ្ងៃ​ក្ដៅ ត្រូវ​ទឹក​ភ្លៀង។
កូន​អ្នកភូមិ​បុរី​កីឡា​ស្លាប់​នេះ​បាន​ស្លាប់ ក្រោយ​ពី​លោក​នាយករដ្ឋមន្ត្រី ហ៊ុន សែន បាន​ប្រកាស​ថា នៅ​ក្នុង​អាណត្តិ​ដឹកនាំ​ប្រទេស​របស់​លោក លោក​មិន​ឲ្យ​ប្រជាពលរដ្ឋ​ណា​ម្នាក់​ស្លាប់​ដោយ​ការ​អត់​បាយ​នោះ​ទេ។
ទោះបី​ជា​មាន​ការ​អះអាង​យ៉ាង​នេះ​ក្ដី ខួន តឿន បាន​រៀបរាប់​ទាំង​សោក​សង្រេង អាណិត​ស្រណោះ​កូន​ប្រុស​របស់​គាត់​ថា កាល​កូន​គាត់​នៅ​រស់ គាត់​គ្មាន​ទីជម្រក និង​អាហារូបត្ថម្ភ​ឲ្យ​កូន​បរិភោគ​ទេ រស់​ពឹង​អាស្រ័យ​លើ​ទឹកដោះ​របស់​គាត់ ប៉ុន្តែ​ពេល​គាត់​គ្មាន​ម្ហូប​អាហារ​បរិភោគ​ក៏​ខ្វះ​ទឹកដោះ​ឲ្យ​កូន​បៅ​ដែរ។ អ្នកស្រី​បន្ត​ថា កូន​របស់​គាត់​ចាប់ផ្ដើម​ឈឺ​កាន់តែ​ខ្លាំង ហើយ​គាត់​ក៏​បាន​បញ្ជូន​ទៅ​កាន់​មន្ទីរពេទ្យ​គន្ធបុប្ផា ដេក​សំរាក​ព្យាបាល​ជំងឺ​នៅ​មន្ទីរពេទ្យ​ជិត​មួយ​ខែ​រហូត​ដល់​ថ្ងៃ​ស្លាប់។
អ្នកស្រី​បាន​លើក​ឡើង​ទាំង​អាណិត​កូន​ដែល​គាត់​ទើប​មាន​កូន​តែ​ម្នាក់​ គត់​នោះ​ថា បន្ទាប់ពី​កូន​គាត់​ស្លាប់ គាត់​ក៏​ប្រគល់ឲ្យ​មន្ទីរពេទ្យ​យក​ទៅ​បូជា​ជូន ដោយសារតែ​បើ​យក​មក​បុរី​កីឡា​វិញ គ្មាន​ផ្ទះ​តម្កល់​សាកសព និង​គ្មាន​លុយ​ធ្វើបុណ្យ​សព។
អ្នកស្រី ខួន តឿន រៀបរាប់​ទៀត​ថា នៅ​ព្រឹក​ថ្ងៃ​ទី​១៥ ខែ​ឧសភា គាត់​បាន​ទៅ​សុំ​ប្រាក់​ពី​ចៅសង្កាត់​វាលវង់ ដើម្បី​ធ្វើបុណ្យ​សព តែ​អ្នកស្រី​ចៅសង្កាត់​សួរ​គាត់​ថា បើ​សិន​ជា ខួន តឿន កាន់​គណបក្ស​ណា​ឲ្យ​ទៅ​សុំ​លុយ​គណបក្ស​នោះ​ទៅ។
វិទ្យុ​អាស៊ី​សេរី​មិន​អាច​ទាក់ទង ចៅសង្កាត់​វាលវង់ អ្នកស្រី កែវ សុកល ដើម្បី​សួរ​អំពី​បញ្ហា​នេះ បាន​ទេ នៅ​ថ្ងៃ​ទី​១៥ ខែ​ឧសភា​នេះ។
ប្រធាន​ផ្នែក​កម្មវិធី​ការងារ​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍ លោក មឿន តុលា បាន​លើក​ឡើង​ថា ករណី​នេះ ក្រុមហ៊ុន ឬ​រដ្ឋាភិបាល​ត្រូវតែ​ទទួល​ខុស​ត្រូវ។ លោក មឿន តុលា អះអាង​ថា ការ​បណ្ដេញ​ចេញ​ប្រជាពលរដ្ឋ​នៅ​បុរី​កីឡា​នេះ​ជា​រឿង​ខុសច្បាប់។
កាល​ពី​ថ្ងៃ​ទី​១១ ខែ​ឧសភា កន្លង​ទៅ សហគមន៍​អ្នក​ភូមិ​បឹង​កក់ និង​បុរី​កីឡា បាន​ធ្វើ​សំណើ​សុំ​ដោយឡែក​គ្នា ២ ដើម្បី​ជំរុញ​ឲ្យ​សាលា​រាជធានី​ភ្នំពេញ ពន្លឿន​ការ​អនុវត្ត​សេចក្ដី​សម្រេច​របស់​លោក​នាយក​រដ្ឋមន្ត្រី ហ៊ុន សែន ដែល​បាន​ឲ្យ​សាលា​រាជធានី​ភ្នំពេញ ដោះស្រាយ​ទំនាស់​ដី​នៅ​តំបន់​ទាំង​ពីរ​នេះ​ដោយ​ផ្ទាល់ ប៉ុន្តែ​រហូត​មក​ទល់​ពេល​នេះ​មិន​ទាន់​មាន​លទ្ធផល​នៅ​ឡើយ។
ទោះ​បី​ជា​យ៉ាង​ណា​ក៏ដោយ ក្រុម​អ្នក​ភូមិ​បាន​សម្ដែង​ការ​ព្រួយបារម្ភ​ថា កូនៗ​របស់​ពួក​គាត់​ជា​ច្រើន​នាក់​កំពុង​មាន​ជំងឺ​រាករូស និង​គ្រុនក្ដៅ ដោយសារ​កត្តា​រស់​នៅ​មិន​សមរម្យ រស់​នៅ​ក្រោម​តង់ ត្រូវ​ភ្លៀង​ក្ដៅ​រាល់​ថ្ងៃ និង​គ្មាន​អាហារ​បរិភោគ​គ្រប់គ្រាន់​ជាដើម៕
កូន​អ្នក​ភូមិ​បុរី​កីឡា​ម្នាក់​ស្លាប់​និង​ច្រើន​នាក់​ឈឺ​ដោយ​សារ​គ្មាន​ជម្រក

No comments:

Post a Comment