ដោយ ជិន ជេដ្ឋា
2012-05-01
មន្ត្រីរដ្ឋាភិបាល ព្រមទាំងអង្គការក្រៅរដ្ឋាភិបាលជាតិ និងអន្តរជាតិ បានប្រារព្ធខួបលើកទី១២៦ នៃទិវាពលកម្មអន្តរជាតិ នារាជធានីភ្នំពេញ ដោយការហែក្បួន។
ក្បួនដង្ហែរបស់ក្រុមអង្គការសង្គមស៊ីវិល និងកម្មករគ្រប់វិស័យ នៅតាមដងផ្លូវ នារាជធានីភ្នំពេញ ក្នុងទិវាពលកម្មអន្តរជាតិ ថ្ងៃទី១ ឧសភា ឆ្នាំ២០១២។
តំណាងអង្គការក្រៅរដ្ឋាភិបាលជាតិ និងអន្តរជាតិ ព្រមទាំងប្រជាសហគមន៍ជាច្រើនពាន់នាក់ បានមកជួបជុំគ្នា និងដង្ហែក្បួនពីកន្លែងក្រុមប្រឹក្សាអភិវឌ្ឍន៍កម្ពុជា ឆ្ពោះទៅកាន់វិមានរដ្ឋសភា នៅព្រឹកថ្ងៃទី០១ ខែឧសភា ក្នុងគោលបំណងយកញត្តិដាក់ជូនរដ្ឋសភាជាតិ។ ខ្លឹមសារនៅក្នុងញត្តិនោះ តំណាងកម្មករ និងសហភាពការងារកម្ពុជា មានសំណើចំនួន ១៤ចំណុចសំខាន់ៗ ក្នុងនោះក៏មានការទាមទាឲ្យរដ្ឋាភិបាលកម្ពុជា បង្កើតតុលាការការងារឲ្យបានឆាប់ផងដែរ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា បើទោះបីជានៅកម្ពុជា នៅពេលបច្ចុប្បន្នមានក្រុមប្រឹក្សាអាជ្ញាកណ្ដាលដើម្បីដោះស្រាយ វិវាទការងាររវាងកម្មករ និងនិយោជក ប៉ុន្តែក្រុមការងារមួយនេះមិនទាន់ឆ្លើយតបទៅនឹងការចង់បានរបស់ កម្មករនៅឡើយទេ ព្រោះនិយោជកនៅតែបន្តការជិះជាន់ និងកេងប្រវ័ញ្ចកម្លាំងពលកម្មរបស់កម្មករដដែល បន្ទាប់ពីមានការសម្រេចពីក្រុមប្រឹក្សាអាជ្ញាកណ្ដាល។
លោក អាត់ ធន់៖ «ជាទូទៅ គឺក្រុមប្រឹក្សាអាជ្ញាកណ្ដាល យើងអាចនិយាយថា កន្លែងមួយដែលកាត់ក្ដីមានភាពត្រឹមត្រូវ និងយុត្តិធម៌ច្រើនហើយ ប៉ុន្តែរឿងដែលអយុត្តិធម៌ គឺថា នៅពេលដែលអាជ្ញាកណ្ដាលកាត់ហើយ បានន័យថា ក្រុមហ៊ុនមិនអនុវត្ត គ្មាននរណាជំរុញឲ្យអនុវត្ត ហើយគឺវាអត់មានន័យដដែល បានន័យថា អត់មានអនុភាពជំរុញឲ្យអនុវត្តជាកាតព្វកិច្ច ព្រោះគ្រាន់តែជាការឲ្យអនុវត្ត បើមិនអនុវត្ត យើងប្ដឹងទៅតុលាការដដែល»។
លោកបញ្ជាក់ថា ការដោះស្រាយវិវាទការងាររបស់ក្រុមប្រឹក្សាអាជ្ញាកណ្ដាល ៩០ភាគរយ គឺកម្មករឈ្នះក្ដី ប៉ុន្តែក្រុមហ៊ុនមិនដែលបានអនុវត្តតាមសេចក្ដីសម្រេចនោះទេ។ ម្យ៉ាងវិញទៀត រដ្ឋាភិបាលពុំមានយន្តការច្បាស់លាស់ ដើម្បីជំរុញឲ្យក្រុមហ៊ុនអនុវត្តលើសេចក្ដីសម្រេច។ បញ្ហានេះបានបង្កឲ្យមានការតវ៉ាច្រើន និងកើតមានភាពអយុត្តិធម៌នៅក្នុងសង្គមការងារនៅកម្ពុជា នាពេលបច្ចុប្បន្ន។
អនុប្រធានកម្មវិធីផ្នែកស៊ើបអង្កេតសិទ្ធិមនុស្ស នៃសមាគមអាដហុក លោក ចាន់ សុវ៉េត មានប្រសាសន៍ថា ការបង្កើតតុលាការងារ ដែលជាការស្នើសុំរបស់តំណាងកម្មករ និងសម្ព័ន្ធសហជីពពេលនេះ គឺស្ថិតនៅក្នុងផែនការរបស់រដ្ឋាភិបាលរួចជាស្រេចហើយ ប៉ុន្តែមិនទាន់បង្កើតចេញជារូបរាង។
ស្របពេលនឹងមានការទាមទានេះ លោកសង្ឃឹម និងជឿជាក់ថា រដ្ឋាភិបាលអាចនឹងបង្កើតឲ្យមានតុលាការមួយនេះក្នុងពេលឆាប់ខាង មុខ៖ «យើងសង្ឃឹមថា រដ្ឋាភិបាលនឹងបានគិតគូរពីលើបញ្ហាហ្នឹងមួយចំនួនដែរ សម្រាប់បង្កើតតុលាការការងារមួយសម្រាប់រកយុត្តិធម៌សម្រាប់កម្មករ ដូចតុលាការសព្វថ្ងៃនេះកាត់តែអ្នកមានទេ អ្នកក្រីក្រមិនងាយទទួលបានការជំនុំជម្រះដោយយុត្តិធម៌ទេ ហើយឥឡូវនេះកម្មករទទូចអ៊ីចឹង ខ្ញុំជឿជាក់ថា រដ្ឋាភិបាលនឹងរៀបចំឲ្យបានឆាប់ ព្រោះកន្លែងនេះគឺជាកន្លែងអនុម័តច្បាប់»។
វិទ្យុអាស៊ីសេរីមិនអាចទាក់ទង លោក សុខ ឡោ និងសមាជិកក្រុមប្រឹក្សាអាជ្ញាកណ្ដាលបានទេ នៅថ្ងៃទី០១ ខែឧសភា ដើម្បីសាកសួរអំពីដំណើរការដោះស្រាយវិវាទការងាររបស់និយោជក និងកម្មករនៅដើមឆ្នាំ២០១២ នេះ។
ទោះជាយ៉ាងណា ប្រធានសម្ព័ន្ធសហជីពការងារកម្ពុជា គឺលោក អាត់ ធន់ ឲ្យដឹងថា នៅ ៥ខែដើមឆ្នាំ ២០១២ មានការធ្វើបាតុកម្ម កូដកម្មចំនួន ៣៨ករណី ក្នុងនោះមានករណីប្ដឹងផ្ដល់រវាងនិយោជក និងកម្មករ ទៅក្រុមប្រឹក្សាអាជ្ញាកណ្ដាល ប្រមាណជា ៣០០ករណី។ ចំនួននេះបានកើនឡើងជាងពាក់កណ្ដាលបើប្រៀបធៀបទៅនឹងពាក់កណ្ដាលដើម ឆ្នាំ២០១១ កន្លងទៅ។
លោកបញ្ជាក់ថា នៅក្នុងចំណោមរោងចក្រជិត ៧០០ នៅទូទាំងប្រទេស មានតែ ៥៨៩ រោងចក្រប៉ុណ្ណោះដែលមានច្បាប់ដំណើរការបានត្រឹមត្រូវ។ ប្រការនេះធ្វើឲ្យនិយោជក គេចផុតពីការទទួលខុសត្រូវនៅពេលមានបញ្ហាតវ៉ា ឬប្ដឹងផ្ដល់អ្វីមួយកើតឡើង។
កម្មការិនីម្នាក់ឈ្មោះ ហែម លាភ មកពីរោងចក្រ អូសេអង (O.C1) ក្រុងភ្នំពេញ ដែលកំពុងស្រែកហ៊ោ និងដៃកាន់ពាក្យស្លោកមួយផ្ទាំងសរសេរថា "កម្លាំងខ្សោយ លុយតិច សុខភាពដុនដាប ផលិតភាពធ្លាក់ចុះ" មានប្រសាសន៍ថា អ្នកស្រីមកជាមួយមិត្តភ័ក្ដិជាច្រើននាក់ផ្សេងទៀត ដើម្បីសុំឲ្យរដ្ឋាភិបាលដោះស្រាយជម្លោះការងារ និងដំឡើងប្រាក់ខែ៖ «មកសុំទាមទារឲ្យរដ្ឋមន្ត្រី គាត់ជួយមើលនាយកក្រុមហ៊ុនឲ្យបានប្រាក់ខែដូចរោងចក្រគេ រោងចក្រគេ ថៅកែក្រុមហ៊ុនគេឲ្យលុយ ដូចជាលុយថ្លៃផ្ទះ ថ្លៃទឹក ថ្លៃភ្លើង លុយធ្វើដំណើរ នៅរោងចក្រខ្ញុំមិនដែលបានទេ»។
ការជួបជុំគ្នាត្រូវបានរំសាយទៅវិញ នៅម៉ោងប្រមាណជា ១១ ព្រឹកថ្ងៃទី០១ ខែឧសភា ឆ្នាំ២០១២ បន្ទាប់ពីរដ្ឋសភាជាតិចេញមកទទួលយកញត្តិរបស់ក្រុមកម្មករ ប៉ុន្តែមិនទាន់មានការឆ្លើយតបភ្លាមៗទាក់ទងទៅនឹងការស្នើសុំ ទាំងនោះនៅឡើយទេ។
ក្រៅពីមានការជួបជុំហែក្បួនរបស់កម្មករ កម្មការិនីនៅរាជធានីភ្នំពេញ នៅតាមខេត្តមួយចំនួន ដូចជាខេត្តព្រះសីហនុ ក៏មានការជួបជុំកម្មករ អបអរទិវាពលកម្មអន្តរជាតិ ថ្ងៃទី១ ឧសភា នេះដែរ៕
No comments:
Post a Comment