សហគមន៍មានជម្លោះដីបិទច្រកចូលក្រសួងយុត្តិធម៌ជំរុញឲ្យដោះលែងសកម្មជន
ដោយ ញឹម សុខន និងអៀត ដារ៉ាវុធ ថ្ងៃច័ន្ទ ទី18 កុម្ភៈ ឆ្នាំ2013 ម៉ោង11:51
ប្រជាសហគមន៍ដែលមានវិវាទដីធ្លីតវ៉ានៅមុខសាលាឧទ្ធរណ៍ទាមទារឲ្យដោះលែងអ្នកស្រី យ៉ោម បុប្ផា (រូបថត ញឹម សុខន)
ប្រជាសហគមន៍ដែលមានជម្លោះដីធ្លី នៅរាជធានីភ្នំពេញ ជិត ១០០នាក់ នៅថ្ងៃចន្ទនេះ បាននាំគ្នាអង្គុយបិទច្រកចេញចូល ក្រសួងយុត្តិធម៌ ជិតព្រះបរមរាជវាំង ដើម្បីជំរុញឲ្យស្ថាប័នពាក់ព័ន្ធដោះលែងសកម្មជនដីធ្លី គឺអ្នកស្រី យ៉ោម បុប្ផា ពីពន្ធនាគារ។
ការជំរុញនេះបានធ្វើឡើង បន្ទាប់ពីទណ្ឌិតជាង ៤០០នាក់ រួមទាំងបរទេសផង ត្រូវបានក្រសួងយុត្តិធម៌ដោះលែង និងលើកលែងទោស ក្នុងពិធីថ្វាយព្រះភ្លើងព្រះបរមរតនកោដ្ឋ សម្តេចសីហនុ នៅដើមខែកុម្ភៈនេះ។
ក្រុមអ្នកតវ៉ាទាំងនោះ មកពីសហគមន៍បឹងកក់ អតីតបុរីកីឡា ថ្មគោល។ ពួកគេមានកាន់ផ្កាឈូក ពាក់រូបសកម្មជនដីធ្លីនៅលើក្បាលគ្រប់ៗគ្នា និងលើកពុទ្ធរូប ស្រែកតាមឧបករណ៍បំពងសំឡេងបែរទៅរកក្រសួងយុត្តិធម៌ ដោយជំរុញឲ្យក្រសួងនេះ អន្តរាគមន៍ដោះលែងតំណាងពួកគេចេញពីពន្ធនាគារ។
ស្តាប់សំឡេង៖
ក្រុមអ្នកតវ៉ាអះអាងថា អ្នកស្រី យ៉ោម បុប្ផា សកម្មជនដីធ្លីនៅតំបន់បឹងកក់ គ្រាន់តែជាសកម្មជនដីធ្លី ដែលតស៊ូមតិដោយសន្តិវិធី ប្រឆាំងនឹងការបណ្តេញចេញតែប៉ុណ្ណោះមិនគួណាដាក់ទោសគាត់នោះទេ ៖ "ដោះលែងអ្នកស្រីយ៉ោម បុប្ផា ជាបន្ទាន់ គាត់គ្មានកំហុសទេ"។
តំណាងអ្នកភូមិអ្នកស្រី ទេព វន្នី អះអាង នៅកន្លែងតវ៉ាថា ការគ្មានវត្តមានសកម្មជនដីធ្លីនៅពេលលើកលែងទោស ជាភស្តុតាងមួយទៀតបង្ហាញថា ប្រព័ន្ធយុត្តិធម៌នៅកម្ពុជាមិនឯករាជ្យ ហើយមិនគោរពសិទ្ធិមនុស្ស និងសិទ្ធិរស់នៅរបស់ពលរដ្ឋ ដែលអ្នកស្រីថា ផ្ទុយនឹងអ្វីដែលរដ្ឋាភិបាល ធ្លាប់ផ្តល់សច្ចាប័នជាមួយអង្គការសហប្រជាជាតិស្តីពីលិទ្ធិប្រជាធិបតេយ្យ ៖ "អ្នកទោសដែលប្លន់ អ្នកទោសដែលសម្លាប់មនុស្ស អ្នកទោសដែលជួញគ្រឿងញៀន បែរជាមានឱកាស ក្រសួងយុត្តិធម៌ លើកលែងទោសនៅពេលបុណ្យបូជាសពសម្តេចឪ តែចំពោះអ្នកស្រី យ៉ោម បុប្ផា គឺអត់មាន គឺវាអយុត្តិធម៌បំផុត សម្រាប់ពួកខ្ញុំទាំងអស់គ្នាដែលជាប្រជាពលរដ្ឋរងគ្រោះ ជាពិសេសអយុត្តិធម៌បំផុត សម្រាប់អ្នកស្រី យ៉ោម បុប្ផា ហ្នឹងតែម្តង"។
អ្នកនាំពាក្យក្រសួងយុត្តិធម៌ លោក សំ ប្រជាមានិត មិនធ្វើអត្ថាធិប្បាយជុំវិញការលើកឡើងរបស់ក្រុមអ្នកតវ៉ាទេ ដោយអះអាងថា កំពុងជាប់រវល់។
អ្នកស្រី យ៉ោម បុប្ផា ត្រូវតុលាការកាត់ឲ្យជាប់ពន្ធនាគារ ៣ឆ្នាំ ពីបទប្រើហិង្សាដោយចេតនា។ មកដល់ពេលនេះ អ្នកស្រីជាប់ពន្ធនាគារជាង ៥ខែហើយ។
ការចោទប្រកាន់នេះ ត្រូវបានសហគមន៍ជាតិ និងអន្តរជាតិចាត់ទុកថា ជាការបំបាក់ស្មារតីសកម្មជនដីធ្លី និងបំបិទសេរីភាពបញ្ចេញមតិ និងអំពាវនាវឲ្យមានការដោះលែង។
របាយការអង្គការសង្គមស៊ីវិលចំនួនពីរ គឺអង្គការលីកាដូ និងអាដហុក ចេញផ្សាយនៅឆ្នាំ២០១៣នេះ បង្ហាញថា ជម្លោះដីធ្លីនៅឆ្នាំ២០១២នេះ ស្ថិតក្នុងស្ថានភាពធ្ងន់ធ្ងរ បើទោះបីរដ្ឋាភិបាល ធ្វើកំណែទម្រង់ដីធ្លីក៏ដោយ ។ របាយការណ៍បង្ហាញថា មានសកម្មជន ដីធ្លី ២៣២នាក់ ត្រូវចាប់ខ្លួន៣៨នាក់ កំពុងជាប់ពន្ធនាគារ និង ៥០នាក់កំពុងរត់គេចខ្លួន៕
No comments:
Post a Comment