ពលរដ្ឋជាង ១ពាន់គ្រួសារ ខកចិត្តនឹងការដោះស្រាយវិវាទដីធ្លីរបស់រដ្ឋាភិបាល
ដោយ តាំង វីដា និង អ៊ឹង ប៊ុនថន ថ្ងៃច័ន្ទ ទី18 កុម្ភៈ ឆ្នាំ2013 ម៉ោង17:18
ពលរដ្ឋនៅខេត្តក្រចេះ តវ៉ារឿងដីធ្លីនៅក្រសួងដែនដី (រូបថត តាំង វីដា)
ប្រតិកម្មនេះ កើតឡើងបន្ទាប់ពីតំណាងពលរដ្ឋប្រមាណ ៥០នាក់ បានឡើងមកដាក់លិខិតសុំអន្តរាគមន៍ពីខុទ្ទកាល័យនាយករដ្ឋមន្ត្រី និងសុំពិភាក្សាផ្ទាល់ជាមួយមន្រ្តី ក្រសួងរៀបចំដែនដី នគររូបនីយកម្ម និងសំណង់ នៅព្រឹកថ្ងៃចន្ទនេះ។
តំណាងពលរដ្ឋ លោក ចាន់ សុផល ថ្លែងថា តំណាងពលរដ្ឋ ២០នាក់ ត្រូវបានចូលជួប និងរៀបរាប់ពីសាវតានៃជម្លោះដីនោះ ហើយមន្រ្តីជំនាញរបស់ក្រសួងនេះ បានសន្យាថា នឹងចាត់វិធានឲ្យអាជ្ញាធរស្រុក និងខេត្ត ពិនិត្យឡើងវិញលើបញ្ហានេះ មុននឹងចាត់ឲ្យគណៈកម្មការជាតិ ចុះទៅពិនិត្យផ្ទាល់។ ប៉ុន្តែ លោកថា នេះគ្រាន់តែជាការសន្យាចោលតែប៉ុណ្ណោះ ៖ "ខាងក្រសួងគាត់សន្យាថា ចុះទៅជួយពិនិត្យមើលផ្ទាល់ដីនោះ ហើយគាត់នឹងមានវិធានការយ៉ាងម៉េច យ៉ាងម៉ា ឬក៏ចំាមើលខាងថ្នាក់ស្រុក ថ្នាក់ខេត្តគេដោះស្រាយ ក៏ប៉ុន្តែចំពោះពួកខ្ញុំវិញ វាអត់មានក្តីសង្ឃឹមទេ ចំពោះថ្នាក់ស្រុក ថ្នាក់ខេត្ត ពីព្រោះអីខ្ញុំធ្លាប់ពឹងពាក់គាត់ប៉ុន្មានដឹងហើយ"។
ស្តាប់សំឡេង៖
ពលរដ្ឋម្នាក់ទៀត ឈ្មោះ ណូរី ឲ្យដឹងថា ពួកគេជាង ១ពាន់គ្រួសារ ដែលមានជម្លោះដីធ្លីនេះ កំពុងជួបការខ្វះខាតខ្លាំង ដោយសារអត់ដីធ្វើស្រែចម្ការគ្រប់គ្រាន់ ហើយពួកគេខ្លះ បានដើរស៊ីឈ្នួលដាំដំណាំតាមរដូវ និងខ្លះទៀត ចងការប្រាក់គេរកស៊ី ដោយបានមួយថ្ងៃខ្វះមួយថ្ងៃ ៖ "បើអស់ចម្ការហើយពិបាក ចិញ្ចឹមកូនវេទនា បើគេយកដីអស់ ប្រជាពលរដ្ឋអស់ ទំាងអស់គ្នាអត់ ខ្វះខាតទំាងអស់មិនដឹងធ្វើម៉េច បើតវ៉ាពីគេ គេអត់ឲ្យ កាប់ដំឡូងទៅ ជួនកាលខែត្រពំាង ជីកត្រពំាងព្រៃទៅ ខែត្រី រកត្រីទៅ បានគ្រាន់បានចិញ្ចឹមជីវិត មួយថ្ងៃៗរក រកមួយថ្ងៃរស់មួយថ្ងៃ អត់រស់មួយថ្ងៃអត់ទៅ កូនឈឺទៅអត់ទៅ មានប៉ារ៉ាលេបប៉ារ៉ាទៅ អត់មានអត់ ថាចែកដី ចែកឲ្យវាគ្រាន់តែថា តែគាត់អត់ចែកឲ្យ"។
មន្រ្តីនាំពាក្យក្រសួងរៀបចំដែនដី នគររូបនីយកម្ម និងសំណង់ លោក ហុង សុជាតិខេមរ៉ូ បដិសេធឆ្លើយបំភ្លឺពីរឿងនេះ និងរុញឲ្យសួរទៅអគ្គនាយកសុរិយោដី និងភូមិសាស្រ្ត លោក សរ សុវណ្ណ តែលោកឆ្លើយថា មិនទាន់ដឹងច្បាស់ពីរឿងនេះឡើយ។
ប៉ុន្តែប្រធានខុទ្ទកាល័យសាលាខេត្តក្រចេះ លោក ខាន់ ចំណាន ឲ្យដឹងថា តាមស្ថានភាពជាក់ស្តែង ដីនៅតំបន់នោះមានអ្នកអាស្រ័យផលផ្សេង ម្ល៉ោះហើយមន្រ្តីថ្នាក់ខេត្ត បានសម្រេចផ្ទេរដីសម្បទានសង្គមកិច្ចនៅតំបន់ផ្សេងទៀត ក្នុងឃុំកំពង់ដំរី ឲ្យពលរដ្ឋទាំង ៩៩៨គ្រួសារនោះ ដោយមួយគ្រួសារបាន ៣ហិកតា ៖ "ដីនោះមិនបានបែងចែកជូនបងប្អូនទេ គឺគាត់ដោយសារមានគេអាស្រ័យផលនៅក្នុងហ្នឹង ការវាស់វែងកន្លងមក គឺក្រុមការងារបានវាស់ឲ្យអ្នកអាស្រ័យផលជាក់ស្តែង អញ្ចឹងបងប្អូនប្រជាពលរដ្ឋ៩៩៨នេះ ថ្នាក់ខេត្តបានទេ ទៅតំបន់ដីសម្បទានសង្គមកិច្ចមួយទៀតនៅក្នុងឃុំ កំពង់ដំរី យោងតាមអនុសាសន៍សម្តេចនាយករដ្ឋមន្ត្រី តាមប្រព័ន្ធវីដេអូខនហ្វឺរ៉េន"។
ប្រជាពលរដ្ឋ ឲ្យដឹងថា ពួកគេបានបង្កបង្កើនផលលើដីចម្ការ ក្នុងឃុំដំរីផុង ឃុំខ្សាច់អណ្តែត ឃុំពង្រ និងឃុំព្រែកសាម៉ាន់ ស្រុកឆ្លូង តាំងពីឆ្នាំ២០០៧ តែក្រោយមក នៅឆ្នាំ២០១០ ក្រុមហ៊ុនកាសូទីម ដែលត្រូវគេស្គាល់ថា ជាកម្មសិទ្ធិរបស់ឧកញ្ញាម្នាក់ ឈ្មោះ ឃួន ភីរុណ នេះ បានធ្វើសកម្មភាពឈូសឆាយដីចម្ការពលរដ្ឋ តែអាជ្ញាធរមិនអាចរារាំងបានឡើយ។ យោងតាមរយៈអនុក្រឹត្យលេខ៥៤ ចុះថ្ងៃទី០៦ ខែមេសា ឆ្នាំ២០១២ ពលរដ្ឋអះអាងថា គណៈកម្មការសម្បទានសង្គមកិច្ចថ្នាក់ជាតិ បានសម្រេចផ្តល់ដីសម្បទានសង្គមកិច្ច ទំហំ ៣៦៧១ហិកតា ដល់ពួកគេកាន់កាប់ ស្នាក់នៅ និងបង្កបង្កើនផលស្របច្បាប់ កាលពីឆ្នាំ២០១២។ តែក្រុមហ៊ុនកាសូទីម នៅតែបន្តសកម្មភាពយកដីពលរដ្ឋ៕
No comments:
Post a Comment