Friday, 24 August 2012
- Gregory Pellechi
លោកស្រី Heyzer
ជួបជាមួយសហគ្រិនស្រ្តីកាលពីថ្ងៃពុធនៅរាជធានីភ្នំពេញ។ រូបថត ហុង មិនា
លោកស្រី Heyzer អគ្គលេខាធិការគណៈកម្មាធិការសេដ្ឋកិច្ចសង្គមប្រចាំតំបន់អាស៊ី ប៉ាស៊ីហ្វិក (ESCAP) បានជួបប្រជុំជាមួយលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងសមាជិកសមាគមសហគ្រិនស្រ្តីកម្ពុជា កាលពីថ្ងៃពុធ ដើម្បីពិភាក្សាពីការវិវត្ត របស់វិស័យឯកជន និងរដ្ឋាភិបាលដើម្បីលើកកម្ពស់តួនាទីរបស់ស្រ្តីក្នុងវិស័យ សេដ្ឋកិច្ច។
លោកស្រី Heyzer បានកោតសរសើរចំពោះការអភិវឌ្ឍនានា ដែលអង្គការ និងរដ្ឋាភិបាល បានអនុវត្តនាពេលកន្លងមក ដើម្បីលើកកម្ពស់ជីវភាពរបស់ស្រ្តីនៅកម្ពុជា តែលោកស្រីបានអំពាវនាវឲ្យមានសកម្មភាពបន្ថែមទៀត ដោយសារតែសហគមន៍សេដ្ឋកិច្ចអាស៊ាន ដែលនឹងត្រូវបង្កើតឡើងនៅក្នុងរយៈពេលដ៏ខ្លីខាងមុខនេះ នឹងត្រូវការការងារជាច្រើនដើម្បីធានាឲ្យកម្ពុជា នៅតែមានលទ្ធភាពប្រកួតប្រជែង។
លោកស្រី មានប្រសាសន៍បន្តថា៖ «ដំណើរការធ្វើសមាហរណកម្មទាំងមូលនឹងជួយបង្កើតហេដ្ឋារចនា សម្ព័ន្ធនេះឡើង។ ដូច្នេះ វាពិតជាហេដ្ឋារចនាសម្ព័ន្ធ ដែលគេចាត់ទុកថាជាផ្នែករឹងនៃការភ្ជាប់ទំនាក់ទំនង តែយើងក៏ចាំបាច់ត្រូវពិនិត្យមើលកម្មវិធីក្នុងការភ្ជាប់ទំនាក់ ទំនងផងដែរ»។
តួនាទីរបស់ស្ត្រីក្នុងនាមជាសហគ្រិន និងកិច្ចខិតខំប្រឹងប្រែងរបស់សមាគមសហគ្រិនស្រ្តីកម្ពុជា ក្នុងការបង្កើនឱកាសធ្វើការរួមគ្នា ដើម្បីផ្តល់ឱកាសដល់ស្រ្តី ប្រមូលកម្លាំងគ្នាអភិវឌ្ឍអាជីវកម្មរបស់ខ្លួន និងទទួលបានការបណ្តុះបណ្តាលដែលគេមើលឃើញថាជាកិច្ចខិតខំប្រឹង ប្រែងមួយក្នុងចំណោមកិច្ចខិតខំប្រឹងប្រែងសំខាន់ៗជាច្រើន ក្នុងការផ្តល់លទ្ធភាពដល់កម្ពុជា ត្រៀមខ្លួនសម្រាប់សហគមន៍សេដ្ឋកិច្ចអាស៊ានដោយធានាថា ពលរដ្ឋកម្ពុជាមានជំនាញចាំបាច់ដើម្បីធ្វើអាជីវកម្ម គឺមានសារៈសំខាន់ ដូចមានមធ្យោបាយធ្វើអាជីវកម្មដែរ។
លោកស្រី Heyzer ក៏បានសម្តែងក្តីបារម្ភផងដែរដោយបានលើកឡើងថា កម្ពុជា ចាំបាច់ត្រូវខិតខំពង្រឹងខ្លួនឯងបន្ថែមទៀត តាមរយៈការធ្វើពិពិធកម្ម៖ «ខ្ញុំយល់ថា អ្វីដែលសំខាន់បំផុតនោះគឺត្រូវក្រឡេកមើលថាតើសមាហរណកម្ម សេដ្ឋកិច្ច នឹងចាប់ផ្តើមកើតឡើងដោយរបៀបណា? អ្នកមានវិស័យផលិតកម្មទាំងមូល ដែលបានផ្តោតលើការផលិតសម្លៀកបំពាក់ តែទន្ទឹមនឹងនោះដែរ អ្នកក៏ចាំបាច់ត្រូវធ្វើពិពិធកម្មសេដ្ឋកិច្ចទាំងមូលផងដែរ»។ លោកស្រី បានបន្តថា វិស័យទេសចរណ៍ គឺជាវិស័យសំខាន់មួយទៀតនៅកម្ពុជា ដូច្នេះ ការផ្តល់សេវាកម្មជាច្រើននៅក្នុងវិស័យទេសចរណ៍ក៏នឹងក្លាយជា កត្តាសំខាន់ផងដែរ។
រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ថាផាវី បានមានប្រសាសន៍ថា៖ «រាល់ការវិវត្តផ្នែកសេដ្ឋកិច្ចរបស់កម្ពុជា នឹងចុះខ្សោយ នៅពេលដែលយើងនៅតែមិនអាចទាញយកផលប្រយោជន៍ពីសក្តានុពលរបស់ ស្រ្តីរាប់ពាន់នាក់បាននោះ»។
ដំណើរទស្សនកិច្ចរបស់លោកស្រី Heyzer មកកម្ពុជា ត្រូវបានចាត់ទុកថាជាផ្នែកនៃការវិវត្តស្ថានភាពយេនឌ័រ ក្នុងការសម្រេចឲ្យបានគោលដៅអភិវឌ្ឍន៍សហស្សវត្ស៍៕BP
No comments:
Post a Comment