ឱម យ៉ិនទៀង​ ហៅ របាយការណ៏​​របស់ សូរិយា ស៊ូប៊ែឌី ថា ជា​ការ​បន្ទរ​​តាម​បក្ស​ប្រឆាំង​​និង សង្គម​ស៊ីវិល

មាស មុន្នី
August 29, 2012 - 10:06 am

ថ្លែង​​អំឡុង​ជូន​​ដំណើ​​នាយករដ្ឋមន្ត្រី​​ទៅ​​កាន់​ប្រទេស​អ៊ីរ៉ង់​ ​ឯ​ព្រលាន​​យន្តហោះ​​អន្តរជាតិ​ភ្នំពេញ​​កាល​ពីព្រឹកមិញ​ ប្រធាន​អង្គភាព​ប្រឆាំង​​អំពើពុក​រលួយ​​របស់កម្ពុជា​​ ​បាន​ហៅ​​របាយការណ៏​​របស់​​អ្នក​រាយការណ៏​ពិសេស​​នៃ​​អង្គការ​សហប្រជាជាតិ​ ថា ជា​ការ​បន្ទតាម​តាមសម្លេង​​​បក្សប្រឆាំង និង សង្គម​ស៊ីវិល ។

ឱម យ៉ិនទៀង ប្រធានគណៈកម្មាធិការ សិទ្ធិ មនុស្ស របស់ រដ្ឋា ភិបាល

លោក​ ឱម យ៉ិនទៀង​ បាន​​ថ្លែង​​ទៅ​កាន់ក្រុម​​អ្នកកាសែត​​ថា លោក សូរិយា ស៊ូ​ប៊ែរ​ឌី គ្រាន់​តែ​​និយាយ​តាម​អង្គការ​សង្គម​ស៊ីវិល​​មួយ​ចំនួន និង ​និយាយ​​តាម​​បក្សប្រឆាំង​​ប៉ុណ្ណោះ  ហើយ​បើ​យ៉ាង​នេះ គួរ​តែទៅ​ធ្វើ​ជា​ទីប្រឹក្សា​​របស់​គណ​​បក្សប្រឆាំង ល្អ​​ជាង​​ធ្វើ​ជា​​អ្នករាយការណ៍​ពិសេស​របស់​អង្គការ​សហប្រជាជាតិ​ ។
សេច​ក្ដី​ថ្លែង​បែប​​នេះ​​របស់​លោក ឱម យ៉ិនទៀង ដែល​ក៏​ធាន​ប្រធានគណៈកម្មាធិការសិទ្ធិមនុស្ស​របស់​​រដ្ឋាភិបាល​​ដែរ​​នោះ ​បាន​ធ្វើ​ឡើង​ភ្លាមៗ​​បន្ទាប់​កាល​ពី​​ថ្ងៃ​ទី​ ​២៧ ​សីហា​ របាយការណ៏​របស់​អ្នករាយការ​ពិសេស​ផ្នែក​សិទ្ធិ​មនុស្ស​​របស់​​​ អង្គការសហប្រជាជាតិ​ប្រចាំ​ប្រទេស​កម្ពុជា ត្រូវ​បាន​គេ​ផ្សព្វផ្សាយ​ជា​សាធារណៈ​ ។​ របាយការណ៏​​ដែល​លើក​ឡើង​​ពី​ស្ថានភាព រំលោភ​សិទ្ធិ​មនុស្ស​ និង​ សិទ្ធិលំនៅ​ដ្ឋាន ដ៏​អាក្រក់​​​ដែល​នៅ​​តែ​បន្ត​​ក្នុង​ប្រទេស​កម្ពុជា​ រួម​ទាំង​ការ​ធ្វើ​មិន​​ដឹង​​មិន​ឮ​​របស់​រដ្ឋាភិបាល​ ទៅ​នឹង​អនុសាសន៏​កែលម្អរ​នានា របស់​អង្គការ​សង្គម​ស៊ីវិល ៕​