ភ្នំពេញ: បណ្ដាញសហគមន៍ សមាគមនានា ក្នុងប្រទេសកម្ពុជា នៅថ្ងៃទី៩ ខែឧសភា ឆ្នាំ២០១២ បានចេញសេចក្ដីថ្លែងការណ៍ គាំទ្រលើចំណាត់ការរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្ដីពី វិធានការពង្រឹង និងបង្កើន ប្រសិទ្ធភាព នៃការគ្រប់គ្រង់ដីសម្បទានសេដ្ឋកិច្ច។
នៅសេចក្ដីថ្លែងការណ៍ បានលើកឡើងថា "យើងខ្ញុំទាំងអស់គ្នា ជាប្រជាសហគមន៍នានក្នុងប្រទេសកម្ពុជា មានជនជាតិដើមភាគតិច និងមិនមែនជនជាតិដើមភាគតិចដែលរស់ពឹងផ្អែកទាំងស្រុង លើធនធានធម្មជាតិសម្រាប់ចិញ្ចឹមជីវិត"។
នៅក្នុង សេចក្ដីថ្លែងការណ៍បានលើកឡើងថា "យើងខ្ញុំមានការត្រេកអរ និងគាំទ្រយ៉ាងពេញទំហឹងចំពោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានចេញបទបញ្ជាលេខ០១ កាលពីថ្ងៃទី៧ ខែឧសភា ឆ្នាំ២០១២ ស្ដីពីវិធានការពង្រឹង និងបង្កើនប្រសិទ្ធភាព នៃការគ្រប់គ្រងដីសម្បទានសេដ្ឋកិច្ច។ យោងតាមខ្លឹមសារ នៃបញ្ជាលេខ០១ នេះ យើងខ្ញុំសូមកោតសរសើរនូវទឹកចិត្តរបស់សម្ដេច ដែលយកចិត្តទុកដាក់ខ្ពស់ពីទុក្ខកង្វល់របស់ប្រជាជនកម្ពុជា ដែលកំពុងតែរង់ចាំចំណាត់ការនេះជាយូរមកហើយ ព្រោះរយៈពេលចុងក្រោយនេះ យើងខ្ញុំដែលរស់នៅតំបន់សម្បទានដីសេដ្ឋកិច្ច សម្បទានរ៉ែ កំពុងជួបបញ្ហាលំបាកជាច្រើនដូចជា បាត់បង់ដីកសិកម្ម ដីលំនៅដ្ឋាន ផ្ទះសម្បែង និងតំបន់ព្រៃដែលធ្លាប់អាស្រ័យផល និងគោរពបូជាតាមជំនឿសាសនា។ យើងខ្ញុំជឿជាក់ថា បញ្ជាប្រកបដោយគតិបញ្ឌិតរបស់សម្ដេច នឹងត្រូវបានមន្ត្រីរដ្ឋាភិបាលគ្រប់លំដាប់ថ្នាក់ និងសម្បទានិក យកទៅអនុវត្តប្រកបដោយប្រសិទ្ធភាពខ្ពស់"។
សេចក្ដីថ្លែងការណ៍ បន្ថែមទៀតថា ទន្ទឹមនឹងនោះ យើងខ្ញុំសូមទទូចដល់ សម្ដេចនាយករដ្ឋមន្ត្រី នូវសំណូមពរមួយចំនួនដូចខាងក្រោម៖
១. បញ្ឈប់ការផ្ដល់ដីសម្បទាននានា ក្នុងតំបន់ព្រៃស្រោង ដែលប្រជាសហគមន៍កំពុងអាស្រ័យ ដូចជា នៅតំបន់ព្រៃឡង់ តំបន់ឱរ៉ាល់ សហគមន៍ព្រៃឈើ ដីសហគមន៍ជនជាតិដើមភាគតិច តំបន់ការពារដែនជំរកសត្វ ឧទ្យានជាតិ៘
២. ជំរុញឲ្យមន្ត្រីពាក់ព័ន្ធ និងម្ចាស់សម្បទាន ទាំងឡាយណាដែលបានរំលោភយកដីធ្លី និងព្រៃឈើដែលប្រជាពលរដ្ឋបានកាន់កាប់ និងប្រើប្រាស់ពីមុនមកឲ្យប្រជាពលរដ្ឋវិញ។
៣. ធ្វើការដកហូតអាជ្ញាប័ណ្ណរបស់ក្រុមហ៊ុនដីសម្បទានទាំងឡាយ ដែលមិនបានអនុវត្តទៅតាមនីតិវិធីច្បាប់ ជាពិសេក្នុងតំបន់ព្រៃស្រោងដែលប្រជាសហគមន៍កំពុងអាស្រ័យ ដូចជា នៅតំបន់ព្រៃឡង់ តំបន់ឱរ៉ាល់សហគមន៍ព្រៃឈើ តំបន់ការពារដែនជំរកសត្វ ឧទ្យានជាតិ ដីសហគមន៍ជនជាតិដើមភាគតិច៘
៤. ជំរុញឲ្យក្រសួងនានា និងអាជ្ញាធរគ្រប់លំដាប់ថ្នាក់គោរពតាមបទបញ្ជាលេខ០១នេះ។
៥. ស្ដារព្រៃឈើឡើងវិញនៅតំបន់ដែលត្រូវបានឈូសឆាយ និងកាប់បំផ្លាញពីសំណាក់ក្រុមហ៊ុន។
៦. លើកកម្ពស់ គាំទ្រ និងទទួលស្គាល់បណ្ដាញសហគមន៍ក្នុងការការពារព្រៃឈើ និងសហការជាមួយរដ្ឋាភិបាល។
៧. ផ្ដន្ទាទោសតាមច្បាប់ចំពោះក្រុមហ៊ុនទាំងឡាយណា ដែលរំលោភយកដីធ្លីប្រជាពលរដ្ឋ និងបានឈូសឆាយតំបន់ព្រៃស្រោង។
សូមជម្រាបថា បណ្ដាញសហគមន៍ សមាគម ដែលចូលរួមគាំទ្រ សេចក្ដីថ្លែងការណ៍ រួមមាន បណ្ដាញសហគមន៍ព្រៃឡង់, បណ្ដាញឱរ៉ាល់, បណ្ដាញកសាងសន្ដិភាពសហគមន៍, សម្ព័ន្ធសហគមន៍កសិករកម្ពុជា, សមាជិកសកម្មជនជាតិដើមភាគតិច, សមាគមកសិករដើម្បីសន្តិភាព និងអភិវឌ្ឍន៍, បណ្ដាញកសិករ និងធម្មជាតិ, បណ្ដាលភ្នំគុក, សហគមន៍ស្រុកគិរីសាគរ និងបុទុមសាគរ, បណ្ដាញសហគមន៍ភ្នំដងរ៉ែក, បណ្ដាញស្ករអំពៅស្អាតស្អំ, បណ្ដាញយុវជនកម្ពុជា, សមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធ, មិត្តព្រៃឈើ, សម្ព័ន្ធភាពស្ដ្រីបឹងកក់តស៊ូដើម្បីសិទ្ធិលំនៅដ្ឋាន, បណ្ដាញសកម្មភាពសហគមន៍ខេត្តព្រះវិហារ និងសមាគមការពារសិទ្ធិកម្មករចំណាកស្រុក និងសេដ្ឋកិច្ចក្រៅប្រព័ន្ធ នៃកម្ពុជា។
កាលពីថ្ងៃទី៧ឧសភា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានចុះហត្ថលេខាលើបទបញ្ជាមួយ ដោយសម្រេចផ្អាកការផ្តល់សម្បទានដីសេដ្ឋកិច្ច និងពិនិត្យដកហូតដីសម្បទាន ពីក្រុមហ៊ុនណា ដែលមិនអនុវត្តឲ្យបានត្រឹមត្រូវតាមកិច្ចសន្យា និងនីតិវិធីច្បាប់៕
No comments:
Post a Comment