សមត្ថកិច្ចរារាំងក្រុមសហគមន៍បឹងកក់មិនឲ្យយកញត្តិទៅដាក់នៅវិមានសន្តិភាព
ដោយ ទេព សុរ៉ាវី
2012-12-10
ក្រៅតែពីនិមន្តព្រះសង្ឃច្រើនអង្គមកសូត្រមន្តរំដោះគ្រោះ និងលើករាសី ក្រុមសហគមន៍បឹងកក់ប្រមាណជាង ១០០នាក់ ដែលប្រមូលផ្ដុំគ្នាប្រារព្ធទិវាសិទ្ធិមនុស្សអន្តរជាតិ បានដង្ហែក្បួនដាក់ញត្តិទៅវិមានសន្តិភាព ដើម្បីទាមទារឲ្យលោកនាយករដ្ឋមន្ត្រី ហ៊ុន សែន ជួយដោះស្រាយរឿងទំនាស់ដីធ្លីឲ្យពួកគេ។
១០-ធ្នូ-២០១២៖ សមត្ថកិច្ចរារាំងក្រុមសហគមន៍បឹងកក់ មិនឲ្យហែក្បួនទៅវិមានសន្តិភាព នៅក្បែរស្ថានីយរថភ្លើង។
ទោះជាយ៉ាងណា ក្បួនដង្ហែរបស់ក្រុមសហគមន៍ត្រូវបានសមត្ថកិច្ចចម្រុះជិត ៥០០នាក់ ដាក់បារាសគ្រប់ច្រកល្ហកជាច្រើនថ្នាក់ រារាំងដំណើរក្បួនដង្ហែនោះ រហូតមានការប៉ះទង្គិចគ្នាខ្លះ ដែលធ្វើឲ្យតំណាងស្ត្រីបឹងកក់ម្នាក់ដួលសន្លប់ និងត្រូវដឹកយកទៅសង្គ្រោះបន្ទាន់។
សមត្ថកិច្ចចម្រុះនៅរាជធានីភ្នំពេញ ដាក់កម្លាំងច្រើនរយនាក់ រារាំង និងបង្ក្រាបក្រុមបាតុករជាសហគមន៍បឹងកក់ មិនឲ្យយកញត្តិទៅដាក់នៅឯវិមានសន្តិភាព នៅក្នុងពិធីប្រារព្ធទិវាសិទ្ធិមនុស្សអន្តរជាតិ នៅថ្ងៃទី១០ ខែធ្នូ ឆ្នាំ២០១២។
អ្នកភូមិបឹងកក់ និងសហគមន៍ផ្សេងទៀតដែលមានទំនាស់ដីធ្លីប្រមាណជាង ១០០នាក់ ត្រូវបានកម្លាំងសមត្ថកិច្ចចម្រុះជាច្រើនរយនាក់ ដាក់បារាសរារាំងអ្នកបឹងកក់ នៅជិតវិហារចាម។ អ្នកភូមិបានដកថយ និងបង្វែរគេចទៅច្រកចេញមួយទៀត នៅជិតពេទ្យកាល់ម៉ែត ប៉ុន្តែត្រូវសមត្ថកិច្ចបន្តរារាំងដំណើរក្បួនរបស់ពួកគេដដែល។ ក្រុមសហគមន៍ខ្លះបានរត់គេចពីការដេញចាប់របស់សមត្ថកិច្ចសំដៅទៅមុខវិមានសន្តិភាព។
ទោះជាយ៉ាងណា មានតំណាងសហគមន៍ប្រមាណជាង ១០នាក់ប៉ុណ្ណោះ ដែលអាចធ្វើដំណើរទៅដល់មុខស្ថានីយរថភ្លើង ហើយពួកគេត្រូវបានសមត្ថកិច្ចប្រដាប់ដោយខែល និងដំបង ដាក់កម្លាំងរារាំងជាថ្មីម្ដង។
ម្ដងនេះសមត្ថកិច្ចជិត ១០០នាក់បានប្រើកម្លាំងបាយដោយរុញច្រានស្រ្តីៗជាតំណាងអ្នកបឹងកក់ នៅពេលដែលអ្នកបឹងកក់ រុលចូលបំបែកហ្វូងក្រុមសមត្ថកិច្ច។ សមត្ថកិច្ចបានវាយទៅលើតំណាងសហគមន៍ និងរុញច្រានរហូតឲ្យតំណាងសហគមន៍ម្នាក់ គឺអ្នកស្រី បូ ឆវី ដួលសន្លប់។ អ្នកស្រី បូ ឆវី ត្រូវបានក្រុមអង្គការសង្គមស៊ីវិលបញ្ជូនភ្លាមៗទៅមន្ទីរពេទ្យ។
អ្នកស្រី ទេព វន្នី តំណាងអ្នកភូមិបឹងកក់ ចាត់ទុកការបង្ក្រាបរបស់សមត្ថកិច្ចមកលើពលរដ្ឋសហគមន៍ ថាជាការឆ្លុះបញ្ចាំងថា ប្រទេសកម្ពុជា គ្មានការគោរពសិទ្ធិមនុស្ស និងលទ្ធិប្រជាធិបតេយ្យ។
ប្រធានផ្នែកកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា ដែលឃ្លាំមើលផ្ទាល់ចំពោះហេតុការណ៍នេះ សំដែងការសោកស្ដាយចំពោះការបំបិទសិទ្ធិសេរីភាពក្នុងការដង្ហែក្បួន និងជាការបង្ហាញថា ប្រទេសកម្ពុជា កំពុងដើរថយក្រោយពាក់ព័ន្ធនឹងសិទ្ធិមនុស្ស។
កញ្ញា ឡុង គឹមហៀង មន្ត្រីព័ត៌មាននៃក្រុមការងារពិសេសសិទ្ធិលំនៅឋាន ចាត់ទុកថា ទង្វើរបស់សមត្ថកិច្ចជាការមិនគោរពសិទ្ធិមនុស្ស លើសពីនោះបានធ្វើផ្គើនទៅនឹងសំណើរបស់សហគមន៍អន្តរជាតិ ស្ដីពីការរំលោភសិទ្ធិមនុស្សនៅកម្ពុជា។ មន្ត្រីឃ្លាំមើលរូបនេះ បន្ថែមថា រដ្ឋាភិបាលកំពុងបង្ហាញអំណាចមួយដែលបង្ហាញទៅពលរដ្ឋថា គ្មាននរណាម្នាក់អាចធ្វើអ្វីប៉ះពាល់ដល់គាត់បាន។
អធិការរងខណ្ឌដូនពេញ លោក ញ៉ែម សៅណុល មិនបានអត្ថាធិប្បាយច្រើនទេ ដោយបញ្ជាក់យ៉ាងខ្លីថា ការដាក់កម្លាំងរារាំងតំណាងសហគមន៍ ធ្វើឡើងតាមបទបញ្ជាពីថ្នាក់លើ។
ក្រុមសហគមន៍បឹងកក់ បានរំសាយក្រុមបាតុករនៅជិតស្ថានីយរថភ្លើង នៅវេលាម៉ោងជិត ១១ថ្ងៃត្រង់។ ប៉ុន្តែមុននឹងបំបែកហ្វូងបាតុករសមត្ថកិច្ចបានឃាត់ខ្លួនមន្ត្រីពង្រឹងអំណាចសហគមន៍នៃអង្គការសិទ្ធិលំនៅឋានម្នាក់ គឺលោក ណើប លី ទៅប៉ុស្តិ៍នគរបាលស្រះចក បន្ទាប់ពីលោក ណើប លី បានថតរូបលោក ជួន សុវណ្ណ ស្នងការនគរបាលរាជធានីភ្នំពេញ កំពុងជជែកជាមួយមន្ត្រីសង្គមស៊ីវិល។ ទោះជាយ៉ាងណា លោក ណើប លី ត្រូវបានដោះលែងវិញនៅបន្ទាប់ពីសមត្ថកិច្ចស្រះចក បានព្រមានថា មុននឹងថតរូបថ្នាក់ដឹកនាំត្រូវមានការអនុញ្ញាតជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
No comments:
Post a Comment