លោក ឡេង ជីន អាយុ៥៨ នៅភូមិ២១ ក្នុងតំបន់បឹងកក់ ត្រូវបានកងសន្តិសុខខណ្ឌដូនពេញចាប់រឹតកសែងដាក់បញ្ទូលឡានកាលពីម្សិលមិញ។ រូបថត ជីវ័ន
ភ្នំពេញៈយ៉ាងហោចណាស់មានអ្នកភូមិបឹងកក់ប្រមាណជាង១០នាក់ បានរងរបួសធ្ងន់ និងស្រាល ដោយសារកងកម្លាំងសមត្ថកិច្ចរាជធានី បានធ្វើការវាយបង្ក្រាបទៅលើការតវ៉ារប៉េះរប៉ោះមួយ កាលពីម្សិលមិញ។
ការតវ៉ាកាលពីម្សិលមិញ គឺជាការតវ៉ា ដែលអ្នកភូមិបឹងកក់ តែងតែធ្វើឡើង អស់រយៈពេលជាង ៦ ឆ្នាំមកហើយ ខណៈដែលអាជ្ញាធររាជធានីនិងរដ្ឋាភិបាលបានព្រងើយកន្តើយមិនព្រមដោះស្រាយបញ្ហាដីធ្លីរបស់ពួកគេដែលត្រូវក្រុមហ៊ុនស៊ូកាគូអ៊ីន របស់លោក ឡាវ ម៉េងឃីន សមាជិកព្រឹទ្ធសភាគណបក្សប្រជាជនបានបូមខ្សាច់កប់ពន្លិច ដោយពុំទាន់បានផ្តល់សំណងនៅឡើយ។
ក្រុមភ្នាក់ងារសុខាភិបាល បានដឹកបុរសអ្នកភូមិបឹងកក់ វ័យ ៥៨ ឆ្នាំ ម្នាក់ ឈ្មោះ ឡេង ជិន តាមរថយន្តសាមុយទៅកាន់មន្ទីរពេទ្យកាល់ម៉ែត ខណៈអ្នកភូមិផ្សេងទៀត លោក លួស សាខន អ្នកស្រីញ៉ក់ សុផាន់ ង៉ែត ឃុន ខែក ចាន់រស្មី សែន ទូច ស្រី សុខឿន និងស្ត្រីមួយចំនួនទៀត ត្រូវបានគេដឹកតាមរ៉ឺម៉ក និងរថយន្តធម្មតា ទៅកាន់គ្លីនិកអង្គការសិទ្ធិមនុស្សលីកាដូ។ ការប៉ះទង្គិចគ្នានេះ បានកើតឡើងបន្ទាប់ពីក្រុមអ្នកភូមិបឹងកក់ បាននាំគ្នាដើរដង្ហែជាក្បួន ឆ្ពោះទៅកាន់ភូមិគ្រឹះលោកនាយករដ្ឋមន្ត្រីហ៊ុន សែន ដើម្បីដាក់ញតិ្តជាថ្មីទៀត ស្នើសុំលោកនាយករដ្ឋមន្ត្រីជួយអន្តរាគមន៍ ក្រោយពីពួកគាត់ខកចិត្ត ចំពោះការមិនអើពើ របស់ក្រសួងយុត្តិធម៌ ដែលមិនព្រមចេញមកផ្ដល់ព័ត៌មានដល់ពួកគាត់ ពាក់ព័ន្ធនឹងញតិ្តស្នើសុំពន្លឿនការដោះស្រាយ លើសំណុំរឿងរបស់អ្នកស្រីយ៉ោម បុប្ផាដែលកំពុងជាប់ឃុំនៅព្រៃស។
ក្រុម សមត្ថកិច្ចនគរបាល កងរាជអាវុធហត្ថ សន្ដិសុខ ព្រមទាំងក្រុមមន្ត្រីស៊ីវិល ប្រមាណជាង ២០០ នាក់ បានវាយបង្ក្រាបដោយហិង្សាទៅលើក្រុមអ្នកតវ៉ា ប្រមាណជា១០០ នាក់ ដែលភាគច្រើនជាស្ត្រី។ អំពើហិង្សានេះ បានផ្ដើមផ្ទុះឡើងនៅវេលាម៉ោងប្រមាណជាង១០ ព្រឹក ដែលពេលនោះស្ត្រីវ័យ ៤២ ឆ្នាំ ឈ្មោះ ញ៉ក់ សុផាត ត្រូវបានក្រុមសមត្ថកិច្ចសង្គ្រុបចាប់បោកបណ្តាលឲ្យបាក់ឆ្អឹងដើម ដៃ ធ្វើឲ្យក្រុមកូដករ មានការខឹងសម្បាកាន់តែខ្លាំង។
មុន ពេលត្រូវបានបញ្ជូនទៅកាន់មន្ទីរពេទ្យសម្ភពក្រុង អ្នកស្រី ញ៉ក់ សុផាន បានថ្លែងថា៖ «ក្រុមសន្តិសុខ និងរាជអាវុធហត្ថជាច្រើននាក់ បានរុញច្រាន និងចាប់ដៃរបស់ខ្ញុំ កាច់មួល ហើយគ្រវាត់ពេញមួយទំហឹង បណ្ដាលឲ្យខ្ញុំដួលផ្កាប់មុខ បាក់ដៃតែម្ដង»។
នៅពេលនោះ កញ្ញា សុង ស្រីលាភ អាយុ ២៧ ឆ្នាំ បាននិយាយខ្លាំងៗ តាមឧគ្ឃោសនសព្ទថា ក្រុមសមត្ថកិច្ច បានប្រើហិង្សាមកលើស្ត្រី ផ្ទុយពីអ្វីដែលប្រមុខរាជរដ្ឋាភិបាលបានជំរុញឲ្យមានការគោរពសិទ្ធិ និងលើកកម្ពស់ស្ត្រី។
កញ្ញាថ្លែងថា៖«បើមានដំណោះស្រាយ ប្រកបដោយភាពយុត្តិធម៌ នោះប្រាកដជាគ្មានការតវ៉ានោះទេ។ ភាពអយុត្តិធម៌ក្នុងសង្គម និងអំពើពុករលួយ និងការមិនអើពើដោះស្រាយ ទើបបានជាមានការតវ៉ាទាមទារយុត្តិធម៌»។
អំឡុងការរុញច្រាន គ្នានោះ អ្នកស្រី បូ ឆវី បានស្រែកបន្ទរដោយចោទប្រកាន់ទៅលើក្រុមសមត្ថកិច្ចថា បានចាប់«ឱបក្រៀក និងច្របាច់ដោះ»របស់អ្នកស្រី។
ក្រុមកូដករ ដែលខឹងសម្បា ចំពោះទង្វើអសីលធម៌នេះ បានដោះស្បែកជើងគប់ទៅលើសមត្ថកិច្ច និងជះទឹកសុទ្ធផងដែរ។ ក្រោមការស្រែកបញ្ជាពីលោក សុខ ពេញវុធ អភិបាលរងខណ្ឌដូនពេញ ក្រុមសមត្ថកិច្ច បានបង្កើនការរុញច្រានកាន់តែខ្លាំង នៅពេលនោះគេឃើញកម្លាំងបុរសនៃក្រុមអ្នកតវ៉ា បានជួយទប់ស្កាត់ និងប្រវាយប្រតប់រំដោះយកស្ត្រី ដែលត្រូវបានគេរុញដួលទៅលើដី ដើម្បីឲ្យគេចផុតពីការដើរជាន់ពីក្រុមសមត្ថកិច្ច។ លោក ពេញវុធ ស្រែកបញ្ជាខ្លាំងៗ ឲ្យក្រុមសមត្ថកិច្ច និងសន្តិសុខ ធ្វើការចាប់ខ្លួនក្រុមបុរសៗបឹងកក់ និងក្រុមស្ត្រីណា ដែលធ្វើការប្រវាយប្រតប់ជាមួយសមត្ថកិច្ច។ គ្រាន់តែឮពាក្យបញ្ជានេះ ក្រុមសន្តិសុខ និងកងរាជអាវុធហត្ថមួយចំនួនបានស្ទុះទៅវាយបង្ក្រាប ទៅលើក្រុមអ្នកតវ៉ាដោយគ្មានក្ដីមេត្តា។
អ្នកស្រី ង៉ែត ឃុន អាយុ ៧២ ឆ្នាំ ដែលធ្លាប់ត្រូវបានគេចាប់ដាក់ពន្ធនាគារមួយខែបីថ្ងៃ ជាមួយស្ត្រីបឹងកក់១២ នាក់ផ្សេងទៀត កាលពីឆ្នាំមុន ត្រូវបានកម្លាំងសន្តិសុខ ពី៥ទៅ៦នាក់ចាប់បោះបញ្ចូលឡានដឹកអ្នក ទោស ជាមួយអ្នកស្រី សែន ទូច។ ក្នុងគ្រានោះលោក ឡេង ជិន ដែលជាជនពិការជើង ត្រូវបានក្រុមសន្តិសុខវាយដំ និងទាត់ធាក់ ខណៈគាត់ព្យាយាមការពារនិងរំដោះ លោកលួស សាខន ពីការវាយដំ និងចាប់ខ្លួន។ លោក ឡេង ជិន ត្រូវបានក្រុមសន្តិសុខជាច្រើននាក់ ចាប់សែងដូចសត្វ និងបានបោះរុញចូលក្នុងរថយន្តដឹកអ្នកទោស ក្នុងគោលបំណងនាំយកទៅកាន់មន្ទីរឃុំឃាំងរបស់ស្នងការ ប៉ុន្តែ ត្រូវបានដោះលែងវិញភ្លាមៗបន្ទាប់ពីគាត់បានសន្លប់។
ប្រមាណ ជា ២០ នាទីក្រោយមក រថយន្តសាមុយរបស់ភ្នាក់ងារសង្គ្រោះបន្ទាន់នៃមន្ទីរពេទ្យកាល់ម៉ែត បានមកដល់និងបានដឹកគាត់ចេញទៅ ខណៈអ្នកស្រីង៉ែត ឃុន និងអ្នកស្រី សែន ទូច ត្រូវបានដោះលែង និងបញ្ជូនតាមរ៉ឺម៉ក ជាមួយលោក លួស សាខន ដែលរងការព្រួតវាយពីកម្លាំងសន្តិសុខជាង១០ នាក់រហូតដល់បាក់ធ្មេញមុខចំនួនបី និងរងរបួសជាំពេញរាងកាយ ព្រមទាំងថ្លោះគ្រេចជើងស្ដាំ ទៅកាន់គ្លីនិក អង្គការសិទ្ធិមនុស្សលីកាដូ។
អង្គការសិទ្ធិមនុស្សលីកាដូបានចេញសេចក្ដីប្រកាសព័ត៌មានមួយ ដោយថ្កោលទោសចំពោះអំពើហិង្សា ដែលបានកើតឡើងពីម្សិលមិញ និងបានទាមទារឲ្យមានការស៊ើបអង្កេតឲ្យបានពេញ លេញ ទៅលើករណីនេះ។
ក្រុម អង្គការសិទ្ធិមនុស្សមួយចំនួនទៀត ក៏បានរិះគន់ទៅលើអំពើហិង្សានេះផងដែរ។ លោក អៀង ប៊ុនធី តំណាងអង្គការសមធម៌កម្ពុជា បាននិយាយថា៖«ហេតុការណ៍នេះគឺជាហេតុការណ៍មួយក្នុងចំណោមហេតុការណ៍ជាច្រើននៃការបង្ក្រាបដោយ ហិង្សាទៅលើសហគមន៍ស្ត្រីបឹងកក់ ដែលយើងធ្លាប់បានជួបកាលពីមុន ហើយគ្រប់ពេលមិនត្រូវបានគេយកចិត្តទុកដាក់ទេ»។
លោក អ៊ី សារ៉ុម អ្នកសម្របសម្រួលកម្មវិធីសម្រាប់អង្គការសមាគមធាងត្នោត បាននិយាយថា៖«វាដល់ពេលដែលត្រូវធ្វើការដោះស្រាយបញ្ចប់នូវ ជម្លោះជូនដល់ប្រជាសហគមន៍ហើយ» ។
លោក សៀ ភារម្យ ប្រធានលេខាធិការដ្ឋាន នៃបេសកកម្មសិទ្ធិលំនៅដ្ឋាន បានថ្លែងថា ចំនួនកងសន្តិសុខដែលបានវាយប្រហារទៅលើអ្នកតវ៉ា បានបង្ហាញពីភាព «អនាធិបតេយ្យជាលក្ខណៈ ប្រព័ន្ធ»។ លោកបន្តថា៖«ពួកគេគ្មានសិទ្ធិធ្វើបែបនោះឡើយ។ មនុស្សគ្រប់គ្នាបានមើលឃើញពីសកម្មភាពរបស់ក្រុមសន្តិសុខ ប្រព្រឹត្តខ្លួនដូចជាជនពាល»។
លោក ឡុង ឌីម៉ង់ អ្នកនាំពាក្យសាលារាជធានី មិនអាចទាក់ទងសុំអធិប្បាយបានទេ៕
No comments:
Post a Comment