ភ្នំពេញ ថ្ងៃទី១២ ខែវិច្ឆិកា ឆ្នាំ២០១០
ក្រុមប្រឹក្សាក្រមសីលធម៌អ្នកសារព័ត៌មានកម្ពុជាត្រូវបានបង្កើតជាផ្លូវការ
ក្រុមប្រឹក្សាក្រមសីលធម៌អ្នកសារព័ត៌មានកម្ពុជាត្រូវបានបង្កើតឡើងជាលើកដំបូង នៅក្នុងប្រទេសកម្ពុជាក្នុងសន្និសីទថ្នាក់ជាតិ ស្តីពី ” ការពង្រឹងក្រមសីលធម៌អ្នកសារព័ត៌មានកម្ពុជា ” នៅមជ្ឈមណ្ឌលវប្បធម៌កម្ពុជា-កូរ៉េ ដោយមានការចូលរួមពីអ្នកសារព័ត៌មានមកពីរាជធានីខេត្ត-ក្រុងនានាប្រមាណ១៣៦នាក់។
នៅថ្ងៃទី១២ ខែវិច្ឆិកា ឆ្នាំ២០១០ ក្រុមប្រឹក្សាក្រមសីលធម៌អ្នកសារព័ត៌មានកម្ពុជា ដែលមានសមាជិកចំនួន១៥នាក់ ជាអ្នកសារព័ត៌មានអាជីព អ្នកសារព័ត៌មានដែលមានបទពិសោធន៏ច្រើនឆ្នាំ និងជាអ្នកជំនាញ ដែលធ្វើការងារពាក់ព័ន្ធក្នុងវិស័យប្រព័ន្ធផ្សព្វផ្សាយ ត្រូវបានបង្កើតឡើងជាផ្លូវការនៅក្នុងសន្និសីទថ្នាក់ជាតិស្តីពី ” ការពង្រឹងក្រមសីលធម៌អ្នកសារព័ត៌មានកម្ពុជា ” ក្នុងគោលបំណងបង្កើតយន្តការពង្រឹងការប្រតិបត្តិក្រមសីលធម៌ និងប្រកាសជាផ្លូវការនូវការបង្កើតក្រុមប្រឹក្សាក្រមសីលធម៌អ្នកសារព័ត៌មានកម្ពុជា (ក.ក.អ.ក)។
ដោយមើលឃើញថា ការអនុវត្តក្រមសីលធម៌វិជ្ជាជីវៈក្នុងចំណោមអ្នកសារព័ត៌មានកម្ពុជានៅមានកម្រិតហើយបាននឹងកំពុងធ្វើអោយមានការព្រួយបារម្ភ ពីការធ្លាក់ចុះនូវជំនឿទុកចិត្តពីសារធារណជនជាយថាហេតុ។ ក្រុមប្រឹក្សាក្រមសីលធម៌អ្នកសារព័ត៌មានកម្ពុជា ត្រូវបានបង្កើតឡើង ដោយសង្ឃឹមថានឹងប្រមូលបានការចូលរួមពីអ្នកពាក់ព័ន្ធក្នុងវិស័យប្រព័ន្ធផ្សព្វផ្សាយនានា រួមមានបណ្ណាធិការ និពន្ធនាយក អ្នកនិពន្ធ និងអ្នកយកព័ត៌មាន រួមគ្នាគាំទ្រយន្តការពង្រឹងក្រមសីលធម៌វិជ្ជាជីវៈសម្រាប់អ្នកសារព័ត៌មានកម្ពុជា ឆ្ពោះទៅលើកកម្ពស់សមធម៌និងសមភាពក្នុងការទទួលបាននូវសេរីភាពបញ្ចេញមតិ និងសិទ្ធិទទួលបានព័ត៌មាននៃសង្គមកម្ពុជាទាំងមូល ។
ជាមួយនឹងយុទ្ធសាស្ត្រលើកស្ទួយក្រមសីលធម៌វិជ្ជាជីវៈអ្នកសារព័ត៌មាន ក្រុមប្រឹក្សាក្រមសីលធម៌អ្នកសារព័ត៌មានកម្ពុជារំពឹងថា ការពិភាក្សានានាក៏ដូចជាការយកចិត្តទុកដាក់លើបញ្ហានេះ នឹងមានសភាព ផុលផុសជាងមុន នៅពេលដែលអ្នកពាក់ព័ន្ធសំខាន់ៗលើវិស័យនេះ រួមគ្នារកដំណោះស្រាយ ដើម្បីភាព ល្អប្រសើរ និងលើកកម្ពស់តម្លៃវិជ្ជាជីវៈសារព័ត៌មាន។
ក្រុមប្រឹក្សាក្រមសីលធម៌អ្នកសារព័ត៌មានកម្ពុជា ក៏រំពឹងផងដែរលើស្មារតីចូលរួមចំណែកពីមជ្ឈដ្ឋានទូទៅសិស្សនិស្សិត អង្គការមិនមែនរដ្ឋាភិបាល វិស័យឯកជន និងប្រជាពលរដ្ឋ នៅក្នុងការផ្តល់ព័ត៌មាន មតិ និងការគំាទ្រទាំងស្មារតី និងសម្ភារៈ ដើម្បីសម្រេចបាននូវគោលបំណងខាងលើនេះ។
សម្រាប់ព័ត៌មានបន្ថែមសូមទាក់ទងៈ
១. លោក សេក បរិសុទ្ធ ទូរស័ព្ទលេខ ០៩២ ៨៨៣ ៥២៣
២. លោក ឈឹម សារិទ្ធ ទូរស័ព្ទលេខ ០១២ ៥០៩ ៣៣១
៣. លោក កៃ គីមសុង ទូរស័ព្ទលេខ ០១២ ៩២១ ០៥៣
៤. លោក ហង្ស ចក្រា ទូរស័ព្ទលេខ ០១២ ៨៨០ ៥៩៣
៥. លោក ទៀង សុភៈវិជ្ជា ទូរស័ព្ទលេខ ០១២ ៩៨៩ ២៧២
៦. លោក សុខ សុវណ្ណ ទូរស័ព្ទលេខ ០១២ ៧៧២ ២៦៧
៧. លោក ពុយ គា ទូរស័ព្ទលេខ ០១២ ៩០៨ ៨៤០
៨. លោកស្រី យឹម នីម៉ូល្លា ទូរស័ព្ទលេខ ០១២ ៩១៩ ០៩៩
៩. លោក ប៉ែន បូណា ទូរស័ព្ទលេខ ០១២ ៨៤៨ ៦២៩
១០. លោក មឿនឈាន ណារិទ្ធ ទូរស័ព្ទលេខ ០១២ ៨៣១ ៦៣៣
១១. លោក ឃួន ប្លាយវី ទូរស័ព្ទលេខ ០១២ ៩៥៣ ០៩៦
No comments:
Post a Comment