ដោយ ម៉ម មុន្នីរតន៍
2012-05-08
ពលរដ្ឋសហគមន៍បុរីកីឡា និងសហគមន៍បឹងកក់ ប្រមូលផ្ដុំដាច់ដោយឡែកពីគ្នា នៅថ្ងៃទី ៨ ខែឧសភា។
ប្រជាពលរដ្ឋនៅតំបន់បឹងកក់ តវ៉ានៅមុខសាលារាជធានីភ្នំពេញ នៅថ្ងៃទី១១ ខែមីនា ឆ្នាំ២០១១
អ្នកស្រី ទេព វន្នី ជាតំណាងសហគមន៍បឹងកក់ និងអ្នកស្រី ជុំ ង៉ាន់ តំណាងសហគមន៍បុរីកីឡា។ អ្នកស្រី ប្រាប់វិទ្យុអាស៊ីសេរីឲ្យដឹង នៅថ្ងៃទី ៨ ឧសភាថា ការប្រមូលផ្តុំគ្នារបស់អ្នកភូមិសាជាថ្មីទៀត នៅមុខសាលារាជធានីភ្នំពេញនេះ គឺដើម្បីជំរុញឲ្យមន្រ្តីសាលារាជធានីភ្នំពេញ អនុវត្តចំណាររបស់ប្រមុខរដ្ឋាភិបាលឲ្យបានឆាប់ជូនពួកគាត់។
អ្នកស្រី ទេព វន្នី៖ «អភិបាលសាលារាជធានីភ្នំពេញហ្នឹង ឲ្យគាត់ជំរុញ និងពន្លឿនការដោះស្រាយជូនប្រជាពលរដ្ឋបឹងកក់។ បញ្ឈប់ការធ្វើការពន្យាពេលវេលាចេះតែយូរទៅៗ វាធ្វើឲ្យប៉ះពាល់ដល់ជីវភាពរបស់ប្រជា ពលរដ្ឋ ហើយបញ្ហាផ្លូវចិត្ត និងប៉ះពាល់ដល់មុខមាត់របស់រដ្ឋាភិបាល។ គាត់នៅតែនិយាយពាក្យដដែលថា ទាល់តែមានឯកសារ ៥ ចំណុច ហើយពួកខ្ញុំហ្នឹងមានឯកសារដែលចុះកិច្ចសន្យា និងមានតែ ៤ ចំណុចទេ។ ដូចខ្ញុំជំរាបប្រាប់មិញអ៊ីចឹង ឲ្យតែមានក្នុង ៤ ចំណុចហ្នឹង មួយចំណុចក៏បានផ្ទះដែរ»។
ក៏ប៉ុន្តែ លោក កើត ឆែ នាយខុទ្ទកាល័យសាលារាជធានីភ្នំពេញ ដែលបានទទួលសំណើរបស់សហគមន៍បឹងកក់ដោយផ្ទាល់ បានបដិសេធក្នុងការផ្តល់អត្ថាធិប្បាយជុំវិញបញ្ហានេះ។ តែលោកអះអាងយ៉ាងខ្លីថា កំពុងរៀបចំរបាយការណ៍បញ្ជូនត្រឡប់ទៅថ្នាក់លើវិញ។
ការទាមទាររបស់សហគមន៍ទាំងពីរនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បញ្ជូនលិខិតមួយច្បាប់ ដែលចុះហត្ថលេខាដោយលោក ហូ សិទ្ធី នាយកខុទ្ទកាល័យនាយករដ្ឋមន្រ្តី កាលពីថ្ងៃទី ៣ ខែឧសភា ឆ្នាំ ២០១២ សុំឲ្យសាលាក្រុងភ្នំពេញ ចាត់វិធានការតាមសំណើរបស់សហគមន៍បុរីកីឡា បឹងកក់ និងលិខិតអន្តរាគមន៍របស់សមាគមលោក រ៉ុង ឈុន៕
No comments:
Post a Comment