ជីវិតនៅលើគំនរសំរាម នៅខេត្តព្រះសីហនុ
1
1
ប្រជាពលរដ្ឋក្រីក្រ កំពុងដណ្តើមគ្នាកាយគំនរសំរាម រកកម្ទេចអេតចាយ នៅគំនរសំរាម ខេត្តព្រះសីហនុ
1 of 3
ពេលទៅដល់ទីនោះ ក៏មានប្រជាពលរដ្ឋក្រីក្រកំពុងប្រកបរបររើសអេតចាយយ៉ាងពពាក់ពពូន ទាំងចាស់ទាំងក្មេង នៅកណ្តាលថ្ងៃ លាយឡំជាមួយក្លិនស្អុយ និងហ្វូងសត្វរុយគួរឲ្យខ្ពើមរអើម។
ស្ត្រីឈ្មោះ យាយ លន់ ជាអ្នករើសអេតចាយនៅលើគំនរសំរាមនោះ បាននិយាយរៀបរាប់ថា អ្នករស់នៅលើគំនរសំរាមនេះមានចំនួន ៣២ គ្រួសារ ក្នុងនោះក៏មានកូនចៅប្រុសស្រី ដែលជាកុមារា កុមារីច្រើននាក់ផងដែរ។ ពួកគេមិនបានទៅរៀនសូត្រនៅសាលានោះទេ ព្រោះតែ
កន្លែងស្នាក់នៅលើ ទីលានចាក់សំរាមនេះឆ្ងាយពីសាលា។ ម្យ៉ាងវិញក៏មានការខ្វះខាតពុំមានលទ្ធភាពនាំកូនទៅរៀនបានដែរ។
ចំណែកបុរសម្នាក់ទៀត បាននិយាយត្អូញត្អែរថា ជីវិតពួកគាត់អាស្រ័យរស់បានដោយសារគំនរសំរាមតែប៉ុណ្ណោះ ព្រោះពួកគាត់គ្មានដីធ្លីសម្រាប់ធ្វើស្រែចម្ការចិញ្ចឹមជីវិតនឹងគេទេ ។
បុរសនោះបានបញ្ជាក់ថា កាលពីមុន ទីលានចាក់សំរាមស្ថិតនៅជើងភ្នំ ក្នុងឃុំបត់ត្រង់ ស្រុកព្រៃនប់ កន្លែងនោះជិតសាលារៀនអាចឲ្យកូនចៅទៅរៀនបានមួយពេលៗដែរ ប៉ុន្តែកន្លែងនោះ នៅជិតតំបន់សេដ្ឋកិច្ចពិសេសពេក អាជ្ញាធរខេត្តព្រះសីហនុ បានប្តូរ ទីតាំងទីលានចាក់សំរាមថ្មី មកនៅតំបន់អូរកំបុត ជិតកន្លែងបញ្ជរបង់ប្រាក់ ក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុវិញ។
បុរសរូបនោះ បានបន្តថា ចាប់តាំងពីមានការប្តូទីតាំងថ្មីនេះមក កូនចៅរបស់គាត់និងអ្នករើសអេតចាយទាំងអស់គ្នា មិនបានទៅសាលារៀនទៀតទេ គឺខ្លះនៅផ្ទះមើលប្អូនតូច ខ្លះជួយរើសអេតចាយជាមួយឪពុកម្តាយនៅគំនរសំរាមនោះតែម្តង។
ក្រុមប្រឹក្សាសង្កាត់អូរឧកញ៉ាហេង ស្រុកព្រៃនប់ ខេត្តព្រះសីហនុ ម្នាក់បាននិយាយថា បងប្អូនអ្នករើសអេតចាយទាំងនោះ គាត់មានស្ថិតិនៅឯក្រុងព្រះសីហនុ និងអ្នកខ្លះទៀតពុំមានទីលំនៅពិតប្រាកដនោះទេ គឺពួកគាត់រស់នៅតាមគំនរសំរាម ពុំមានទីលំនៅពិតប្រាកដនោះទេ។ បងប្អូនទាំងនោះ ទោះបីអាជ្ញាធរខិតខំពន្យល់ដល់ពួកគាត់អំពីសុខមាលភាពកុមា ឬក៏ខ្លួនគាត់ផ្ទាល់យ៉ាងណា ក៏ពួកគាត់មិនយកចិត្តទុកដាក់ដែរ សូម្បីតែសព្វថ្ងៃនេះមានអង្គការក្រៅរដ្ឋាភិបាលមួយចំនួនបានចុះទៅដល់ កន្លែង ធ្វើការពន្យល់ ក៏នៅតែដដែលជាដដែល មិនអាចកែប្រែមុខរបរពួកគាត់បានទេ។
មន្ត្រីសិទ្ធិមនុស្ស អាដហុក ប្រចាំខេត្តព្រះសីហនុម្នាក់សុំមិនបញ្ចេញឈ្មោះ បាននិយាយថា បងប្អូនប្រជាពលរដ្ឋរស់នៅតាមគំនរសំរាមនោះ មើលទៅពិតជាវេទនាខ្លាំងណាស់ ដោយសារតែពួកគាត់មិនអាចទទួលបានសេវាសុខាភិបាល និងសេវាសាធារណៈអ្វីនោះទេ។ គឺពួកគាត់រស់នៅដោយមានការប្រមូលផ្តុំគ្នាជាក្រុមៗ។ បើនិយាយឲ្យត្រង់ទៅ ពួកគាត់មិនបានគិតគូរពីអនាគតកូនចៅរបស់គាត់ ដោយគិតតែពីចម្អែតក្រពះមួយពេលៗតែប៉ុណ្ណោះ។
ប្រភពដដែល បានបញ្ជាក់ថា កន្លងមកអង្គការអាដហុក ប្រចាំខេត្តព្រះសីហនុ ធ្លាប់បាននាំយកអំណោយតិចតួច និងថ្នាំសង្កូវទៅចែកជូនពួកគាត់ រួមនឹងមានការពន្យល់ណែនាំអំពីជីវិតនិងការរស់នៅប្រកបដោយសុខភាព និងសុភមង្គលច្រើនលើកច្រើនសាដែរ ប៉ុន្តែហាក់បីដូចជាគ្មានប្រសិទ្ធភាពសោះ។
តែទោះជាយ៉ាងណាក្តី អង្គកាអាដហុក ប្រចាំខេត្តព្រះសីហនុ នឹងព្យាយាមជួយពួកគាត់ផ្នែកស្មារតីជាបន្តទៀត។
ជាមួយគ្នានេះដែរ ក្រុមអ្នករើសអេតចាយនៅគំនរសំរាមខេត្តព្រះសីហនុ ក៏សូមអំពាវនាវដល់អង្គការក្រៅរដ្ឋាភិបាល ឬក៏អាជ្ញាធរដែនដី មេត្តាជួយពន្យល់ណែនាំ និងឧបត្ថម្ភដល់ពួកគាត់ ធ្វើយ៉ាងណាឲ្យកូនចៅរបស់ពួកគាត់បានចូលសាលាផង៕
No comments:
Post a Comment