(ថ្ងៃទី 15 មិថុនា 2012, ម៉ោង 06:58:PM) | ដោយ: ឆាយា
ប្រជាពលរដ្ឋបឹងកក់ ដែលមានសំណាងដោះលែងឱ្យនៅក្រៅឃុំបណ្តោះអាសន្ន ទាំងពីរនាក់នោះ មានឈ្មោះ សៅ សារឿន ភេទប្រុស អាយុ ៦៤ឆ្នាំ និងឈ្មោះ លី ចាន់ណារី ភេទស្រី អាយុ ៣៦ឆ្នាំ
ប្រជាពលរដ្ឋបឹងកក់ ដែលមានសំណាងទាំងពីរនាក់នោះ មានឈ្មោះ សៅ សារឿន ភេទប្រុស អាយុ ៦៤ឆ្នាំ និងឈ្មោះ លី ចាន់ណារី ភេទស្រី អាយុ ៣៦ឆ្នាំ បានត្រូវសមត្ថកិច្ចប៉ូលិសការិយាល័យព្រហ្មទណ្ឌកម្រិតស្រាលរាជធានី ភ្នំពេញ ឃាត់ខ្លួន កាលពីថ្ងៃទី២៤ ខែឧសភា ឆ្នាំ២០១២ នៅមុខសាលាដំបូងរាជធានីភ្នំពេញ ក្នុងខណៈពេល ដែលពួកគេ បានចូលរួមជាមួយប្រជាពលរដ្ឋបឹងកក់មួយចំនួនទៀត ដែលកំពុងទាមទារឱ្យតុលាការដោះលែងប្រជាពលរដ្ឋបឹងកក់ ១៣ នាក់ ឱ្យមានសេរីភាពវិញ។
គួររម្លឹកថា ស្ត្រីទាំង ១៣ នាក់ ដែលជាប្រជាពលរដ្ឋរស់នៅបឹងកក់ បានត្រូវសមត្ថកិច្ចប៉ូលិសការិយាល័យព្រហ្មទណ្ឌកម្រិតស្រាល រាជធានីភ្នំពេញ ឃាត់ខ្លួន កាលពីថ្ងៃទី២២ ខែឧសភា ឆ្នាំ២០១២ នៅចំណុចតំបន់អភិវឌ្ឍន៍បឹងកក់ ស្ថិតក្នុងភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ រួចបញ្ជូនមកការិយាល័យ ដើម្បីធ្វើការសាកសួរករណីរំលោភ ចូលកាន់កាប់ដីសាធារណៈរបស់រដ្ឋ។
ដើមចម ដែលនាំឱ្យមានការឃាត់ខ្លួននោះ បានកើតឡើងកាលពីព្រឹកថ្ងៃទី២២ ខែឧសភា ឆ្នាំ២០១២ មានប្រជាពលរដ្ឋប្រមាណ ១៥ នាក់ បាននាំគ្នាចូលមកកាន់កាប់ដីសាធារណៈ របស់រដ្ឋ ស្ថិតនៅតំបន់បឹងកក់ ដោយពួកគេបានប្រើប្រាស់សម្ភារៈមួយចំនួន មានដូចជា រណា ញញួរ ពូថៅ ដែកគោល ដែកគាស់ និងឈើ សម្រាប់សាងសង់ផ្ទះព្រមទាំងសំភារៈផ្សេងៗ មួយចំនួនទៀត។
ពេលប្រជាពលរដ្ឋ កំពុងធ្វើសកម្មភាពនេះ កម្លាំងគណៈកម្មការចម្រុះ បានចុះធ្វើការហាមឃាត់ និងបានណែនាំ ដោយសន្តិវិធីប្រយោជន៍ ដើម្បីឱ្យប្រជាពលរដ្ឋទាំងនេះ បញ្ឈប់សកម្មភាពនេះ។
ប៉ុន្តែពួកគេ នៅតែចចែសរឹងរូស ពុំព្រមបញ្ឈប់សកម្មភាពឡើយ ហើយថែមទាំងធ្វើការប្រឆាំងតបត មកលើកម្លាំងចម្រុះ ដោយមានការជេរប្រមាថ និងគប់ដំថ្ម បាចដីខ្សាច់ថែមទៀតផង។
នៅថ្ងៃទី២៥ ខែឧសភា ឆ្នាំ២០១២ សាលាដំបូងរាជធានីភ្នំពេញ បានបញ្ជូនសំណុំរឿងនេះ ទៅបើកសវនាការជំនុំជម្រះភ្លាម ដោយសម្រេចឱ្យ ៧ នាក់ ជាប់ពន្ធនាគារ ២ ឆ្នាំ ៦ខែ, ៥នាក់ ជាប់ពន្ធនាគាររយៈពេល ២ឆ្នាំ ៦ខែ តែអនុវត្តក្នុងពន្ធនាគាររយៈពេល ២ឆ្នាំ និងម្នាក់ទៀត ដែលជាស្ត្រីវ័យ ៧២ ឆ្នាំ ត្រូវជាប់ពន្ធនាគាររយៈពេល ២ ឆ្នាំ ៦ ខែ តែអនុវត្តក្នុងពន្ធនាគាររយៈពេល ១ឆ្នាំ។
ប៉ុន្តែពួកគេបានប្តឹង ឧទ្ធរណ៍ប្រឆាំងនឹងការសម្រេចនេះ។
ដោយឡែកប្រជាពលរដ្ឋបឹងកក់ ចំនួន២នាក់ មានឈ្មោះ សៅ សារឿន និងឈ្មោះ លី ចាន់ណារី បានត្រូវតុលាការសម្រេចឃុំខ្លួនបណ្តោះអាសន្ន។
អ្នកបឹងកក់ ចំនួន១៣នាក់ ដែលត្រូវឃុំខ្លួននៅពន្ធនាគារតាមអំណាចសាលក្រម មាន ឈ្មោះ ទេព វន្នី អាយុ ៣១ឆ្នាំ, ឈ្មោះ ហេង មុំ អាយុ ៤២ឆ្នាំ, ឈ្មោះ សួង សម័យ អាយុ ៥៤ឆ្នាំ, ឈ្មោះ ឆេង លៀប អាយុ ៥០ឆ្នាំ, ឈ្មោះ ថូ ដាវី អាយុ ២៥ឆ្នាំ, ឈ្មោះ បូវ សោភា អាយុ ៣៥ឆ្នាំ, ឈ្មោះ គង់ ចន្ថា អាយុ ៤៥ឆ្នាំ, ឈ្មោះ ងួន គឹមឡាង អាយុ ៥៥ឆ្នាំ, ឈ្មោះ សុង ស្រីលៀប អាយុ ២៥ឆ្នាំ, ឈ្មោះ ចាន់ ណាវី អាយុ ៥៧ឆ្នាំ, ឈ្មោះ ផាន់ ឈុនរ៉េត, ឈ្មោះ តុល ស្រីពៅ អាយុ ៣៦ឆ្នាំ និងឈ្មោះ ង៉ែត ឃុន អាយុ ៧២ឆ្នាំ៕
No comments:
Post a Comment