Tuesday, April 23, 2013
CCHR បើកយុទ្ធនាការគាំទ្រសកម្មជនដីធ្លី អ្នកស្រីយ៉ោម បុប្ផា
ដោយ ស៊ុន ណារិន ថ្ងៃអង្គារ ទី23 មេសា ឆ្នាំ2013 ម៉ោង11:40
អ្នកស្រី យ៉ោម បុប្ផា នៅតុលាការកំពូល (រូបថត ញឹម សុខន)
មជ្ឈមណ្ឌលសិទ្ធិមនុស្សកម្ពុជា(CCHR) នឹងបើកយុទ្ធនាការ«សំឡេងសេរីភាព» ដើម្បីទាមទារឲ្យដោះលែងសកម្មជនដីធ្លី អ្នកស្រីយ៉ោម បុប្ផា ដែលកំពុងជាប់ពន្ធនាគារព្រៃស។
អ្នកស្រី យ៉ោម បុប្ផា ត្រូវបានសាលាដំបូងរាជធានីភ្នំពេញ កាត់ទោសឲ្យជាប់ពន្ធនាគារ ៣ឆ្នាំ ពីបទបង្ករហិង្សាដោយចេតនាលើអ្នករត់ម៉ូតូឌុបពីរនាក់កាលពីខែកញ្ញា ឆ្នាំ២០១២។ កាលពីខែមិនា ឆ្នាំ២០១៣ សកម្មជនដីធ្លីរូបនេះ ត្រូវបានតុលាការកំពូលសម្រេចបន្តឃុំនៅពន្ធនាគារ ក្រោមបទចោទរបស់សាលាដំបូងរាជធានីភ្នំពេញដដែល។
ការផ្តន្ទាទោសនេះ ត្រូវបានអង្គការសង្គមស៊ីវិលជាតិ និងអន្តរជាតិ ចេញសេចក្តីថ្លែងការណ៍ជាបន្តបន្ទាប់ អំពាវនាវដោះលែងសកម្មជនដីធ្លីរូបនោះ ជាបន្ទាន់ហើយចោទថា រដ្ឋាភិបាលប្រើតុលាការទប់ទល់ ជាមួយប្រជាពលរដ្ឋដែលហ៊ានតវ៉ារឿងដីធ្លី។
សេចក្តីប្រកាសព័ត៌មានរបស់CCHR ចេញផ្សាយនៅថ្ងៃពុធ ទី២៣ខែមេសានេះ ឲ្យដឹងថា មជ្ឈមណ្ឌល អំពាវនាវឲ្យប្រជាពលរដ្ឋទាំងអស់ ដែលបារម្ភពីការជាប់ឃុំរបស់អ្នកស្រី យ៉ោម បុប្ផា ផ្ញើសារជាសំឡេង ឬសារតាមរយៈការហៅទូរសព្ទ ដើម្បីគាំទ្រ តាមកម្មវិធីវិទ្យុប៉ុស្តិ៍១០៥ ជារៀងរាល់ថ្ងៃអង្គារ ដល់ថ្ងៃព្រហស្បតិ៍ ចាប់ពីម៉ោង១១ ដល់១២ថ្ងៃត្រង់។ យុទ្ធនាការនេះ នេះធ្វើរហូតដល់មានការដោះលែងអ្នកស្រីយ៉ោម បុប្ផា។
មជ្ឈមណ្ឌល ក៏នឹងដាក់បង្ហាញបដានៅខាងមុខការិយាល័យរបស់ខ្លួន ដើម្បីរាប់ថ្ងៃ ដែលអ្នកស្រី យ៉ោម បុប្ផា ជាប់ពន្ធនាគារ។
អ្នកសម្របសម្រួលគម្រោងអ្នកការពារសិទ្ធិមនុស្ស លោក សួន ប៊ុនធឿន មានប្រសាសន៍ថា យុទ្ធនាការនេះ នឹងអាចជួយនាំយកមកនូវយុត្តធម៌សម្រាប់ករណីអ្នកស្រី យ៉ោម បុប្ផា ហើយការចោទប្រកាន់លើអ្នកស្រី នឹងត្រូវទម្លាក់នៅក្នុងសាលាឧទ្ធរណ៍។
កាលពីចុងខែមិនា អង្គការឃ្លាំមើលសិទ្ធិមនុស្សអន្តរជាតិ(HRW) ជំរុញឲ្យប្រទេសម្ចាស់ជំនួយ ដាក់សម្ពាធលើរដ្ឋាភិបាលកម្ពុជា ដើម្បីឲ្យដោះលែងអ្នកស្រី យ៉ោម បុប្ផា សកម្មជនដីធ្លីបឹងកក់ជាបន្ទាន់ ដោយឥតលក្ខខណ្ឌ។
តែកន្លងទៅ លោកនាយករដ្ឋមន្ត្រី ហ៊ុន សែន បានលើកឡើងថា អ្នកស្រី យ៉ោម បុប្ផា បានវាយដំលើអ្នករត់ម៉ូតូ ដែលតុលាការត្រូវកាត់ទោសតាមច្បាប់។ លោកនាយករដ្ឋមន្ត្រីបន្តថា ការដែលសង្គមស៊ីវិល បង្វែររឿងព្រហ្មទណ្ឌរបស់អ្នកស្រីយ៉ោម បុប្ផា ថាជាករណីបង្ក្រាបសកម្មជដីធ្លីនោះ ជារឿងអយុត្តិធម៌សម្រាប់រដ្ឋាភិបាល៕
Subscribe to:
Post Comments (Atom)
No comments:
Post a Comment