ដោយ ញឹម សុខន និង អ៊ឹង ប៊ុនថន
ថ្ងៃសុក្រ ទី17 សីហា ឆ្នាំ2012 ម៉ោង14:08
កុមារៗនៅ
តំបន់បុរីកីឡាស្រែកយំននៀលលើថ្នល់ (រូបថត ញឹម សុខន)
កុមារតូចៗ របស់អតីតអ្នកភូមិបុរីកីឡា បានស្រែកយំបោកខ្លួនទៅថ្នល់កៅស៊ូ នៅព្រឹកថ្ងៃសុក្រនេះ ដោយខឹងសម្បារនឹងក្រុមហ៊ុនផានអ៊ីម៉ិច ដែលមិនទទួលស្គាល់ពួកគេជាជនរងគ្រោះពិតប្រាកដ ក្នុងជម្លោះដីធ្លីនៅតំបន់នោះ បន្ទាប់ពីមានការបណ្តេញទាំងបង្ខំ ដោយអត់ទាន់មានដំណោះស្រាយ។
កុមារតូចៗភាគច្រើនអាយុក្រោម១០ឆ្នាំ ប្រហែលជាង៣០នាក់នេះ គឺឪពុកម្តាយពួកគេកំពុងតាំងលំនៅឋានបណ្តោះអាសន្ន លើគំនរសំរាម ក្បែររបងដីក្រុមហ៊ុនផានអ៊ីម៉ិច ដើម្បីបន្តស្វែងរកយុត្តិធម៌តាមផ្លូវច្បាប់ ។
ស្ត្រីឈ្មោះ សេង គន្ធា អាយុ៣៤ឆ្នាំ ដែលស្ថិតនៅកន្លែងតវ៉ា បានថ្លែងថា អ្នកស្រីមានឯកសារទទួលស្គាល់ពីអាជ្ញាធរមូលដ្ឋាននៅតំបន់ បុរីកីឡានេះ ដូចពលរដ្ឋដទៃដែលកំពុងតវ៉ាដែរ។ ប៉ុន្តែអ្នកស្រីថា ក្រុមហ៊ុនផានអ៊ីម៉ិច មិនផ្តល់សំណងជាផ្ទះ ជូនពួកគាត់តាមកិច្ចសន្យានោះទេ តែហើយបែរជាចោទពួកគាត់ថា ជាមនុស្សខិលខូចទៅវិញ ៖”ខ្ញុំឈឺចាប់ណាស់ ខ្ញុំឈឺចាប់ដោយសារអី ដោយសារម៉ែរស់ដោយម៉ែកូនរស់ដោយកូន ព្រាត់ប្ដីរស់ដោយវេទនា រាល់ថ្ងៃខ្ញុំរស់ដោយវេទនា ឈឺចាប់បំផុតដោយសារអ្នកស្រី ស៊ុយ ស៊ីផាន។ ជនជាតិខ្មែរដូចគ្នាមិនគួរណាប្រើប្រាក់ប្រើអំណាច ធ្វើបាបពួកខ្ញុំ កំទេចផ្ទះពួកខ្ញុំចោល ដេញពួកខ្ញុំឲ្យទៅនៅខាងផ្សារទួលទំពូង ពួកខ្ញុំមិនអាចទទួលយកបានទេ” ។
ស្តាប់សម្លេង៖
VODមិនអាចសុំអត្ថាធិប្បាយពីប្រធានក្រុមហ៊ុនផានអ៊ីម៉ិច លោកស្រី ស៊ុយ សុផាន បានទេ ដោយអ្នកលើកទូរស័ព្ទអះអាងថា លោកស្រីចេញទៅក្រៅប្រទេស។ ប៉ុន្តែកន្លងមក ប្រធានក្រុមហ៊ុននេះ ធ្លាប់ឲ្យដឹងថា ក្រុមហ៊ុននៅមានផ្ទះច្រើនទៀត សម្រាប់ជូនពលរដ្ឋដែលមានឯកសារគ្រប់គ្រាន់ដោយ មិនបាច់សង់អាគារបន្ថែម។
សម្រាប់នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ ពន្យល់ថា ភាគីក្រុមហ៊ុន និងអាជ្ញាធរពាក់ព័ន្ធគួរចុះសិក្សាករណីនេះឡើងវិញ ដើម្បីស្វែងរកដំណោះស្រាយសមរម្យជូនពលរដ្ឋជាអ្នករង គ្រោះ ៖ ”បាទ! ខ្ញុំគិតថា រដ្ឋាភិបាលគួរសម្របសម្រួលបញ្ហាហ្នឹងឲ្យបានឆាប់រហ័ស កុំឲ្យទុកបន្តនៅរ៉ាំរ៉ៃអញ្ចឹង វាធ្វើឲ្យផលប៉ះពាល់ទៅលើស្ត្រីក៏ដូចជាកុមារ ជាពិសេសគាត់អត់មានពេលទៅរៀនសូត្រ អត់មានពេលរកប្រាក់ចំណូលអីសម្រាប់ទ្រទ្រង់សេដ្ឋកិច្ចគ្រួសារ” ។
សេចក្តីថ្លែងកាណ៍របស់អ្នកភូមិ បានឲ្យដឹងថា កាលពីថ្ងៃទី១០ ខែសីហា ប្រធានក្រុមហ៊ុនផានអ៊ីម៉ិច បានផ្តល់បទសម្ភាសន៍ជាមួយកាសែតក្នុងស្រុកមួយដោយចោទ ពួកគេចំនួន១១៧គ្រួសារ ដែលបន្តតវ៉ានៅគ្រប់ទីកន្លែងរហូតសព្វថ្ងៃនេះ ថាជាអ្នកអត់មានឯកសារគ្រប់គ្រាន់ សម្រាប់ទទួលបានសំណងពីក្រុមហ៊ុននោះទេ។ ប៉ុន្តែពលរដ្ឋនៅតំបន់នេះអះអាងថា ក្រុមហ៊ុនទៅវិញទេ ដែលមិនបានធ្វើអាគារជូនពួកគេចំនួន១០ខ្នង តាមកិច្ចសន្យា កាលពីឆ្នាំ២០០៤ ជាថ្នូរនឹងទទួលបានដីរបស់ពួកគេមួយចំនួននៅតំបន់នេះ ៕
No comments:
Post a Comment