សមត្ថកិច្ច ឃាត់ខ្លួនសកម្មជនម្នាក់ និងគំរាមសកម្មជនម្នាក់ទៀត
ដោយ ជន ស្រីណុច និងស៊ុន ណារិន ថ្ងៃច័ន្ទ ទី10 ធ្នូ ឆ្នាំ2012 ម៉ោង13:59
ការរារាំងដាក់ញត្តិរបស់សហគមន៍ដីធ្លី ពីសំណាក់សមត្ថកិច្ចរាជធានីភ្នំពេញ (រូបថត តាត ឧត្តម)
មន្រ្តីពង្រឹងអំណាចខាងសិទ្ធិលំនៅដ្ឋាន លោក ណើប លី ដែលត្រូវបានឃាត់ខ្លួន ប្រាប់VODថា លោកបានថតសកម្មភាពផ្សេងៗសម្រាប់ទិវាសិទ្ធិមនុស្សនេះ ស្រាប់តែស្នងការរាជធានីភ្នំពេញ លោក ជួន សុវណ្ណ បញ្ជាឲ្យកម្លាំងសមត្ថកិច្ចចាប់ខ្លួនលោក ៖ "ខ្ញុំគិតថាវា ការបិទសិទ្ធិសេរីភាព បំភិតបំភ័យចំពោះអ្នកឃ្លាំមើលការរំលោភសិទ្ធិមនុស្ស ព្រោះអីខ្ញុំដូចជាបុគ្គលិកអង្គការផ្សេងៗទៀតដែរ ដែលចុះមើលការតវ៉ារបស់អ្នកស្រុក ជាធម្មតា ពេលអ្នកស្រុកចេញតវ៉ា ពួកខ្ញុំតែងតែចុះឃ្លាំមើលអី ក្រែងលោមានការរំលោភសិទ្ធិមនុស្សធ្ងន់ធ្ងរអី"។
ស្តាប់សំឡេង៖
នៅក្នុងព្រឹត្តការណ៍ព្រឹកមិញនេះផងដែរ មន្ត្រីសិទ្ធិលំនៅដ្ឋាន កញ្ញា ឡុង គឹមហ៊ាង រងការគំរាមពីសមត្ថកិច្ច។ កញ្ញា បន្តថា រាជរដ្ឋាភិបាលបានដាក់កម្លាំងសមត្ថកិច្ចជាច្រើន ដើម្បីចាត់ការប្រជាពលរដ្ឋទន់ខ្សោយ ៖ "ក្នុងនាមខ្ញុំជាមន្ត្រីអង្គការមិនមែនរដ្ឋាភិបាល ខ្ញុំធ្វើការងាររបស់ខ្ញុំតាមតួនាទី ដែលខ្ញុំធ្វើការឃ្លាំមើលទៅនឹងសកម្មភាពទាំងឡាយ ដែលប្រជាពលរដ្ឋគាត់ធ្វើ និងសកម្មភាពទាំងឡាយ ដែលប្រើប្រាស់ហិង្សា ឬក៏រំលោភបំពានដោយអាជ្ញាធរ ប៉ុន្តែត្រូវបានអាជ្ញាធរឬត្រូវបានប៉ូលិសដែលមានពាក់ស័ក្តិហ្នឹង គាត់បានមកគំរាមខ្ញុំ មិនឲ្យខ្ញុំថតដោយស្តីឲ្យខ្ញុំ ដោយគាត់ប្រើថា ចាំមើល ចាំទុក ខ្ញុំយល់ថា វាជាការគំរាមកំហែង និងជាការប្រមាថយ៉ាងធ្ងន់ធ្ងរ មកលើខ្ញុំ ក្នុងនាមខ្ញុំជាមន្ត្រីសង្គមស៊ីវិល ដែលធ្វើការងាររបស់ខ្លួន"។
តំណាងអ្នកភូមិបឹងកក់អ្នកស្រី ទេព វន្នី មានប្រសាសន៍នៅក្នុងពេលតវ៉ានោះថា ប្រទេសកម្ពុជាមិនបានកាន់លទ្ធិប្រជាធិបតេយ្យ ដែលអាជ្ញាធរតែងតែបង្រ្កាបប្រជាពលរដ្ឋស្លូតត្រង់ ៖ "ប្តឹងឲ្យប្រទេស បណ្តាពិភពលោកទាំងអស់ ដែលកាន់នូវលិទ្ធិប្រជាធិបតេយ្យពិតប្រាកដ និងគោរពសិទ្ធិមនុស្ស និងប្រជាពលរដ្ឋគ្រប់ប្រទេសទាំងអស់ មេត្តាជួយជំរុញដាច់ខាត ឲ្យបានចាត់វិធានការទៅលើប្រទេសកម្ពុជា ឲ្យមានការគោរពសិទ្ធិមនុស្ស និងលិទ្ធិប្រជាធិបតេយ្យ ចាប់ពីខួបលើកទី៦៤នេះតទៅ"។
គួរបញ្ជាក់ថា នៅព្រឹកថ្ងៃចន្ទ ទី១០ ខែធ្នូនេះ គឺជាទិវាសិទ្ធិមនុស្ស ១០ធ្នូ ខួបលើកទី៦៤។ ក្រុមស្ត្រីដែលជាសកម្មជនដីធ្លីមកពីសហគមន៍ផ្សេងៗគ្នា ធ្វើពិធីរាប់បាតនៅតំបន់បឹងកក់ បន្ទាប់មកពួកគេប្រមាណជា ១០០នាក់ បានដង្ហែញត្តិទៅដាក់នៅវិមានសន្តិភាពដើម្បីសុំឲ្យលោកនាយករដ្ឋមន្ត្រី ហ៊ុន សែន ដោះស្រាយរឿងដីធ្លី និងដោះលែងសកម្មជនដីធ្លីរបស់ពួកគេ តែត្រូវបានកម្លាំងសមត្ថកិច្ចដាក់កម្លាំងយ៉ាងតឹងតែងធ្វើឲ្យមានការប៉ះទង្គិចគ្នាសន្លប់ស្តី្រម្នាក់៕
No comments:
Post a Comment