ដោយ ថុល ស្រីលក្ខណ៍ និង អ៊ឹង ប៊ុនថន ថ្ងៃសុក្រ ទី08 មិថុនា ឆ្នាំ2012 ម៉ោង17:19
តំណាងពលរដ្ឋបឹងកក់ទាំង ១៥នាក់ ដែលកំពុងជាប់ពន្ធនាគារដោយសារជម្លោះដីធ្លី ព្រមានថា នឹងសម្លាប់ខ្លួន ប្រសិនបើតុលាការមិនដោះលែងពួកគាត់ឲ្យចេញពីគុក មុនពេលកំណត់ទេនោះ។
ការព្រមាននេះ កើតឡើងជាថ្មីទៀត នៅថ្ងៃសុក្រនេះ ខណៈសាច់ញាត្តិពួកគេចូលទៅសួរសុខទុក្ខ។
លោក ប៉ោ គុណ្ណារ៉ា ជាប្តីរបស់អ្នកស្រី តុល ស្រីពៅ ដែលកំពុងជាប់ឃុំនៅក្នុងពន្ធនាគារព្រៃស បានឲ្យ VOD ដឹងនៅរសៀលថ្ងៃសុក្រនេះថា ស្ថានភាពរបស់ពួកគេមិនសូវល្អនោះទេ ហើយថា ព្រមានសម្លាប់ខ្លួន ប្រសិនបើនៅតែមិនអាចស្វែងរកអន្តរាគមន៍ដោះលែងពួកគេ នៅពេលឆាប់ៗនេះ ៖ “គាត់ថា គាត់បើសិនជានេះ គាត់សុខចិត្តស្លាប់នៅក្នុងគុកហ្នឹង អត់អោយដល់កំណត់២ឆ្នាំកន្លះហ្នឹងទេ បើសិនជាពួកយើងមិនអាចធ្វើយ៉ាងណាៗ គាត់សុខចិត្តស្លាប់នៅក្នុងហ្នឹងតែម្តង”។
ស្តាប់សម្លេង៖
លោកបន្តថា ស្រ្តីវ័យចំណាស់ ២នាក់ ដែលជាប់ឃុំនោះ មានសុខភាពមិនល្អទេ គឺមានជំងឺលើសឈាម និងទឹកនោមផ្អែម។ តែថា អ្នកទាំងនោះស្ថិតក្នុងគុកបន្ទប់មានគ្នាតែ២ ឬ៣នាក់ប៉ុណ្ណោះ។
អ្នកស្រី ខែក ចាន់រស្មី ជាប្រជាពលរដ្ឋបឹងកក់ មានប្រសាសន៍ថា ពួកគាត់នឹងមិនទុកឲ្យតំណាងរបស់ពួកគាត់ស្លាប់នៅក្នុងគុកនោះ ។ ហើយថា ពួកគាត់ដាក់ញត្តិស្វែងរកអន្តរាគមន៍ពីគ្រប់ស្ថាប័ន ទាំងជាតិនិងអន្តរជាតិ ៖ “ពួកខាងក្រៅ គឺឆន្ទៈដូចគ្នាទាំងអស់ ពួកខ្ញុំមិនអាចអោយគ្នាខ្ញុំនៅក្នុងពន្ធនាគារ គាត់សម្រេចចិត្តធ្វើអត្តឃាតបែបហ្នឹងទេ ខ្ញុំមិនអាចចោលគ្នាបានទេ”។
នៅព្រឹកថ្ងៃសុក្រនេះ កូនៗអ្នកបឹងកក់ និងពលរដ្ឋបឹងកក់ រួមទាំងអ្នកបុរីកីឡាផងនោះ ប្រមាណជាង១០០នាក់ បានដង្ហែដាក់ញត្តិទៅព្រឹទ្ធសភា និងស្ថានទូតជប៉ុន ដើម្បីឲ្យជួយអន្តរាគមន៍ ដោះលែងពួកគេ១៥នាក់ចេញពីពន្ធនាគារព្រៃស បន្ទាប់ពីសុំអន្តរាគមន៍ពីស្ថាប័នកំពូលៗ និងស្ថាប័នព្រះមហាក្សត្រមិនមានទទួលយកញត្តិនោះ។ ប៉ុន្តែមន្រ្តីនៃស្ថាប័នព្រឹទ្ធសភា និងស្ថានទូតជប៉ុន បានសន្យាថា គេនឹងជួយអន្តរាគមន៍ជាបន្ទាន់ ទៅស្ថាប័នណាដែលអាចដោះស្រាយបញ្ហានេះ។
មន្រ្តីក្រសួងយុត្តិធម៌ ធ្លាប់បានអះអាងថា ក្រសួងបានចេញលិខិតអន្តរាគមន៍ទៅតុលាការរួចហើយ តែរហូតមកដល់ពេលនេះ នៅមិនទាន់់មានចំណាត់ការថ្មីនៅឡើយ។
ឆ្លើយតបករណីនេះ ចៅក្រមសាលាដំបូងរាជធានីភ្នំពេញ លោក ភូ ពៅស៊ុន មានប្រសាសន៍ថា សំណុំរឿងនេះត្រូវបានបញ្ជូនទៅឧទ្ធរណ៍រួចហើយ។
មេធាវីការពារក្តីឲ្យប្រជាពលរដ្ឋ លោក ជិន លីតា មានប្រសាសន៍ថា ប្រសិនបើរឿងក្តីនេះត្រូវបានបញ្ជូនទៅឧទ្ធរណ៍នោះ វាជារឿងល្អប្រសើរ ព្រោះវានឹងឆាប់បានកាត់ក្តីសារជាថ្មីព្រោះ សាលាដំបូង សម្រេចក្តីលឿនពេក និងមិនឲ្យមេធាវីការពារកូនក្តីរកភស្ថុតាងដោះបន្ទុកនោះទេ ៖ “បាទ តាមច្បាប់គឺសិទ្ធិរបស់ជនជាប់ចោទ មេធាវីគេអាចសុំពន្យាពេលបាន ប៉ុន្តែចៅក្រមគាត់អត់ព្រម អាហ្នឹងជាសិទ្ធិ និយាយរួមជាសិទ្ធិអំណាចរបស់គាត់ ក្នុងការសម្រេចមិនពន្យាពេល តែគ្រាន់តែថាគាត់អត់ស្តាប់ការលើកឡើងរបស់មេធាវី ហើយម្យ៉ាងទៀត យើងសុំបញ្ជូលសាក្សីពេលសវនាការហ្នឹង ក៏គាត់មិនអោយចូល”។
ស្ត្រីអ្នកបឹងកក់ចំនួន១៤នាក់ និងបុរសម្នាក់ ត្រូវតុលាការរាជធានីភ្នំពេញ កាត់ទោសឲ្យជាប់ពន្ធនាគារពី១ឆ្នាំដល់២ឆ្នាំ៦ខែ កាលពីថ្ងៃទី២៤ខែឧសភាឆ្នាំ២០១២កន្លងទៅ ពីបទដណ្តើមកាន់កាប់ដីនីតិបុគ្គលដោយខុសច្បាប់ និងជេប្រមាថមន្រ្តីសារធារណៈ ទាក់ទងជម្លោះដីនៅតំបន់បឹងកក់៕
អ្នកបឹងកក់ដែលកំពុងជាប់ពន្ធនាគារដោយជម្លោះដីធ្លីព្រមានសម្លាប់ខ្លួន
No comments:
Post a Comment