ប៉ូលិសនាំខ្លួនលោក ម៉ម សូណង់ដូ ទៅកាន់តុលាការភ្នំពេញ នាព្រឹកម៉ោង ១០ និង ២០ នាទី (រូបថតៈ ឆាយា)
1 of 4
លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានឃាត់ខ្លួនកាលពីព្រឹកថ្ងៃទី១៥ ខែកក្កដា ឆ្នាំ២០១២ ពាក់ព័ន្ធនឹងរឿងជម្លោះដីធ្លី នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។
នៅក្រៅរបងតុលាការភ្នំពេញ នាព្រឹកថ្ងៃទី១៦ ខែកក្កដានេះ ក្រុមសមាជិកសមាគមអ្នកប្រជាធិបតេយ្យប្រមាណ ៣០នាក់ រួមទាំងសកម្មជនសិទ្ធិមនុស្ស និងអ្នកកាសែត បានឈរត្រៀបត្រាដើម្បីឃ្លាំមើលករណីបញ្ជូនលោកម៉ម សូណង់ដូ ឡើងតុលាការ។
សមាជិកសមាគមអ្នកប្រជាធិបតេយ្យ នៅមុខតុលាការសាលាដំបូងរាជធានីភ្នំពេញ បានលើករូបថតលោក ម៉ម សូណង់ដូ និងស្រែកទាមទារឲ្យមានការដោះលែងលោក ម៉ម សូណង់ដូ។
សំណុំរឿង និងភស្ដុតាង ករណីលោកម៉មសូណង់ដូ ត្រូវបានផ្ទេរពីខេត្តក្រចេះ មកតុលាការសាលាដំបូងរាជធានីភ្នំពេញ ដោយសារសំណុំរឿងមានភាពស្មុគស្មាញ និងជាករណីពិសេស។
ភរិយាលោក ម៉ម សូណង់ដូ លោកស្រី ឌិន ផាណារ៉ា បានឲ្យដឹងថា នៅពេលនេះ លោកស្រី និងមេធាវីកំពុងរង់ចាំស្ដាប់ដំណឹងតាមរយៈការឆ្លើយបំភ្លឺរបស់លោកម៉ម សូណង់ដូ ដោយនៅមិនទាន់អាចសន្និដ្ឋានបាននៅឡើយទេ គ្រាន់តែយើងដឹងថា លោក ម៉ម សូណង់ដូ ដែលត្រូវអាជ្ញាធរចោទប្រកាន់នោះ មិនមានប្រព្រឹត្តអ្វីខុស ហើយសង្ឃឹមថាតុលាការនឹងផ្ដល់ភាពយុត្តិធម៌ដល់លោក ម៉ម សូណង់ដូ។
លោកស្រី បញ្ជាក់ថា “បើតុលាការរកយុត្តិធម៌តាមផ្លូវច្បាប់ត្រឹមត្រូវ គឺថាអត់មានបញ្ហាអីទេ គឺត្រូវតែដោះលែងគាត់។ គាត់អត់មានជាប់ពាក់ពិនអីទាំងអស់”។
លោកស្រី ឌិន ផាណារ៉ា បានឲ្យដឹងថា ករណីឃាត់ខ្លួនលោក ម៉ម សូណង់ដូ លោកស្រីបានស្នើសុំការអន្តរាគមន៍ទៅស្ថានទូតបារាំងប្រចាំកម្ពុជា កាលពីម្សិល ប៉ុន្តែនៅពេលនេះមិនទាន់ដឹងថាយ៉ាងណានៅឡើយទេ។ រង់ចាំការឆ្លើយតបពីស្ថានទូតវិញ។ តែធម្មតាគេនឹងជួយយើង ពីព្រោះលោក ម៉ម សូណង់ដូ គាត់មានសញ្ជាតិបារាំងមួយទៀត។
លោកស្រីភរិយាលោក ម៉ម សូណង់ដូ ក៏បានស្វែងរកអន្តរាគមន៍ តាមរយៈអង្គការសង្គមស៊ីវិលជាតិ និងអន្តរជាតិ ព្រមទាំងគ្រប់ស្ថាប័នអន្តរជាតិ ដើម្បីដោះលែងលោក ម៉ម សូណង់ដូ ឲ្យមានសេរីភាព។
សូមរម្លឹកថា សមត្ថកិច្ចស្លៀកពាក់ស៊ីវិល និងឯកសណ្ឋានប៉ូលិស បានចូលដល់ក្នុងផ្ទះ ដែលជាស្ថានីយវិទ្យុសំបុកឃ្មុំ នៅភូមិត្នោតជ្រំ សង្កាត់បឹងទំពុន ខណ្ឌមានជ័យ រាជធានីភ្នំពេញ ដើម្បីនាំខ្លួនលោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ FM ១០៥ MHz នាព្រឹកម៉ោងជិត ៩ ថ្ងៃអាទិត្យ ទី១៥ ខែកក្កដា ឆ្នាំ២០១២។
ដីការបស់ចៅក្រមស៊ើបសួររបស់តុលាការខេត្តក្រចេះ លោក ចុក ងួន ចុះថ្ងៃទី២កក្កដា ឆ្នាំ២០១២ បានបង្ហាញថា លោក ម៉ម សូណង់ដូ ត្រូវបានចោទប្រកាន់ ពាក់ព័ន្ធនឹងបទល្មើសព្រហ្មទណ្ឌ ក្នុងករណីជម្លោះដីនៅខេត្តក្រចេះ។
តាមដីកា លោក ម៉ម សូណង់ដូ ត្រូវបានចោទប្រកាន់ ជាអ្នកផ្តួមផ្តើមគំនិតប្រឆាំងអ្នករាជការសាធារណៈ ធ្វើកុបកម្ម ជ្រៀតជ្រែកខុសច្បាប់នៅក្នុងការបំពេញមុខងារសាធារណៈ របស់អាជ្ញាធរ និងញុះញង់ឲ្យប្រជាពលរដ្ឋកាន់អាវុធខុសច្បាប់ ដែលមានកំណត់ក្នុងមាត្រា២៨, ៥០៤, ៤៥៦, ៤៥៧, ៥០៩ និងមាត្រា ៤៦៤ នៃក្រមព្រហ្មទណ្ឌ។
ដីកាបង្ហាញថា បទល្មើសព្រហ្មទណ្ឌ ប្រឆាំងលោកម៉ម សូណង់ដូ ត្រូវផ្តន្ទាទោសពន្ធនាគារ ហើយចៅក្រមក៏មានតម្រុយដែលបង្ហាញពីពិរុទ្ធភាពគ្រប់គ្រាន់ប្រឆាំងនឹង លោក ម៉ម សូណង់ដូ។
កាលពីព្រឹកថ្ងៃអាទិត្យ សមត្ថកិច្ចបាននាំខ្លួនលោកម៉ម សូណង់ដូ ពីផ្ទះរបស់លោក ទៅអគ្គស្នងការដ្ឋាននគរបាលជាតិ ដើម្បីសាកសួរ៕
No comments:
Post a Comment