Free Mrs. Yorm Bopha! Apply the Rule of Laws!: សមត្ថកិច្ចខេត្តព្រះសីហនុកំទេចផ្ទះ ពលរដ្ឋជិត ១០០ខ្នងក្នុងពេលចុះអនុវត្តសាលក្រម

ដោយ ញឹម សុខន និង អ៊ឹង ប៊ុនថន ថ្ងៃអង្គារ ទី14 សីហា ឆ្នាំ2012 ម៉ោង17:54

យ៉ាងហោចណាស់ មានផ្ទះប្រជាពលរដ្ឋជិត ១០០ខ្នង នៅសង្កាត់លេខ១ ក្រុងព្រះសីហនុ ខេត្តព្រះសីហនុ ត្រូវបានវាយកំទេចចោល នៅពេលកម្លាំងសមត្ថកិច្ចចុះអនុវត្តសាលក្រមនៅថ្ងៃ អង្គារនេះ។

ប្រជាពលរដ្ឋនៅក្រុម១៦ ភូមិ៣ សង្កាត់លេខ១ បានឲ្យ VOD ដឹងនៅថ្ងៃអង្គារ ទី១៤ ខែសីហានេះថា មានកម្លាំងសមត្ថកិច្ចចំរុះរបស់ខេត្តនេះរាប់រយនាក់ ប្រដាប់ដោយអាវុធបានយកគ្រឿងចក្រមកឈូសកំទេចផ្ទះពួក គេអស់ជិត ១០០ខ្នង ដោយអត់មានផ្តល់សំណងទេ ហើយយកដីនោះប្រគល់ឲ្យមន្ត្រីម្នាក់នៅកំពង់ផែ លោក ច័ន្ទ កាំង ជាអ្នកឈ្នះក្តី ៖ “ឈូសអស់ហើយ ឈូសផ្ទះប្រជាជន ជិតមួយរយខ្នង ឈូសអស់ហើយទាំងតូចទាំងធំ ឈូសរលំដល់ដីអស់ហើយ ប្រហែលជាល្ងាចហ្នឹង គេបញ្ជាអោយយើងចេញ ហើយអត់ដឹងទៅដេកនៅឯណាទេ ប្រជាជន ថ្ងៃហ្នឹងមេឃភ្លៀងមេឃអីផង ពិបាកណាស់ ទោះបីស្រែកក៏ស្រែកមិនកើត ដេកយំក៏យំមិនកើត ធ្វើស្អីក៏ធ្វើមិនកើតដែរ គេអត់គិតពីសុវត្ថិភាពប្រជាជនទេ”។
VOD មិនអាចសុំអត្ថាធិប្បាយពី លោក ច័ន្ទ កាំង ភាគីឈ្នះក្តីបានទេនៅរសៀលថ្ងៃអង្គារនេះ។ ចំណែកព្រះរាជអាជ្ញាអមសាលាដំបូងខេត្តព្រះសីហនុ លោក ប៊ូ ប៊ុនហាង ក៏មិនធ្វើអត្ថាធិប្បាយដែរ ដោយរុញឲ្យទៅសួរចៅក្រម លិ សុខា ដែលមិនអាចទាក់ទងបាន។
មន្ត្រីសម្របសម្រួលរបស់សមាគមការពារសិទ្ធិមនុស្សអាដហុក ប្រចាំខេត្តព្រះសីហនុ លោកស្រី ជៀប សុធារី អះអាងថា ពិតជាមានកម្លាំងសមត្ថកិច្ចចុះអនុវត្តសាលក្រម ហើយបានវាយកំទេចផ្ទះពលរដ្ឋនៅតំបន់នោះមែន ប៉ុន្តែអ្នកស្រីមិនដឹងច្បាស់ពីចំនួនខូចខាតទេ ៖ “ទោះបីយ៉ាងណាក៏ដោយ យើងនៅតែសំណូមពរសុំអោយអាជ្ញាធរហ្នឹង ទុកដីអោយពួកគាត់ផង ឥឡូវហ្នឹងផ្ទះសម្បែងវាអស់ហើយ ហើយបើសិនជាថា ដីដែលថាដោះគោលនយោបាយ អោយពួកគាត់ហ្នឹង បែរជាមិនអោយគាត់វិញហ្នឹង គាត់វារឹតតែវឹកវរជាងហ្នឹងទៀត ឥឡូវហ្នឹងវាគ្រាន់តែអត់ផ្ទះនៅទេ ប៉ុន្តែបើវាអស់ដីទៀត មានអីទៀត ផ្ទះក៏អស់ ដីក៏អត់ មានលុយឯណាធ្វើ”។
មន្ត្រីអាដហុកដដែល បានឲ្យដឹងថា ទំនាស់ដីទំហំជាង ៥ហិកតានេះ បានអូសបន្លាយតាំងពីឆ្នាំ២០០៦ ហើយពលរដ្ឋធ្លាប់ប្តឹងទាស់ និងសាលក្រមនេះម្តងរួចមកហើយ ប៉ុន្តែលោកស្រីអះអាងថា ដោយពលរដ្ឋទាំងនោះមិនមានលុយបង់ពន្ធប្រថាប់ក្តី លើបណ្តឹងទាស់របស់ខ្លួន ទើបធ្វើឲ្យសាលក្រម ចូលជាស្ថាពរ៕