ដោយ វិជ័យ អានន្ទ
2012-12-03
អ្នកភូមិបឹងកក់ នៅព្រឹកថ្ងៃ៣ ធ្នូ ដង្ហែក្បួនយកញត្តិទៅដាក់នៅទីស្ដីការគណៈរដ្ឋមន្ត្រី ដើម្បីសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ឲ្យដោះលែងសកម្មជនដីធ្លីចំនួនពីរនាក់ ដែលត្រូវតុលាការចាប់ខ្លួនដាក់គុក គឺអ្នកស្រី ទឹម សាក់មុន្នី និងអ្នកស្រី យ៉ោម បុប្ផា និងសុំឲ្យដោះស្រាយបញ្ហាដីធ្លីដែលនៅមិនទាន់ត្រូវបានសាលារាជធានីភ្នំពេញ ដោះស្រាយឲ្យបានត្រឹមត្រូវជូនពួកគាត់។
អ្នកបឹងកក់ អង្គុយសំពះអង្វរក្រុមសមត្ថកិច្ចឲ្យបើកផ្លូវដើម្បីពួកគេដង្ហែក្បួនចេញពីតំបន់បឹងកក់ នៅព្រឹកថ្ងៃទី៣ ធ្នូ ឆ្នាំ២០១២។
ស្របពេលដែលអ្នកភូមិបឹងកក់នាំគ្នាដង្ហែក្បួនបាតុកម្មនេះដែរ កងកម្លាំងសមត្ថកិច្ចជាច្រើនបានដាក់របាំងការពារមិនឲ្យអ្នកភូមិបឹងកក់ ចេញពីភូមិដើម្បីដង្ហែក្បួននេះបាននោះទេ។
អ្នកភូមិប្រមាណ ១០០នាក់ អ្នកខ្លះលុតជង្គង់សំពះសុំអង្វរកម្លាំងសមត្ថកិច្ចសុំឲ្យបើកផ្លូវឲ្យពួកគាត់។ រីឯអ្នកខ្លះទៀត បានឈរស្រែកតវ៉ា និងសម្ដែងការមិនពេញចិត្តចំពោះទង្វើរបស់អាជ្ញាធរនេះ។
សហគមន៍នៃភូមិបឹងកក់ ដែលមានជម្លោះដីធ្លីជាមួយក្រុមហ៊ុន ស៊ូកាគូ (Shukaku) និងសហគមន៍នៃភូមិថ្មគោល ដែលស្ថិតនៅជាប់លានយន្តហោះអន្តរជាតិ ភ្នំពេញ បាននាំគ្នាជម្នះការរារាំងរបស់កងកម្លាំងសមត្ថកិច្ច ដើម្បីហែក្បួនយកញត្តិពីភូមិបឹងកក់ ទៅដាក់នៅទីស្ដីការគណៈរដ្ឋមន្ត្រី ដើម្បីសុំកិច្ចអន្តរាគមន៍ពីលោកនាយករដ្ឋមន្ត្រី សុំឲ្យជួយដោះស្រាយបញ្ហាដីធ្លីជូនពួកគាត់។
បន្ទាប់ពីមានការដាក់របាំងរារាំងយ៉ាងតឹងរ៉ឹងពីសំណាក់កងកម្លាំងសមត្ថកិច្ច អ្នកភូមិបឹងកក់ បានបំបែកក្បួនលួចរត់ម្ដងមួយៗ ទៅជួបជុំគ្នាជាមួយសហគមន៍ភូមិថ្មគោលអង្គុយនៅខាងមុខវិមានសន្តិភាព។
អ្នកភូមិជាង ៥០ នាក់ បានអង្គុយបត់ជើងលើកដៃសំពះ និងស្រែកអំពាវនាវសុំឲ្យលោកនាយករដ្ឋមន្ត្រី ហ៊ុន សែន ទទួលយកញត្តិ និងជួយរកដំណោះស្រាយបញ្ហាដីធ្លីជូនពួកគាត់ ព្រមទាំងសុំឲ្យតុលាការដោះលែងសកម្មជនដីធ្លីចំនួន ២ នាក់ គឺអ្នកស្រី យ៉ោម បុប្ផា សកម្មជនដីធ្លីនៅតំបន់បឹងកក់ និងអ្នកស្រី ទឹម សាក់មុន្នី សកម្មជនតំបន់បូរីកីឡា។
តំណាងសហគមន៍មកពីតំបន់បឹងកក់ អ្នកស្រី ហេង មុំ មានប្រសាសន៍នៅថ្ងៃទី ៣ ធ្នូថា គោលបំណង ដែលអ្នកភូមិយកញត្តិមកដាក់នៅទីស្ដីការគណៈរដ្ឋមន្ត្រី គឺសុំឲ្យលោកនាយករដ្ឋមន្ត្រី ហ៊ុន សែន បញ្ចប់បញ្ហាជម្លោះដីធ្លីដ៏រ៉ាំរ៉ៃនៅភូមិបឹងកក់។ អ្នកស្រីថ្លែងបន្តថា ការនាំគ្នាយកញត្តិមកដាក់ជូនលោកនាយករដ្ឋមន្ត្រីនេះ គឺធ្វើឡើងបន្ទាប់ពីបានឮប្រសាសន៍ លោកនាយករដ្ឋមន្ត្រី ហ៊ុន សែន ដែលប្រកាសកាលពីថ្ងៃទី ២៦ វិច្ឆិកាថា លោកនឹងដោះស្រាយបញ្ហាជម្លោះដីធ្លីនៅទូទាំងប្រទេស។
អ្នកស្រី ហេង មុំ៖ «ក្នុងនាមខ្ញុំជាអ្នករងគ្រោះពិតប្រាកដ ខ្ញុំនឹងឈរនៅទីនេះ ដើម្បីថ្លែងពីទុក្ខសោករបស់ខ្ញុំដល់សម្ដេចនាយករដ្ឋមន្ត្រី ដែលជាអ្នកដឹកនាំដ៏ឈ្លាសវៃសម្រាប់ប្រជាពលរដ្ឋខ្ញុំទាំងអស់គ្នា ហើយខ្ញុំជឿជាក់ថា សម្ដេចមិនទុកឲ្យប្រជាពលរដ្ឋពួកខ្ញុំរងទុក្ខបន្តទៅមុខទៀតទេ គាត់នឹងដោះស្រាយនៅពេលគាត់បានឮ»។
កាលពីថ្ងៃទី ២៦ វិច្ឆិកា លោកនាយករដ្ឋមន្ត្រី ហ៊ុន សែន បានប្រកាសក្នុងពិធីសម្ពោធបើកការដ្ឋានសាងសង់ស្ពានអាកាសទី ៣ នៅសង្កាត់ទំនប់ទឹក ខណ្ឌចំការមនថា លោកនឹងសហការជាមួយនឹងអង្គការសង្គមស៊ីវិល និងអ្នកតំណាងរាស្ត្របក្សប្រឆាំងទាំងឡាយ ដែលប៉ងដោះស្រាយបញ្ហាដីធ្លីជូនពលរដ្ឋពិតប្រាកដ។
ទាក់ទងនឹងសកម្មភាពបាតុកម្មនេះ អ្នកភូមិបឹងកក់ប្រមាណជិត ១០០ នាក់ អ្នកខ្លះបាននាំគ្នាលុតជង្គង់សំពះកងកម្លាំងសមត្ថកិច្ច ដែលបានដាក់របាំងបិទផ្លូវ ហាមឃាត់ពួកគាត់នោះ សុំឲ្យបើកផ្លូវ។ ប៉ុន្តែ កងកម្លាំងសមត្ថកិច្ចទាំងនោះ ហាក់មិនអើពើទៅនឹងកាយវិការអង្វរកររបស់អ្នកភូមិនោះឡើយ។ យ៉ាងនេះក្ដី អ្នកភូមិបាននាំគ្នាបំបែកក្បួន និងលួចចេញម្ដងមួយៗ ទៅជួបប្រជុំគ្នាជាមួយអ្នកភូមិថ្មគោល នៅមុខវិមានសន្តិភាព ដែលមានចំនួនជាង ៥០នាក់។
ដោយឡែក ពាក់ព័ន្ធនឹងការដាក់ញត្តិរបស់សហគមន៍ទាំង ២ នេះ តំណាងសហគមន៍ចំនួន ៦ នាក់ ដែលបានចូលជួបទីប្រឹក្សាផ្ទាល់របស់លោកឧបនាយករដ្ឋមន្ត្រី សុខ អាន ចំនួន ២ នាក់ គឺលោក ប៊ុន អ៊ុយ និងលោក ជា វ៉ាន់ដេត ឲ្យដឹងថា មន្ត្រីទាំងពីរនាក់នោះ បានទទួលយកញត្តិសហគមន៍ទាំងពីររួចហើយ ដោយសន្យាថា ពួកគាត់នឹងព្យាយាមនាំយកញត្តិនោះ ទៅដល់ដៃលោកនាយករដ្ឋមន្ត្រី ហ៊ុន សែន។
ឆ្លើយតបនឹងការសន្យារបស់មន្ត្រីទាំងពីររូបនេះ តំណាងសហគមន៍អះអាងថា ពួកគាត់នឹងរង់ចាំមើលប្រសិទ្ធភាពនៃការប្ដេជ្ញារបស់មន្ត្រីរដ្ឋាភិបាលជាថ្មីម្ដងទៀត។ ប៉ុន្តែ អ្នកភូមិព្រមានថា ប្រសិនបើការដាក់ញត្តិលើកនេះ ត្រូវបានអូសបន្លាយពេលវេលាយូរ ហើយស្ងាត់មិនឃើញឆ្លើយតបដូចលើកមុនៗ ទៀត ពួកគាត់នឹងនាំគ្នាមកតវ៉ានៅមុខវិមានសន្តិភាពជារៀងរាល់ថ្ងៃ។
បញ្ហា ដែលនាំឲ្យសហគមន៍នាំគ្នាដើរតវ៉ានេះ ដោយសារតែអាជ្ញាធរមូលដ្ឋានពុំបានដោះស្រាយលើបញ្ហាដីធ្លីឲ្យបានត្រឹមត្រូវជូនពលរដ្ឋ។ កាលពីថ្ងៃទី ២៥ កក្កដា ឆ្នាំ ២០១២ អភិបាលខណ្ឌពោធិ៍សែនជ័យ បានចេញសេចក្ដីជូនដំណឹងមួយស្ដីពីការរុះរើផ្ទះរបស់អ្នកភូមិរាប់រយខ្នង ដោយឥតផ្ដល់សំណង ដែលស្ថិតនៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ដើម្បីពង្រីកព្រះលានយន្តហោះអន្តរជាតិភ្នំពេញ។ ចំណែក បញ្ហាជម្លោះដីធ្លីរបស់អ្នកភូមិ បឹងកក់ជាមួយក្រុមហ៊ុន ស៊ូកាគូ ដែលស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ កើតឡើងចាប់ពីឆ្នាំ ២០០៧ ដោយសារតែរដ្ឋាភិបាលបានផ្ដល់ដីនៅតំបន់នោះទៅឲ្យក្រុមហ៊ុនធ្វើការអភិវឌ្ឍ។ ការផ្ដល់ដីសម្បទានសេដ្ឋកិច្ចឲ្យក្រុមហ៊ុននេះ បានធ្វើឲ្យប៉ះពាល់ដល់ដី និងលំនៅឋានរបស់ពលរដ្ឋរាប់ពាន់គ្រួសារ៕
No comments:
Post a Comment