(ថ្ងៃទី 18 មិថុនា 2012, ម៉ោង 11:27:AM) | ដោយ: រតនា
1 of 5
ក្រុមកុមារ ដែលមានម្ដាយជាស្ដ្រីកំពុងជាប់ពន្ធនាគារ រួមទាំងអ្នកភូមិបឹងកក់ប្រមាណជិត ១០០ នាក់ បានប្រមូលផ្ដុំគ្នានៅព្រះអង្គដងកើ កាលពីព្រឹកថ្ងៃទី១៨ ខែមិថុនា ឆ្នាំ២០១២ ពួកគេបានធ្វើពិធីបួងសួងជូនព្រះពរដល់សម្ដេចយាយ សុំឲ្យមានព្រះជន្មយឺនយូរ ព្រះរាជសុខភាពមាំមួន ជាមួយគ្នានោះ ក្រុមកុមារបានទទូច និងសុំឲ្យសម្ដេចយាយធ្វើព្រះរាជអន្តរាគមន៍ដោយក្ដីករុណាធម៌ ទៅស្ថាប័នតុលាការ ឲ្យមានការដោះលែងម្ដាយរបស់ពួកគេទាំង ១៣នាក់ ចេញពីពន្ធនាគារព្រៃស ពីព្រោះកុមារទាំងនោះបានបង្ហាញនូវភាពនឹករលឹក និងចង់រស់នៅក្រោមការថ្នាក់ថ្នមរបស់ម្ដាយពួកគេ ទោះជាមានជីវភាពក្រលំបាកយ៉ាងណាក៏ដោយ តែពួកគេចង់បានភាពកក់ក្ដៅជួបជុំគ្រួសារ។
កុមារី លី ហេងលាភ អាយុ ១៣ឆ្នាំ រៀននៅថ្នាក់ទី៧ នៃវិទ្យាល័យបាក់ទូក មានម្ដាយឈ្មោះ ពៅ សោភា ជាប់ពន្ធនាគារព្រៃស បានសុំឲ្យសម្ដេចយាយជួយធ្វើព្រះរាជអន្តរាគមន៍ទៅតុលាការ ដោះលែងស្ដ្រីបឹងកក់ទាំង ១៣នាក់ ចេញពីពន្ធនាគារ ដែលក្នុងនោះមានម្ដាយរបស់កុមារីរូបនេះម្នាក់ដែរ។ កុមារី ហេងលាភ បានបញ្ជាក់ទាំងទឹកភ្នែករលីងរលោងថា “ពួកខ្ញុំបង្ហោះប៉ោងប៉ោង និងលែងចាបនៅមុខវាំង ឲ្យវាហោះហើរមានសេរីភាព ដូចអ្នកទោសទាំង ១៣នាក់ នៅក្នុងពន្ធនាគារ ឲ្យរួចផុតមានសេរីភាពវិញ។ ខ្ញុំសុំឲ្យសម្ដេចយាយជួយអន្តរាគមន៍ដោះលែងស្ដ្រីបឹងកក់ ដែលកំពុងជាប់ពន្ធនាគារផង”។
កុមារី លី ហេងលាភ បានបញ្ជាក់ទៀតថា ដោយសារតែម្ដាយរបស់ខ្លួនជាប់ពន្ធនាគារជាច្រើនថ្ងៃមកនេះ ខ្លួនមិនបានទៅរៀនសូត្រជាប់លាប់ទេ ពីព្រោះម្ដាយមិននៅផ្ទះ (ជាប់ពន្ធនាគារ) ខ្លួនមើលប្អូននៅផ្ទះ។ ដោយក្ដីរន្ធត់ និងមានទឹកចិត្តនឹកម្ដាយខ្លាំងនោះ កុមារី លី ហេងលាភ បាននិយាយទាំងអួលដើមកថា “ខ្ញុំនឹកម៉ាក់ខ្ញុំ បារម្ភពីម៉ាក់ខ្ញុំ ខ្ញុំខ្លាចគេធ្វើបាបគាត់ ហើយខ្ញុំអាណិតប្អូនខ្ញុំ ដែលវាចេះតែយំរកម៉ាក់ខ្ញុំ ហើយខ្ញុំចេះតែប្រាប់វាថា ម៉ាក់ទៅក្រៅ គាត់មកវិញឥឡូវហើយ វាបាត់យំបន្តិច ខ្ញុំចេះតែលួងវា”។ កុមារីរូបនេះមានបងប្អូនបីនាក់ ដែលគេជាកូនទីពីរ ហើយឪពុកធ្វើការជាអ្នករាជការ មិនសូវមានពេលថែទាំពួកគេទេ។
កុមារា ណាន់ ទីវ័ន្ត ត្រូវជាក្មួយប្រុសអ្នកស្រី តុល ស្រីពៅ ដែលកំពុងជាប់ពន្ធនាគារ បាននិយាយទាំងអួលដើមកផងដែរថា “ប្អូនជីដូនមួយខ្ញុំ វាបាត់ម្ដាយ វាដេកយំរកម៉ែ អត់មាននរណាជួយមើលខុសត្រូវ។ ឥឡូវវាកើតជំងឺក្ដៅខ្លួនយ៉ាងខ្លាំង កម្តៅជាង ៤០ អង្សារ ឈឺជំងឺគ្រុនឈាមកាលពីយប់មិញ ឥឡូវវាដេកនៅពេទ្យ។ ខ្ញុំមានអារម្មណ៍ថាអាណិតប្អូន”។
កុមារា ណាន់ ទីវ័ន្ត បាននិយាយបន្តថា ខ្លួន រួមនឹងមិត្តភក្ដិ មកនេះដើម្បីលែងចាប និងបួងសួងសុំឲ្យសម្ដេចយាយមានព្រះជន្មយឺនយូរ ព្រះរាជសុខភាពមាំមួន ហើយពួកគេសុំសំណើទៅសម្ដេចយាយថា ឲ្យជួយអន្តរាគមន៍ដោះលែងស្ដ្រីបឹងកក់ ដែលកំពុងជាប់ពន្ធនាគារ ឲ្យពួកគាត់មានសេរីភាពវិញផង។ ទីវ័ន្តបានបញ្ជាក់ទៀតថា កូនចៅស្រីបឹងកក់ដែលកំពុងជាប់ពន្ធនាគារ មកដល់ពេលនេះ មានចំនួនជាង ១០នាក់ ហើយដែលធ្លាក់ខ្លួនឈឺ ដោយសារតែគ្មានម្ដាយជួយមើលបីបាច់ និងអ្នកខ្លះទៀតទៅរៀនសូត្រមិនបានទៀងទាត់ទេ ដោយនៅផ្ទះជួយមើលប្អូន។
អ្នកស្រី យ៉ោម បុប្ផា តំណាងអ្នកភូមិបឹងកក់ បាននិយាយថា ក្មេងៗបឹងកក់ បើទោះបីជាមានឪពុក និងអ្នកជិតខាងជួយមើលថែរក្សា ប៉ុន្តែទឹកចិត្តរបស់ពួកគេនៅតែស្រែកទាមទារម្ដាយពួកគេមកវិញ ដោយពួកគេយល់ថា ម្ដាយផ្ដល់ភាពកក់ក្ដៅក្នុងការបីបាច់ថែរក្សាពួកគេ។ អ្នកស្រីបន្តថា កុមារទាំងនេះមកជូនព្រះពរសម្ដេចយាយ និងសុំឲ្យសម្ដេចយាយជួយធ្វើព្រះរាជអន្តរាគមន៍ទៅតុលាការ ដោះលែងម្ដាយពួកគេមកវិញ។
អ្នកស្រីវេជ្ជបណ្ឌិត ពុង ឈីវកេក ប្រធានអង្គការសិទ្ធិមនុស្សលីកាដូ បានមានប្រសាសន៍ថា មានកុមារក្រោមអាយុ ១៨ឆ្នាំ ចំនួន ៤៣នាក់ ដែលជាកូនរបស់ស្ដ្រីបឹងកក់ទាំង ១៣នាក់ កំពុងជាប់ពន្ធនាគារព្រៃស ថ្ងៃនេះពួកគេបានទៅព្រះអង្គដងកើ បួងសួងបារមីស័ក្ដិសិទ្ធិ និងជូនពរថ្ងៃចម្រើនព្រះជន្មសម្ដេចយាយ។
រីឯមន្ត្រីស៊ើបអង្កេតជាន់ខ្ពស់អង្គការលីកាដូ បានឲ្យដឹងផងដែរថា កាលពីថ្ងៃសុក្រ ទី១៥ ខែមិថុនា ក្រុមស្ដ្រីបឹងកក់ដែលធ្វើកូដកម្មបង្អត់អាហារខ្លួនឯងនៅក្នុង ពន្ធនាគារ ពួកគាត់បានចាប់ផ្ដើមទទួលទានអាហារវិញហើយ បន្ទាប់ពីមានការដោះលែងពលរដ្ឋបឹងកក់ចំនួនពីរនាក់៕
No comments:
Post a Comment