ផ្ទៃ ​ដីរាប់ម៉ឺនហិកតា​ថែម​​ទៀត​​ត្រូវ​បាន ​រដ្ឋាភិបាល​​ផ្ដល់​​ឲ្យ​​ក្រុម​​ហ៊ុន​ឯកជន​​បន្ទាប់​ពី​ប្រកាស​ផ្អាក

ដោយៈ សិលាពល

Wednesday 22 August 2012 - 7:16 am បើ​ទោះ​​បី​ជា​នាយករដ្ឋមន្ត្រី​ខ្មែរ ​បាន​ប្រកាស​​ដោយ​មាត់​ខ្លួន​​ឯង​​ពី​ការ​ផ្អាក​ជា​បណ្ដោះ​អាសន្ន​នូវការ​ ផ្ដល់​​ដី​​សម្បទាន​សេដ្ឋកិច្ច ​​​ដោយ​គ្មាន​​ពេល​កំណត់​ក្ដី ក៏​ជា​​បន្តបន្ទាប់​​គេ​រក​​ឃើញ​​ថា មាន​ផ្ទៃដី​​​រាប់​សែន​​ហិកតា​​ត្រូវ​បាន​​ផ្ដល់​​ទៅ​​ឲ្យ​​ក្រុម​ហ៊ុន ។ ហើយ​​គ្រាន់​​តែ​​នៅ​ក្នុង​ខែ​សី​ហា​នេះ មាន​ផ្ទៃដី​២៣១៨២ហិកតា​ ក្នុង​​ខេត្ត ​ព្រះ​វិហារ ត្រូវ​បាន​កាត់​ទៅ​​ឲ្យ​​ក្រុម​ហ៊ុន​​ចំនួន​​៣ ។​

ផ្ទៃដីព្រៃឈើ ដែលរដ្ឋាភិបាល ហ៊ុន សែន បាន ផ្ដល់ ទៅ ឲ្យ ក្រុម ហ៊ុន ឯកជន ក្រោម របស់ ដែល ហៅ ថា សម្បទាន សេដ្ឋកិច្ច

យោង​តាម​​សៀវ​ភៅ​រាជ​កិច្ច​​​ដែល​ចេញ​ផ្សាយ​​ដោយ​ទីស្ដីការ​ គណៈរដ្ឋមន្ត្រី ​កាល​ពី​ថ្ងៃ​ទី​​៨សីហា ឆ្នាំ ២០១២ ឲ្យ​​ដឹង​ថា​ នាយករដ្ឋមន្ត្រី ហ៊ុន សែន បាន​​ចុះ​ហត្ថលេខា​​ចំនួន​​៣​ដង​ ផ្ដល់​ដី ដែល​មាន​​ទី​តាំង​ស្ថិត​ក្នុង​ស្រុក​សង្គម​ថ្មី ស្រុក គូលែន និង ស្រុក ​រវៀង​ ក្នុង​ខេត្ត​ ព្រះវិហារ ទៅ​​ឲ្យ​​ក្រុម​​ហ៊ុន​​ចំនួន​៣ ដែល​ក្នុង​នោះ​​មាន ​៖ ក្រុមហ៊ុន Green Choice (Cambodia) Co,.Limited ទទួល​បាន​​ដីទំ​ហំ​៧៨៦៣ហិកតា​ , ក្រុម​​ហ៊ុន អេមិណិន​អ៊ីលីត (ខេមបូឌា)​ ខូអិលធីឌី ទទួល​បាន​ដីទំហំ​៧៣៥៩​ហិកតា​ និង ក្រុម​​ហ៊ុន​​ District Harvest (Cambodia ) Co,. Ltd ទទួល​បាន​​ទំហំ​​៧៩៦០​ហិកតា ។
​​​ការ​ធ្វើ​សម្បទាន​ដី​​សេដ្ឋកិច្ច ទៅ​ឲ្យ​​ក្រុម​​ហ៊ុន​​ឯកជន​នេះ ម្ដង​ហើយ​​ម្ដង​ទៀត​ ត្រូវ​​បាន​​​ក្រុម​អង្គការ​សង្គម​​ស៊ីវិល និង​ បក្ស​​ប្រឆាំង​​​បន្ទរ​​ការរិៈគន់​​យ៉ាង​ខ្លាំងក្លា អំពី​ភាព​ហន្តរាយ ព្រៃឈើ សត្វព្រៃ និង បង្ក​​ឲ្យ​មាន​ជម្លោះ​​ដី​ធ្លី​​​​ស្ទើរ​​តែ​ទូទាំង​ប្រទេស ៕