ប្រធានសភាមិនទទួលយកញត្តិសុំដោះលែងសកម្មជនដីធ្លី-សិទ្ធិមនុស្ស
ដោយ ដែន អយុធ្យា
2012-12-17
សមាជិកសភាមកពីគណបក្សកាន់អំណាច បានគេចមិនទទួលយកញត្តិជាង ៥ម៉ឺនស្នាមមេដៃ ដែលពលរដ្ឋប្រជាជាតិអាស៊ាន និងប្រជាពលរដ្ឋខ្មែរដាក់ស្នើឲ្យជួយដោះលែងសកម្មជនដីធ្លី និងអ្នកការពារសិទ្ធិមនុស្សពីពន្ធនាគារ។
១៧-វិច្ឆិកា-២០១២៖ ពលរដ្ឋយកញត្តិមកដាក់ស្នើឲ្យជួយដោះលែងសកម្មជនដីធ្លី និងអ្នកការពារសិទ្ធិមនុស្សពីពន្ធនាគារនៅមុខរដ្ឋសភា នារាជធានីភ្នំពេញ។
ស្នាមមេដៃមានចុះហត្ថលេខា និងបដាផ្សេងៗ បានបញ្ជូនទៅដល់ពីមុខមន្ទីររដ្ឋសភា នៅព្រឹកថ្ងៃទី១៧ ខែធ្នូ ជាមួយហ្វូងមនុស្សជិត ៥០០នាក់។
ស្នាមមេដៃ ហត្ថលេខា និងលិខិតសម្ដែងពីកង្វល់របស់ប្រជាពលរដ្ឋខ្មែរជាង ១១.០០០នាក់ មកពី២៤ រាជធានីខេត្ត និងចំនួន ៤ម៉ឺនស្នាមមេដៃរបស់ពលរដ្ឋមកពីប្រទេសកូរ៉េខាងត្បូង អាល្លឺម៉ង់ បារាំង និងនូវែលហ្សេឡង់ ត្រូវបញ្ជូនដល់មុខមន្ទីររដ្ឋសភា ដើម្បីបង្ហាញថា ប្រជាពលរដ្ឋនៅតែតវ៉ាចង់បានយុត្តិធម៌ និងការដោះស្រាយលើបញ្ហាទំនាស់ដីធ្លី និងការរំលោភសិទ្ធិមនុស្សនានា ដែលនៅបន្តកើតមានក្នុងសង្គមកម្ពុជា។
លោក ស មូរ៉ា ជាប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា នៅព្រឹកថ្ងៃចន្ទ ទី១៧ ខែធ្នូ ឆ្នាំ២០១២ បានពេបជ្រាយចំពោះថ្នាក់ដឹកនាំរដ្ឋសភា លោក ហេង សំរិន និងសមាជិកសភាគណបក្សប្រជាជនកម្ពុជា ដែលមិនបានមកទទួលយកញត្តិពលរដ្ឋ។ លោកប្រៀបប្រដូចសកម្មភាពរបស់សមាជិកសភាកម្ពុជា ទៅនឹងសមាជិកសភាបរទេស ថាសមាជិកសភាកម្ពុជា មិនបានទទួលខុសត្រូវចំពោះតួនាទីរបស់ខ្លួនឲ្យស្របតាមច្បាប់ទេ។
លោកបន្តថា សហគមន៍ប្រជាពលរដ្ឋមកពី ២៤ រាជធានី ខេត្ត មិនបញ្ឈប់សកម្មភាពទាមទារសិទ្ធិរបស់ខ្លួនទេ ដរាបណារដ្ឋាភិបាល ឬរដ្ឋសភា មិនបញ្ឈប់សកម្មភាពបណ្ដេញពលរដ្ឋចេញពីលំនៅឋាន ឬដោះលែងសកម្មជនដីធ្លី និងអ្នកការពារសិទ្ធិមនុស្សពីពន្ធនាគារនោះទេ។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លោក វន ពៅ ដែលបានចូលរួមដឹកនាំប្រជាពលរដ្ឋជួបជុំគ្នាមុខរដ្ឋសភា បានឲ្យដឹងថា គោលបំណងនៃការដាក់ញត្តិ គឺទាមទារឲ្យថ្នាក់ដឹកនាំរដ្ឋសភាជួយជំរុញទៅរដ្ឋាភិបាល បញ្ឈប់សកម្មភាពបណ្ដេញពលរដ្ឋពីលំនៅឋានដោយគ្មានសំណងសមរម្យ។ ដោះលែងសកម្មជនដីធ្លី និងសិទ្ធិមនុស្សពីពន្ធនាគារ និងកែទម្រង់ប្រព័ន្ធតុលាការ។ លោកចាត់ទុកសកម្មភាពបណ្ដេញពលរដ្ឋចេញពីលំនៅឋានក្រោមរូបភាពយកដីអភិវឌ្ឍន៍ និងការប្រើប្រព័ន្ធតុលាការចាប់សកម្មជនដីធ្លី និងអ្នកការពារសិទ្ធិមនុស្សដាក់ពន្ធនាគារជាការរំលោភសិទ្ធិមនុស្សធ្ងន់ធ្ងរ។
ពិធីជួបជុំនៅមុខមន្ទីររដ្ឋសភា ព្រឹកថ្ងៃចន្ទ ទី១៧ ខែធ្នូ មានមនុស្សចូលរួមជិត ៥០០នាក់។ ពិធីនេះតំណាងសហគមន៍នានាក៏មានរាំ និងច្រៀងផ្សេងៗ ដែលនៅក្នុងអត្ថន័យនៃបទចម្រៀងនីមួយៗ បានបង្ហាញនូវក្ដីឈឺចាប់ដែលរដ្ឋាភិបាលបង្ខំបណ្ដេញពួកគេចេញពីលំនៅឋាន និងចាប់តំណាងដាក់ពន្ធនាគារជាដើម។
អ្នកស្រី ទេព វន្នី តំណាងសហគមន៍បឹងកក់ នៅក្នុងពិធីជួបជុំ បានចាត់ទុកសកម្មភាពរបស់សមាជិកសភាបក្សកាន់អំណាច និងប្រធានរដ្ឋសភា លោក ហេង សំរិន មិនបានគោរពកាតព្វកិច្ចរបស់ខ្លួនទេ។ អ្នកស្រីចាត់ទុកថា ស្ថាប័នរដ្ឋសភាសំរាប់បម្រើឲ្យបក្សពួកមួយក្ដាប់តូចរបស់ខ្លួន និងមិនបម្រើដល់ពលរដ្ឋនោះទេ។
អ្នកស្រី ទេព វន្នី បន្តថា សព្វថ្ងៃនេះមានសហគមន៍ជាច្រើនក្នុងរាជធានីភ្នំពេញ និងតាមខេត្ត រស់នៅគ្មានទីជម្រក បាត់បង់មុខរបរ ខ្វះចំណីអាហារ កុមារតូចៗបាត់បង់ការសិក្សា និងជួបបញ្ហាសុខភាព ដោយសារផែនការអភិវឌ្ឍន៍របស់រដ្ឋាភិបាល។
តំណាងសហគមន៍បុរីកីឡា កញ្ញា រុន សុផាត មើលឃើញថា ផែនការអភិវឌ្ឍន៍របស់រដ្ឋាភិបាលកន្លងមក មិនបានខ្វល់ពីទុក្ខលំបាករបស់ពលរដ្ឋទេ។ ពលរដ្ឋរូបនេះបានស្នើឲ្យរដ្ឋាភិបាលត្រូវបញ្ឈប់សកម្មភាពរំលោភសិទ្ធិពលរដ្ឋដោយការបណ្ដេញពលរដ្ឋពីលំនៅឋានទាំងបង្ខំ ដើម្បីយកដីអភិវឌ្ឍន៍ជាបន្ទាន់។
ត្រង់ចំណុចនេះ លោក អំ សំអាត មន្ត្រីស៊ើបអង្កេតអង្គការលីកាដូ ដែលតាមឃ្លាំមើលការដង្ហែញត្តិដាក់ជូនរដ្ឋសភា ក៏បានរិះគន់ផែនការអភិវឌ្ឍរបស់រដ្ឋាភិបាលនាំឲ្យប៉ះពាល់ដល់លំនៅឋានពលរដ្ឋ។ បន្ថែមលើសនេះ លោកបានចាត់ទុកសកម្មភាពរបស់ថ្នាក់ដឹកនាំរដ្ឋសភា ពិសេសសមាជិកសភាបក្សកាន់អំណាច ដែលមិនទទួលយកញត្តិពលរដ្ឋ បង្ហាញឲ្យឃើញពីភាពកម្សោយ និងការមិនទទួលខុសត្រូវរបស់ខ្លួន។
ទាក់ទិនបញ្ហានេះ លោក សុន ឆ័យ សមាជិកសភាគណបក្ស សម រង្ស៊ី ដែលបានចេញពីរដ្ឋសភាមកជួបតំណាងសហគមន៍ ក៏បានស្នើឲ្យប្រធានរដ្ឋសភា និងសមាជិកសភាបក្សកាន់អំណាច ត្រូវទទួលខុសត្រូវរកដំណោះស្រាយជូនពលរដ្ឋ។
ស្របពេលដែលមិនមានតំណាងរដ្ឋសភា ឬសមាជិកសភាបក្សកាន់អំណាចចេញជួបមុខ ឬមកទទួលយកញត្តិរបស់តំណាងសហគមន៍ទាំង ២៤ រាជធានី ខេត្ត នៅមុខរដ្ឋសភា ព្រឹកថ្ងៃទី១៧ ខែធ្នូ ឆ្នាំ២០១២។
លោក អ៊ូ ចន្ទឫទ្ធិ សមាជិកសភាគណបក្សសិទ្ធិមនុស្ស បានចេញមកទទួលយកញត្តិរបស់ពលរដ្ឋយកទៅរក្សាទុកក្នុងការិយាល័យរបស់លោក និងសន្យាថា នឹងបញ្ជូនញត្តិនេះជូនប្រធានរដ្ឋសភា លោក ហេង សំរិន នៅថ្ងៃខាងមុខ ប៉ុន្តែដំណោះស្រាយយ៉ាងណាលោកមិនធានាទេ គឺអាស្រ័យលើប្រធានសភា និងសមាជិកសភាបក្សកាន់អំណាចដោះស្រាយ។
ញត្តិរបស់សហគមន៍ទាំង ២៤ រាជធានី ខេត្ត និងពលរដ្ឋមកពីបណ្ដាប្រទេសអភិវឌ្ឍន៍ជាង ៥ម៉ឺនស្នាមមេដៃ មានខ្លឹមសារទទូចឲ្យលោក ហេង សំរិន ប្រធានរដ្ឋសភាជួយអន្តរាគមន៍ទៅប្រមុខរដ្ឋាភិបាលឲ្យគោរពសិទ្ធិមនុស្ស បញ្ឈប់សកម្មភាពបណ្ដេញពលរដ្ឋទាំងបង្ខំចេញពីដីធ្លី អនុវត្តលទ្ធិប្រជាធិបតេយ្យ កែទម្រង់ប្រព័ន្ធតុលាការ ស្នើវាស់ព្រំដីជាង ១២ហិកតារ និងផ្តល់ប័ណ្ណកម្មសិទ្ធិឲ្យបានឆាប់ ជំរុញឲ្យក្រុមហ៊ុនផានអ៊ីម៉ិច សង់អគារ ២បន្ថែមទៀតឲ្យគ្រប់ចំនួន ១០អគារ តាមកិច្ចសន្យាក្រុមហ៊ុន។
បន្ថែមលើនេះ ក៏បានទាមទារសុំឲ្យប្រធានរដ្ឋសភា ជួយជំរុញឲ្យមានការដោះលែងអ្នកស្រី យ៉ោម បុប្ជា អ្នកស្រី ទឹម សាក់មុន្នី ដោះលែងពលរដ្ឋសហគមន៍បឹងកក់ និងបុរីកីឡា ដោះលែងលោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យពីពន្ធនាគារ និងស្វែងរកមុខឃាតកពិតដែលបានសម្លាប់លោក ឈុត វុទ្ធី អតីតប្រធានអង្គការការពារធនធានធម្មជាតិយកមកផ្ដន្ទាទោស៕
No comments:
Post a Comment