ភ្នំពេញ: អ្នករាយការណ៍ពិសេសទទួលបន្ទុកសិទ្ធិមនុស្សប្រចាំនៅកម្ពុជា បានកំពុងតែចងក្រងនូវរបាយការណ៍ ស្តីពីស្ថានការណ៍រំលោភសិទ្ធិមនុស្សនៅកម្ពុជា ដាក់ជូនកិច្ចប្រជុំក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ពីព្រោះលោកបានបញ្ចប់នូវដំណើរទស្សនកិច្ចស្វែងរកការពិត លើ
បញ្ហា សិទ្ធិមនុស្សនៅកម្ពុជា កាលពីអំឡុងខែឧសភា ឆ្នាំ២០១២ រួចហើយ។
លោក ស៊ូយ៉ា ប្រាសាទ ស៊ូប៊ែឌី អ្នករាយការណ៍ពិសេសទទួលបន្ទុកសិទ្ធិមនុស្ស នៃអង្គការសហប្រជាជាតិប្រចាំនៅកម្ពុជា ធ្លាប់បានថ្លែងនៅក្នុងសន្និសីទកាសែត កាលពីថ្ងៃទី១១ ខែឧសភា កន្លងមកនេះថា នៅក្នុងដំណើរទស្សនកិច្ចរបស់លោកនៅកម្ពុជានេះ លោកបានទទួលនូវព័ត៌មានជាច្រើនលើបញ្ហាសិទ្ធិមនុស្ស ហើយលោកនឹងយកព័ត៌មានដែលទទួលបានទាំងនោះ មកធ្វើការពិនិត្យផ្ទៀងផ្ទាត់គ្នា មុននឹងដាក់បញ្ចូលទៅក្នុងរបាយការណ៍ ស្តីពីស្ថានភាពសិទ្ធិមនុស្សនៅក្នុងប្រទេសកម្ពុជា ទៅក្នុងកិច្ចប្រជុំក្រុមប្រឹក្សាសិទ្ធិមនុស្ស នៅក្នុងខែកញ្ញា ឆ្នាំ២០១២ ខាងមុខនេះ។
លោក ស៊ូយ៉ា បានមានប្រសាសន៍បញ្ជាក់ថា "នៅពេលដែលខ្ញុំបានពិនិត្យច្បាស់លាស់ហើយ និងបន្ទាប់ពី
បានទទួល សក្ខីកម្មពីអ្នកដែលពាក់ព័ន្ធនៅក្នុងបញ្ហានេះសព្វគ្រប់អស់ហើយ ខ្ញុំនឹងសរសេរដាក់បញ្ហាចូលទៅក្នុងរបាយការណ៍សិទ្ធិមនុស្ស និងបញ្ចូលនូវអនុសាសន៍ជាច្រើន រួមមានការធ្វើយ៉ាងណាឲ្យមានយន្តការមួយច្បាស់លាស់ ដើម្បីគ្រប់គ្រងលើការផ្តល់ដីសម្បទានសេដ្ឋកិច្ច ឲ្យមានចីរភាព និងមានសមធម៌"។
លោកបន្តថា ការផ្តល់ដីសម្បទាននោះ គួរតែធ្វើឡើងក្នុងដំណាក់កាលមួយដែលត្រឹមត្រូវ និងមានក្របខ័ណ្ឌគតិយុត្តិជាធរមាន គោលដៅជាប្រយោជន៍ដើម្បីពង្រឹងគោលនយោបាយ និងការអនុវត្តន៍ច្បាប់ដែលមានជាធរមាន។
លោក ស៊ូយ៉ា បានបញ្ជាក់បន្តថា បេសកកម្មនៅក្នុងអាណត្តិរបស់លោកនៅពេលនេះ ក្នុងគោលដៅក្នុងន័យស្ថាបនា ដូច្នេះហើយអនុសាសន៍របស់លោកដែលបានដាក់ចូលទៅក្នុងរបាយការណ៍នោះ ផ្តល់ជាការប្រឹក្សាយោបល់ ផ្តល់ជាជំនួយក្នុងការគាំទ្រដល់រដ្ឋាភិបាលកម្ពុជា ក្នុងការអនុវត្តន៍គោលនយោបាយ។ លោកចង្អុលបញ្ជាក់អំពីកាតព្វកិច្ច ដែលមាននៅក្នុងសន្ធិសញ្ញាអន្តរជាតិនានា ដែលរាជរដ្ឋាភិបាលកម្ពុជាបានផ្តល់សច្ចាបន័ ក៏ដូចជាកាតព្វកិច្ច និងសិទ្ធិផ្សេងៗទៀត ដែលមានចែងក្នុងរដ្ឋធម្មនុញ្ញប្រទេសកម្ពុជា ដែលធានាការពារសិទ្ធិ និងសេរីភាពប្រជាពលរដ្ឋ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានមានប្រសាសន៍ថា ស្ថានភាពសិទ្ធិមនុស្សនៅកម្ពុជាមានការធ្លាក់ចុះ ហើយមន្ត្រីមានសមត្ថកិច្ចធ្លាក់ចុះ មិនបានគោរពច្បាប់ និងគោរពសិទ្ធិមនុស្សទេ។ លោកបានបញ្ជាក់ថា "ខ្ញុំធ្វើការពាក់ពន្ធ័នឹងសិទ្ធិមនុស្សដែរ ទាំងផ្នែកកម្មករ និងប្រជាពលរដ្ឋ និយាយសរុបទៅ ការគោរពសិទ្ធិមនុស្សមានការធ្លាក់ចុះ យើងមើលឃើញនូវការធ្លាក់ចុះនៃការគោរពសិទ្ធិមនុស្ស យើងមានការព្រួយបារម្ភ ហើយការធ្លាក់ចុះនៃសីលធម៌សម្រាប់ថ្នាក់ដឹកនាំ អាជ្ញាធរ បើបញ្ហាហ្នឹងមិនត្រូវបានធ្វើការកែលម្អ បណ្តាលឲ្យបញ្ហាកើតឡើង ដែលនឹងមានចលនាបដិវត្តន៍កសិករកើតឡើង ក្នុងសង្គមដែលមានសីលធម៌ធ្លាក់ចុះ ពុំមានការគោរពសិទ្ធិមនុស្ស និងគ្មានការគោរពច្បាប់ មានការគាបសង្កត់ជិះជាន់ទៅ អាហ្នឹងហើយដែលមានការរើបម្រះ”។
លោក រ៉ុង ឈុន បានបន្តទៀតថា ចំពោះលោកគឺគាំទ្រនូវរបាយការណ៍ស្តីពីសិទ្ធិមនុស្ស ចងក្រងដោយលោកស៊ូយ៉ា ដែលគ្រោងយកទៅដាក់នៅក្នុងកិច្ចប្រជុំក្រុមប្រឹក្សាសិទ្ធិមនុស្ស អង្គការសហប្រជាជាតិ នៅទីក្រុងហ្សឺណែវ ប្រទេសស្វីស នៅខែកញ្ញាខាងមុខនេះ។
លោកបន្តថា "សង្គមស៊ីវិលបានចូលរួមផ្តល់អនុសាសន៍គ្រប់បែបយ៉ាង គឺថ្នាក់ដឹកនាំរដ្ឋរបស់យើងនៅតែមិនបានធ្វើការកែលម្អ អ៊ីចឹងហើយយើងគាំទ្រធ្វើម៉េចឲ្យអន្តរជាតិជួយតម្រង់ផ្លូវ ឲ្យដើរត្រង់ផ្លូវ តាមអ្វីដែលមានកំណត់នៅក្នុងរដ្ឋធម្មនុញ្ញ និងអនុវត្តតាមកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ដែលជាត្រីវិស័យចង្អុលបង្ហាញផ្លូវដល់អ្នកដឹកនាំ”។
រីឯលោក កែវ រ៉េមី រដ្ឋលេខាធិការ និងជាប្រធានក្រុមអ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បែរជានិយាយយ៉ាងនេះថា "នៅកាលដែលប្រជាជនអាមេរិកាំងធ្វើបាតុកម្មមួយប្រាវ គ្រប់រដ្ឋទាំងអស់ ប៉ូលិសបង្ក្រាបបាតុករវ៉ៃនឹងព្រនង់ ចាប់ស្ត្រីចងស្លាបសេក បោះចូលឡាន ហើយអាខ្លះទៀតទាញអាវគ្នាប្រឡេះ ខ្ញុំមិនចង់និយាយទេ ឃើញសព្វបែបសព្វយ៉ាងហើយអារឿងរំលោភសិទ្ធិមនុស្ស ម៉េចក៏ពួកនេះមិនព្រមនេះផង តាមពិតពួកនេះខូច អាខ្លះខូចហ្មង ក៏ប៉ុន្តែត្រង់វាឆ្លាត ប្រទេសអញល្អរហូត ប្រទេសគេឆ្កឹះឆ្កៀលឲ្យគេរញ៉េរញ៉ៃ ដើម្បីវាគ្រប់គ្រងរឿងតែប៉ុណ្ណឹងទេ វាគ្មានស្អីដែលអស្ចារ្យទេ ពួកនេះខ្ញុំស្គាល់ច្បាស់ណាស់”។
ចំណែកលោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី បានមានប្រតិកម្មតបទៅនឹងលោក ស៊ូយ៉ា យ៉ាងដូច្នេះថា កត្តាសិទ្ធិមនុស្សមិនមែនយើងមើលមួយថ្ងៃ យើងដឹងថាស្ថានការណ៍សិទ្ធិមនុស្សវិវត្តន៍ទៅយ៉ាងណាៗ ដូចយើងមើលតាមភ្នែកយើងទេ សំខាន់មើលពីប្រវត្តិសាស្ដ្រ ដែលរាជរដ្ឋាភិបាលមានសុឆន្ទៈលុបបំបាត់នូវការបំពារបំពានដោយច្បាប់ ផ្សេងៗ ដែលបុគ្គលមួយចំនួនជិះជាន់កេងប្រវ័ញ្ចទៅលើប្រជាពលរដ្ឋ៕
លោកស៊ូយ៉ាគ្រោងដាក់របាយការណ៍រំលោភសិទ្ធិមនុស្ស ទៅកិច្ចប្រជុំក្រុមប្រឹក្សាសិទ្ធិមនុស្ស អ ស ប
No comments:
Post a Comment