ភ្នំពេញ: គណបក្សសិទ្ធិមនុស្ស កំពុងរៀបចំបណ្តាញនយោបាយរបបស់គណបក្ស អោយបានរឹងមាំ នៅថ្នាក់មូលដ្ឋានឃុំសង្កាត់ និងដើម្បីផ្សព្វផ្សាយ គោលនយោបាយគណបក្ស ទៅដល់អ្នកបោះឆ្នោត នៅតាមឃុំសង្កាត់ ក្នុងអំឡុងពេលយុទ្ធនាការឃោសនាបោះឆ្នោតក្រុមប្រឹក្សាឃុំ សង្កាត់ ដែលនឹងចូលមកដល់ ចាប់ពីថ្ងៃទី១៨ ឧសភា ដល់ថ្ងៃទី១ ខែមិថុនា ឆ្នាំ២០១២។
លោក កឹម សុខា ប្រធានគណបក្សសិទ្ធិមនុស្ស បានថ្លែងនៅថ្ងៃទី១៣ ខែឧសភា ឆ្នាំ២០១២ ក្នុងពេលលោកទៅចូលរួមជួបជុំសកម្មជនរបស់លោក នៅខេត្តកណ្តាលថា នៅក្នុងអំឡុងយុទ្ធនាការនោះ លោកដឹកនាំធ្វើយុទ្ធនាការទូទាំងប្រទេស ដល់ថ្នាក់មូលដ្ឋាន ផ្សព្វផ្សាយពីគោលនយោបាយគណបក្ស ដល់អ្នកបោះឆ្នោត។
លោកបានបង្ហាញនូវសកម្មភាពធ្វើយុទ្ធនាការ នៅតាមខេត្តរាជធានី ដែលលោកជាអ្នកដឹកនាំ ដូចជា នៅថ្ងៃទី១៨ ខែឧសភា ជាថ្ងៃបើកឆាកឃោសនាបោះឆ្នោតដំបូង គឺធ្វើនៅភ្នំពេញ។ នៅថ្ងៃទី១៩ ខែឧសភា ធ្វើយុទ្ធនាការនៅខេត្តកំពង់ចាម និងក្រុងសួង។ នៅថ្ងៃទី២០ ខែឧសភា ធ្វើយុទ្ធនាការនៅខេត្តកំពង់ធំ ព្រះវិហារ និងថ្ងៃទី២១ ខែឧសភា ធ្វើយុទ្ធនាការនៅខេត្តសៀមរាប និងថ្ងៃបន្តបន្ទាប់ខេត្តជុំវិញបឹងទន្លេសាប។
លោក កឹម សុខា បានបង្ហាញនូវពាក្យស្លោក សម្រាប់យុទ្ធនាការឃោសនា មានដូចជា កំណែទម្រង់រដ្ឋបាលសាធារណៈ ពាក្យស្លោក “ដូរមេឃុំ គណបក្ស មកជាមេឃុំ បម្រើខ្មែរ” “ដូរមេឃុំការពារថៅកែ ដាក់មេឃុំការពាររាស្ត្រ” និង“ដូរមេឃុំកុម្មុយនីស្ត ដាក់មេឃុំសិទ្ធិមនុស្ស”។
លោក កឹម សុខា បានរំពឹងទុកថា គណបក្សសិទ្ធិមនុស្ស នឹងទទួលបានអាសនៈក្រុមប្រឹក្សាឃុំសង្កាត់ តាមរយៈការបោះឆ្នោតនៅថ្ងៃទី៣ ខែមិថុនា ឆ្នាំ២០០១២ យ៉ាងតិច អាសនៈ ១ ភាគ ៣ នៃអាសនៈក្រុមប្រឹក្សាទូទាំងប្រទេស នៅអាណត្តិទី៣។
ជាមួយគ្នានោះ លោកក៏បានរំពឹងទុកថា គណបក្សសិទ្ធិមនុស្ស នឹងកើនសម្លេងសន្លឹកឆ្នោតពី ៣ អាសនៈ នៅពេលបច្ចុប្បន្ន ទៅដល់ ២៦ អាសនៈ ឬលើសនេះ សម្រាប់ការបោះឆ្នោតជ្រើសតាំងសមាជិកសភា នីតិកាលទី៥ នៅឆ្នាំ២០១៣។
នៅព្រឹកថ្ងៃទី១៣ ខែឧសភា ឆ្នាំ២០១២ គណបក្សសិទ្ធិមនុស្ស បានរៀបចំវេទិកាផ្សព្វផ្សាយពីគោលនយោបាយ ដែលមានតំណាងមកពី ៥ស្រុក ក្នុងខេត្តកណ្តាល។ ពិធីជួបជុំនោះ បានធ្វើឡើង នៅឃុំព្រែកលួង ស្រុកខ្សាច់កណ្តាល ខេត្តកណ្តាល ដោយមានការអនុញ្ញាតពីអាជ្ញាធរឃុំ និងគណៈកម្មការរៀបចំបោះឆ្នោតឃុំ ប៉ុន្តែបែរជាអនុប្រធានភូមិព្រែកលួង ឈ្មោះ ស៊ុម ធន បានចាក់មេក្រូរំខានវេទិកា ក្រោមលេស ធ្វើបុណ្យ។
តែទោះជា យ៉ាងណាក៏ដោយ វេទិការបស់គណបក្សសិទ្ធិមនុស្ស ដែលដឹកនាំដោយលោក កឹម សុខា នៅតែដំណើរការចប់ចុង ចប់ដើម នៅព្រឹកថ្ងៃអាទិត្យនេះ៕
លោក កឹម សុខា សង្ឃឹមថា ឈ្នះឆ្នោត ក្រុមប្រឹក្សាឃុំសង្កាត់ ១/៣ និង ២៦ អាសនៈ ក្នុងការបោះឆ្នោតជាតិ ឆ្នាំក្រោយ
No comments:
Post a Comment