សន្តិសុខម្នាក់ត្រូវកោះហៅចូលសវនាការ រឿងបាញ់ ឈុត វុទ្ធី
- Thursday, 20 September 2012
- មាស សុខជា
ព្រះរាជ អាជ្ញារងខេត្តកោះកុង លោក ស្រី ម៉ាក់ នី បានប្រាប់កាសែតភ្នំពេញ ប៉ុស្តិ៍ កាលពីថ្ងៃម្សិលមិញថា លោក រ៉ាន បូរ៉ាត់ ជនជាប់ចោទ ពីបទសម្លាប់មន្រ្តីកងរាជអាវុធហត្ថ លោក អ៊ិន រតនា ត្រូវបានកោះហៅ ឲ្យចូលសវនាការនៅថ្ងៃទី ៤ ខែតុលា។ លោកស្រីម៉ាក់ នី បន្តថា លោក បូរ៉ាត់ ត្រូវបានចោទពីបទមនុស្សឃាតដោយអចេតនា។ លោក ស្រី ម៉ាក់ នី បញ្ជាក់ថា ក្រៅពីនោះ មានអ្នកពាក់ព័ន្ធផ្សេងទៀត ក៏ត្រូវបានកោះហៅជាសាក្សី នៅក្នុងសវនាការនោះដែរ។ លោក ស្រី ម៉ាក់នី ថ្លែងថា៖ «យើងបានកោះហៅនរណាដែលពាក់ព័ន្ធនៅក្នុងរឿងក្តីនេះ»។ ទោះជាយ៉ាងនេះក្តី ក៏លោក មិនបានបញ្ជាក់ពីចំនួនមនុស្សដែលពាក់ព័ន្ធដែលត្រូវបានកោះហៅ នោះទេ។
លោក លី កុសល មេធាវីតំណាងឲ្យលោក រ៉ាន បូរ៉ាត់ បានបញ្ជាក់កាលពីថ្ងៃម្សិលមិញថា លោក ត្រៀមបង្ហាញខ្លួននៅតុលាការ ដើម្បីការពារកូនក្តីរបស់លោក។ លោក អះអាងថា ដោយផ្អែកលើសកម្មភាពនៃការប្រព្រឹត្តដែលបានកើតឡើងនៅពេលនោះ លោក សង្ឃឹមថា លោក រ៉ាន បូរ៉ាត់ នឹងត្រូវគេកាត់ឲ្យរួចទោស ពីព្រោះគាត់ មិនបានបាញ់លោកអ៊ិន រតនាទេ។ លោក លី កុសល ថ្លែងថា៖ «កូនក្តីរបស់ខ្ញុំ គ្រាន់តែជាអ្នកឃាត់លោក អ៊ិន រតនា កុំឲ្យបន្តបាញ់អ្នកផ្សេងទៀតតែប៉ុណ្ណោះ។ ប្រសិនបើគាត់ មិនឃាត់លោក អ៊ិន រតនា នៅពេលនោះទេ អាចធ្វើឲ្យមនុស្សផ្សេងទៀតស្លាប់»។ មេធាវីរូបនេះ បានអះអាងទៀតថា ខណៈដែលលោក រ៉ាន បូរ៉ាត់ កំពុងឃាត់លោក អ៊ិន រតនា កៃកាំភ្លើង បានរាលផ្ទុះប្រមាណពីរ-បីគ្រាប់ធ្វើឲ្យលោក អ៊ិន រតនា ស្លាប់។ «ដូច្នេះខ្ញុំ គិតថា ការឃាត់នេះ គឺថា គាត់ មិនមានបំណងបាញ់លោក អ៊ិន រតនា និង លោក ឈុត វុទ្ធីទេ គាត់ ចង់ជួយមនុស្សទាំងអស់នៅក្នុងឧបទ្ទវហេតុនេះ»។
លោក ឈុត វុទ្ធី សកម្មជនការពារធនធានធម្មជាតិ ដែលតែងតែទទួលរងនូវការគំរាមកំហែងដល់អាយុជីវិតជាញឹកញាប់នោះ ត្រូវបានគេបាញ់សម្លាប់ កាលពីថ្ងៃទី ២៦ មេសា នៅឃុំប៉ាក់ខ្លង ស្រុកមណ្ឌលសីមា ខេត្តកោះកុង ខណៈដែលលោក បាននាំអ្នកកាសែត ទៅពិនិត្យមើល និងថតរូបពីសកម្មភាពកាប់បំផ្លាញព្រៃឈើ នៅក្នុងតំបន់ដែលត្រូវបានគេអះអាងថា ត្រូវបានកាន់កាប់ដោយក្រុមហ៊ុនTimber Green។
នៅក្រោយការបាញ់ សម្លាប់នោះភ្លាមៗ អង្គការសង្គមស៊ីវិលមួយក្រុម បានបើកធ្វើការស៊ើបអង្កេតហើយបានដាក់ការមន្ទិលសង្ស័យថា ទាំងលោកឈុត វុទ្ធី និងលោក អ៊ិន រតនា ដែលជាមន្ត្រីប៉េអឹម អាចត្រូវបានជនទី ៣ ធ្វើការបាញ់សម្លាប់បំបិទមាត់។ យ៉ាងណាក៏ដោយ មន្ត្រីសមត្ថកិច្ចដែលជាប់ពាក់ព័ន្ធ បានច្រានចោលការអះអាងនេះ៕
No comments:
Post a Comment