ពោធិ៍សាត់ៈ ពលរដ្ឋជាង ១០០ នាក់ មកពីឃុំចំនួន ៣ នៅក្នុងស្រុកក្រគរ ដែលមានជម្លោះដីធ្លីដ៍រ៉ាំរ៉ៃ ជាមួយក្រុមហ៊ុនភាពីម៉ិច ជាកម្មសិទ្ធិរបស់លោកស្រីជឹង សុភាព ហៅយាយភូ កាលពីម្សិលមិញ បាននាំគ្នាប្រារព្ធពិធី ដាក់បណ្តាសា ដល់អ្នកដែលចូលទៅច្បាមយកដីធ្លី និងបំផ្លាញធនធានធម្មជាតិ នៅក្នុងភូមិស្រុករបស់ពួកគាត់។
ពិធីដាក់បណ្តាសា ពេញមួយថ្ងៃ ដែលធ្វើឡើង នៅក្នុងភូមិក្រឡាញ់ មានការចូលរួម ពីប្រជាពលរដ្ឋ មកពីឃុំឈើតុំ ឃុំអន្សារចំបក់ និងក្បាលត្រាច។ អ្នកភូមិនិយាយថា ក្រុមហ៊ុន ភាពីម៉ិច បានរំលោភយកដីធ្លីរបស់ពួកគេ និងបានបំផ្លាញធនធានធម្មជាតិនៅទីនោះ ដែលពួកគេធ្លាប់រស់នៅអាស្រ័យផល តាំងពីជីដូនជីតាមក។ លោក គុជ វ៉េង តំណាងប្រជាពលរដ្ឋបានអោយដឹងទៀតថា ៖ «យើងបួងសួងសុំអោយព្រលឹងបុព្វបុរស អារុក អារក្ស អ្នកតា ដាក់បណ្តាសារដល់ក្រុមហ៊ុន និងអ្នកដែលពាក់ព័ន្ធយកដីប្រជាពលរដ្ឋទាំងប៉ុន្មាន អោយរលាយសាបសូន្យ និងជួបតែគ្រោះអន្តរាយឥតស្រាកស្រាន្ត»។
លោកឌុក សារី តំណាងពលរដ្ឋម្នាក់ទៀត ថ្លែងថា៖«ប្រជាពលរដ្ឋ ធ្វើការបួងសួង និងដាក់បណ្តាសារ អោយក្រុមហ៊ុនអន្តរាយ និងជួយប្រជាពលរដ្ឋ អោយរក្សាដីធ្លី ព្រៃឈើឲ្យបានគង់វង្ស»។ លោកបន្ថែមថា អ្នកភូមិក៏ធ្វើការបួងសួងផងដែរ សូមឲ្យទេវតា ជួយបន្ទន់ចិត្តតុលាការ ឲ្យដោះលែងជនរងគ្រោះ ដោយសារជម្លោះដីធ្លីទាំងអស់ ចេញពីពន្ធនាគារ និងឈប់ចោទប្រកាន់ពលរដ្ឋតទៅទៀត ពីព្រោះប្រជាពលរដ្ឋទាំងនោះ គ្មានទោសទេ ពួកគេគ្រាន់តែការពារផ្ទះសំបែង ដីធ្លី របស់ពួកគេ ពីការរំលោភបំពានតែប៉ុណ្ណោះ។
ក្រុមអ្នកភូមិបាននិយាយថា ការដែលពួកគេធ្វើពិធីបួងសួង និងដាក់បណ្តាសាយ៉ាងដូច្នេះ ពីព្រោះពួកគេអស់ជំនឿលើអាជ្ញាធរ និងតុលាការ។
លោកទី គឹមតុក អភិបាលរងខេត្តពោធិ៍សាត់ និងជាអ្នកតំណាងក្រុមហ៊ុនភាពីម៉ិច បានបដិសេធមិនធ្វើការអត្ថាធិប្បាយទេ ដោយលោកមានប្រសាសន៍ថាទូរស័ព្ទខុសលេខ។
លោក អ៊ូច ឡេង ប្រធានកម្មវិធី កំនែទម្រង់ដីធ្លី របស់មជ្ឈមណ្ឌលសិទ្ធិមនុស្សកម្ពុជា ថ្លែងថា៖ «សកម្មភាពរបស់ពលរដ្ឋបានបង្ហាញថា ពួកគេអស់ជំនឿទៅលើប្រព័ន្ធតុលាការ និងរដ្ឋាភិបាលហើយ»។
កាលពីថ្ងៃទី ៣ ខែមេសា ប្រជាពលរដ្ឋប្រមាណ ៣០០ នាក់ នៅឃុំក្បាលត្រាច បាននាំគ្នាធ្វើការតវ៉ានៅលើដីជម្លោះ ខាងមុខទីស្នាក់ការរបស់ក្រុមហ៊ុន ដើម្បីស្នើសុំអោយតំណាងក្រុមហ៊ុន ចេញមុខមកពន្យល់អំពីហេតុផល ដែលក្រុមហ៊ុន បានឈូសឆាយយកដីស្រែរបស់ពួកគាត់។
ក្រុមហ៊ុនភាពីម៉ិច បានទទួលដីសម្បទានសេដ្ឋកិច្ច ពីរដ្ឋាភិបាល កាលពី ខែមករា ឆ្នាំ ២០០០ លើផ្ទៃដីរហូតដល់ ៣១៥០២៨ ហិកតា លាតសន្ធឹងពីខេត្តកំពង់ឆ្នាំង រហូតដល់ខេត្តពោធិ៍សាត់។ ចំនួននេះ លើសពីចំនួន ដែលបានកំណត់នៅក្នុងច្បាប់ភូមិបាល រហូតដល់ជាង ៣០ ដង។ តាមច្បាប់ភូមិបាល ក្រុមហ៊ុនមួយ មិនអាចទទួលដីសប្បទាន លើសពី ១០០០០ ហិកតាឡើយ៕
No comments:
Post a Comment