សាលារាជធានីភ្នំពេញ៖ នយោបាយផ្តល់ទីតាំងលំនៅថ្មី ត្រូវជួបនឹងការជំទាស់ ដោយហេតុថា សមាជិកគណបក្សប្រឆាំង និងសកម្មជនសិទ្ធិមនុស្ស
(ថ្ងៃទី 12 មីនា 2012, ម៉ោង 11:17:AM) | ដោយ: លីនណាក- ក ក+ | Print
ភ្នំពេញ: សាលារាជធានីភ្នំពេញ កាលពីថ្ងៃទី១១ ខែមីនា ឆ្នាំ២០១២ បានធ្វើការផ្សព្វផ្សាយព័ត៌មាន ដែលមានចំណងជើងថា “បុរីកីឡា, ភាពចាប់អារម្មណ៍ខ្ពស់ និងការយកចិត្តទុកដាក់របស់អាជ្ញាធរ” ដោយបានលើកឡើងថា នៅទីបំផុត ទាំងអស់គ្នា ហាក់ដូចជាបានឈានទៅដល់ភាពប្រកបដោយវិចារណញ្ញាណ ជាពិសេសអ្នកតស៊ូមតិ និងអ្នកសិទ្ធិមនុស្សជ្រុលនិយមមួយចំនួន ។
ការផ្សព្វផ្សាយព័ត៌មានរបស់សាលារាជធានីភ្នំពេញ បានលើកឡើងពីសម្ដី លោក អំ សំអាត នៃអង្គការលីកាដូ បាននិយាយ “យើងគប្បីវិលទៅរកវិធានការប្រកបដោយសន្តិវិធី ដើម្បីចរចាស្វែងរកនូវដំណោះស្រាយដោយសន្តិវិធី ដែលអាចទទួលបានដោយភាគីទាំងអស់ ហើយចៀសវាងអំពើហិង្សា” ។
ដោយឡែក អាជ្ញាធរ បានបង្ហាញឲ្យឃើញតាមភាពជាក់ស្តែងនូវភាពចាប់អារម្មណ៍ខ្ពស់ តាមផ្លូវរដ្ឋបាល និងផ្លូវច្បាប់ ដោយបានដោះលែងអ្នកតវ៉ាបុរីកីឡាឲ្យនៅក្រៅឃុំ ចំនួន ៧ នាក់ គឺ៥នាក់ នៅថ្ងៃទី១៧ ខែកុម្ភៈ ហើយ ២នាក់ទៀត នៅថ្ងៃទី១៨ ខែកុម្ភៈ ឆ្នាំ២០១២ ។
ការផ្សព្វផ្សាយព័ត៌មាន បានបង្ហាញថា ភាពចាប់អារម្មណ៍ខ្ពស់ និងភាពយកចិត្តទុកដាក់ទំនុកបម្រុងរបស់អាជ្ញាធរថ្នាក់ជាតិ និងថ្នាក់រាជធានីភ្នំពេញ ត្រូវបានកត់ត្រាទុកយ៉ាងច្បាស់លាស់ពេញលេញ ជាមួយនឹងគោលនយោបាយផ្តល់ទីតាំងលំនៅថ្មី និងការដោះស្រាយបញ្ហាជីវភាពប្រចាំថ្ងៃ សម្រាប់រយៈកាលមួយ។ នយោបាយផ្តល់ទីតាំងលំនៅថ្មី ត្រូវជួបនឹងការជំទាស់ ពេលខ្លះខ្លាំងក្លា ពេលខ្លះទៀតក៏មិនខ្លាំងក្លា ដោយហេតុថា មានក្រុមតស៊ូមតិ សមាជិកគណបក្សប្រឆាំង និងសកម្មជនសិទ្ធិមនុស្សប្រភេទខ្លះ កេងយកចំណេញលើជម្លោះ និងការប្រឈមរវាងប្រជាជនក្រីក្រ និងអាជ្ញាធរ ក្នុងគោលបំណងជំរុញបញ្ហាសិទ្ធិមនុស្ស ដែលមិនមែនចាប់ផ្តើមពីសិទ្ធិមនុស្សជាមូលដ្ឋាន ( ប៉ុន្តែជាបញ្ហាសិទ្ធិមនុស្សជាសាកល ដែលអនុវត្តដោយប្រទេសជឿនលឿនមួយចំនួន ) មកធ្វើជាមធ្យោបាយ បន្ទាបបន្ថោកអាជ្ញាធរ។ ការតវ៉ានៅបុរីកីឡា គឺជាមេរៀនមួយ ត្រូវបានរៀនសូត្រដោយភាគីទាំងអស់គ្នាមាន ៖ ភាគីពលរដ្ឋស្លូតត្រង់ ភាគីអាជ្ញាធរ និងភាគីវិនិយោគិន និងអ្នកអភិវឌ្ឍន៍ ។
ជាមួយនឹងភាពចាប់អារម្មណ៍ខ្ពស់ និងភាពយកចិត្តទុកដាក់ទំនុកបម្រុងរបស់អាជ្ញាធរថ្នាក់ជាតិ ព្រមទាំងថ្នាក់រាជធានី ប្រជាជនស្លូតត្រង់បានទទួលចំណែកសមរម្យ ឯវិនិយោគិននិងអ្នកអភិវឌ្ឍន៍ក៏ទទួលបានផលផ្លែផ្កាចេញពីការបណ្តាក់ទុករបស់គេ ហើយរាជធានីភ្នំពេញក៏នឹងរីកធាត់ធំ ក្លាយទៅជាគ្រាប់ពេជ្រភ្លឺថ្លារបស់កម្ពុជា ។
ការផ្សព្វផ្សាយ បានលើកឡើងទៀតថា ក៏ប៉ុន្តែភាពចាប់អារម្មណ៍ខ្ពស់ និងភាពយកចិត្តទុកដាក់ទំនុកបម្រុងរបស់អាជ្ញាធរ មិនគប្បីត្រូវបានចាត់ទុកថាជាអាជ្ញាប័ណ្ណសេរី សម្រាប់មនុស្សខិលខូចមួយចំនួនដើម្បីយកទៅធ្វើអាជីវកម្មលើខ្នងប្រជាពលរដ្ឋក្រីក្រស្លូតត្រង់ និងលើខ្នងអាជ្ញាធរឡើយ។ គេឃើញមានករណីអ្នកជួលទីលំនៅក្នុងបុរីកីឡាសម្រាប់រស់នៅ តែបែរជាអះអាងថា ជាម្ចាស់ទីកន្លែង ហើយទាមទារទទួលផលប្រយោជន៍ទៅវិញ។ ម្យ៉ាង ក៏មានករណីជនខិលខូច ដែលបានទទួលគោលនយោបាយរួចហើយ តាមការព្រមព្រៀងជាមួយនឹងអាជ្ញាធរហើយនោះ តែបែរជាបន្តចូលរួមធ្វើបាតុកម្មប្រឆាំងនឹងអាជ្ញាធរតទៅទៀត ។ ពួកជនខិលខូចទាំងនេះ បាននាំគ្នាបង្កើតពាក្យស្លោកមួយដោយគ្មានការទទួលខុសត្រូវថា៖ “ចាញ់បានលុយ ឈ្នះបានដី ឬបានផ្ទះ” ។
សាលារាជធានីភ្នំពេញ សង្ឃឹមថា លោក អំ សំអាត នៃអង្គការលីកាដូ និងអង្គការក្រៅរដ្ឋាភិបាល NGOs ដែលមានការទទួលខុសត្រូវ នឹងរួមដៃជាមួយគ្នាកសាងស្ពានរវាងប្រជាជនស្លូតត្រង់ ដែលជាអ្នកគោរពប្រតិបត្តិច្បាប់និងអាជ្ញាធរ ដើម្បីស្វែងរកការដោះស្រាយដោយសន្តិវិធី តាមរយៈទំនាក់ទំនងល្អ និងការចរចាបើប្រសិនមានការចាំបាច់ ៕S
No comments:
Post a Comment