មេនគរបាលរាជធានីរងការចោទថាប្រើហិង្សាលើមន្ត្រីប៉េអិម២នាក់
ដោយ វណ្ណ វិចារ
2013-02-03
លោកស្នងការនគរបាលរាជធានីភ្នំពេញ រងការចោទប្រកាន់ថា ប្រើប្រាស់អំពើហិង្សាទៅលើមន្ត្រីកងរាជអាវុធហត្ថ ២នាក់ នៅជិតព្រះបរមមេរុ។
ស្នងការនគរបាលរាជធានីភ្នំពេញ លោកឧត្តមសេនីយ៍ឯក ជួន សុវណ្ណ បើកកិច្ចប្រជុំបូកសរុបលទ្ធផលការងារនគរបាលរាជធានីភ្នំពេញ សម្រាប់ខែមករា ឆ្នាំ២០១៣ នៅស្នងការដ្ឋាននគរបាលរាជធានីភ្នំពេញ កាលពីថ្ងៃទី៣១ ខែមករា ឆ្នាំ២០១៣។
សាក្សីឃើញហេតុការណ៍ផ្ទាល់ភ្នែកឲ្យដឹងថា រឿងរ៉ាវនោះកើតឡើងដោយសារតែលោកស្នងការ ជួន សុវណ្ណ ខឹងសម្បានឹងមន្ត្រីប៉េអិមដែលមិនអាចហាមឃាត់ពលរដ្ឋចូលទៅថ្វាយបង្គំព្រះបរមសពនៅវាលព្រះបរមមេរុបាន។
មន្ត្រីជាន់ខ្ពស់កងរាជអាវុធហត្ថលើផ្ទៃប្រទេសឲ្យដឹងថា មន្ត្រីអាវុធហត្ថពីរនាក់ត្រូវបានឧត្ដមសេនីយ៍ឯកស្នងការនគរបាលរាជធានីភ្នំពេញ លោក ជួន សុវណ្ណ ប្រើកណ្ដាប់ដៃ និងកែងវាយទៅដងខ្លួន និងកញ្ចឹងក នៅពេលដែលពួកគេចុះបំពេញបេសកកម្មរក្សាសន្តិសុខសណ្ដាប់ធ្នាប់នៅខាងកើតឆៀងខាងត្បូងព្រះបរមមេរុ។
មន្ត្រីអ្នកនាំពាក្យកងរាជអាវុធហត្ថលើផ្ទៃប្រទេសលោកឧត្ដមសេនីយ៍ឯក ខេង ទីតូ នៅថ្ងៃទី៣ កុម្ភៈ ឆ្នាំ២០១៣ មានប្រសាសន៍ថា រឿងរ៉ាវនេះកើតឡើងដោយសារតែមន្ត្រីរាជអាវុធហត្ថប្រចាំការនៅគោលដៅនោះ មិនអាចឃាត់ឃាំងប្រជាពលរដ្ឋច្រើនដែលចង់ចូលទៅព្រះបរមមេរុច្រើនពេក និងមានអ្នកខ្លះផ្លោះរនាំងរបស់សមត្ថកិច្ចចូលទៅក្នុងព្រះបរមមេរុ បណ្ដាលឲ្យលោក ជួន សុវណ្ណ ខឹង ក៏ប្រើហិង្សាតែម្ដង។
លោក ខេង ទីតូ បញ្ជាក់ថា ការប្រើប្រាស់ហិង្សារបស់លោកស្នងការមិនត្រឹមត្រូវតាមច្បាប់នោះទេ៖ «មិនដឹងគាត់ខឹងអី គាត់ប្រើហិង្សានៅមុខមហាជនតែម្ដង គួរឲ្យសោកស្ដាយដែរ។ ខ្ញុំអត់មានរឿងអីត្រូវសួរនាំលោកស្នងការហ្នឹងផង ព្រោះលោកស្នងការហ្នឹងគាត់ធ្វើអីគាត់ដឹងខ្លួនហើយ។ យើងគ្រាន់តែមានការអត់ធ្មត់ យើងប្រាប់គ្នាយើងឲ្យមានការអត់ធ្មត់តែប៉ុណ្ណឹង កុំឲ្យមានការខឹងសម្បាអី ជាជំហានដំបូងយើងបញ្ជូនទាំងពីរនាក់ហ្នឹងមកធ្វើការសាកសួរ និងរបាយការណ៍បំភ្លឺ»។
លោក ខេង ទីតូ បញ្ជាក់ថា អាវុធហត្ថមិនទាន់មានវិធានការយ៉ាងណាជុំវិញករណីនេះនៅឡើយ ដោយសារតែរវល់ថែរក្សាសន្តិសុខសុវត្ថិភាពក្នុងថ្វាយព្រះភ្លើង និងព្រះរាជពិធីកាន់ទុក្ខព្រះបរមរតនកោដ្ឋ។
ប្រភពពីប្រជាពលរដ្ឋឲ្យដឹងថា មន្ត្រីអាវុធហត្ថដែលត្រូវរងការវាយប្រហារ មានម្នាក់ឈ្មោះ វង់ ប៊ុណ្ណា តួនាទីជាជំនួយការសេនាធិការកងរាជអាវុធហត្ថរាជធានីភ្នំពេញ និងម្នាក់ទៀតគេមិនស្គាល់ឈ្មោះទេ។
វិទ្យុអាស៊ីសេរី មិនអាចទាក់ទងមន្ត្រីអាវុធទាំងពីរនាក់ ដើម្បីរៀបរាប់បន្ថែមបានទេនៅថ្ងៃទី៣ កុម្ភៈ ឆ្នាំ២០១៣។
ទាក់ទងនឹងបញ្ហានេះ លោកផ្កាយបី ជួន សុវណ្ណ ឆ្លើយបំភ្លឺថា គឺលោកគ្រាន់តែដឹកនាំបញ្ជាកម្លាំងសមត្ថកិច្ចនៅទីនោះ ដើម្បីរក្សាសន្តិសុខប៉ុណ្ណោះ មិនបានប្រើប្រាស់ហិង្សានោះទេ។
លោកបន្តថា ការងារសំខាន់គឺលោកចង់ឲ្យពលរដ្ឋមានសុវត្ថិភាព និងមានរបៀបរៀបរយពេលចូលគោរពព្រះវិញ្ញាណក្ខន្ធព្រះបរមរតនកោដ្ឋនៅក្នុងព្រះបរមមេរុ។
លោក ជួន សុវណ្ណ៖ «ដូចខ្ញុំបញ្ជាក់ថា ក្នុងនាមជាមេបញ្ជាការរឿងអីត្រូវប្រើប្រាស់ហិង្សាទៅលើកងកម្លាំងខ្លួនឯង។ តើការបញ្ជាកម្លាំងឲ្យបំពេញការងារ ឲ្យកម្លាំងនោះរៀបចំ... ព្រោះសិទ្ធិរបស់បញ្ជាការវាអត់រឿងអីក្រៅពីហ្នឹងទេ»។
ទោះជាយ៉ាងណាក្តី ប្រជាពលរដ្ឋឃើញហេតុការណ៍ផ្ទាល់ភ្នែកសុំមិនបញ្ចេញឈ្មោះប្រាប់ថា លោកស្នងការវាយទៅលើប៉េអិមដោយសារតែឃើញពលរដ្ឋចូលគោរពបរមសពមិនមានរបៀបរៀបរយ ហើយប្រហែលជាលោកស្នងការគាត់យល់ថា ប៉េអិមជាអ្នកបើកដៃឲ្យពលរដ្ឋចូល តែតាមពិតប្រជាពលរដ្ឋចូលដោយខ្លួនឯងប៉ុណ្ណោះ។ ប្រភពបន្តថា មុនដំបូងលោក ជួន សុវណ្ណ វាយលើដងខ្លួនប៉េអិមម្នាក់ បន្ទាប់មកប៉េអិមម្នាក់ទៀតចូលទៅនិយាយឃាត់ ក៏វាយអ្នកទី២ទៀត។
រយៈពេល ៣ថ្ងៃមកនេះ មានមនុស្សម្នាជាច្រើនម៉ឺននាក់នាំគ្នាចូលទៅគោរពព្រះបរមសពព្រះបរមរតនកោដ្ឋ រហូតដល់អាជ្ញាធរដាក់បម្រាម និងរនាំងលួសបន្លាការពារ និងរបងដែក ព្រមទាំងពង្រាយកម្លាំងការពាររាប់ម៉ឺននាក់ ដើម្បីរាំងផ្ទប់មិនឲ្យពលរដ្ឋសម្រុកចូលច្រើនទៀតផង៕
No comments:
Post a Comment